توتک ءَ لشکر کشی زوراکی ءِ بیمناکیں کِسھے – بی ایس او آزاد

بلوچ نودربر گل آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ سال دوھزار ءُ یازدہ ءَ ھزدار ءِ دمگ توتک ءَ پوجی لشکر کشی ءِ میان ءَ گل ءِ پنچ باسکاں ھوار دگہ بازیں کماش ورنایانی زورانسری آوار جنی ءَ یازدہ سال سرجم بوگ ءَ پد یل نہ بوگ ءِ سر ءَ دلپدردی درشان اتگ گوشتگ کہ بلوچستان ءَ زورانسری آوار جنگ بوتگیں ھزاراں راجداریں باسک بازیں سالانی گوزگ ءَ پد ھم یل نہ بوتگ ءُ بیگواہ انت –

جارکش ءَ گوشتگ کہ پوج ءُ ڈیتھ اسکواڈ ءِ زوراکیاں ھزاراں کھولانی زند تباہ کُتگ انت – بلوچستان ءَ پوج ءِ کتکاریانی درچ روچ پہ روچ گیش بوان انت – کماش ءُ ورنایاں وتی جند ءِ گس ءَ چہ زورانسری آوار جنگ ءُ آھانی زانگولیں جونانی چگل دیگ ءِ درچ دھک ءَ پیش بندات کنگ بوتگ کہ روچ مروچی برجاہ انت بلکیں آئی ءِ تہ ءَ روچ پہ روچ گیشی آیگ انت –

جارکش ءَ دیمتر ءَ وتی درشان ءِ تہ ءَ گوشتگ کہ سال دوھزار ءُ یازدہ ءِ ھژدہ فروری ءَ توتک لشکر کشی ءِ میان ءَ قلندرانی کھول ءِ کماش ءُ ورنایاں ھوار درزنے ءَ گیش دست ءُ گوشیں بلوچ پاکستانی پوج ءَ آوار جتگ ءُ بیگواہ کُتگ اَنت کہ آھانی تہ ءَ بلوچ نودربر گل آزاد ءِ باسک اورنگزیب، آفتاب، وسیم ءُ عتیق الرحمن قلندرانی ءَ ھوار ھپتاد سالی محمد رحیم، فدا احمد، نثار احمد، ڈاکٹر محمد طاہر، ندیم بلوچ ءُ خلیل الرحمن انگت بیگواہ انت -اشی ءَ ابید ھمے یکیں کھول ءِ دگہ ورنا دومی دمگاں زورانسری آوار جتگ ءُ بیگواہ کُتگ انت ءُ درزنے ءِ کچ ءَ ورنا پوج ءَ شھید کُتگ انت –

آئی ءَ گوشتگ کہ سال دوھزار سیزدہ ءَ توتک ءَ یکجاھیں کبر شوھاز بوتگ کہ آھانی تہ ءَ کم چہ کم یک سد ءُ شست مردمانی جون کل بوتگ انت، پوج ءَ ھمے جون وت دست گپتگ انت ءُ دمگی مردم ءُ رسانکدراں چہ چیر داتگ انت کہ چریشی ءَ بیگواھیں مردمانی کھول ءِ تُرس ودی بوتگ –

بی ایس او آزاد ءَ بیگواھیں باسکاں ھوار درسیں بیگواھیں بلوچانی زورانسری آوار جنی ءِ سر ءَ میان اُستمانی ادارھانی بے وسی ءِ سر ءَ پدردی درشان اتگ ءُ گوشتگ کہ زمہ داریں ادارھانی ھچ نہ گوشگ ریاستی ادارھاں ھمے واکدار ءَ دیگ انت کہ بلوچانی بگیری ءَ تاکت کارمرز بہ کنت – تاکت ءِ کارمرز کنان ءَ لس مردم ءُ سیاسی باسک ھزارانی کچ ءَ بیگواہ کنگ بوتگ انت ءُ ابید ءِ آمیدگس ءَ کُشگ بوتگ انت –

گڈسر ءَ بی ایس او آزاد ءَ میان استمانی ھکانی ادارھاں چہ لوٹ کُتگ کہ بلوچ چکچینی دارگ ءُ بیگواھیں مردمانی یل کنائینگ ءَ وتی کرد ءَ پیلو بہ کن انت –