بلوچستان تیرگواری ءُ دگہ وئیلانی آسر ءَ پنچ مردم بیران شش ٹپی بوتگ ، یک لاشے دست کپتگ

بلوچستان ءِ جتائیں دمگاں تیرگواری ءُ دگ ءُ دگہ وئیلانی آسر ءَ پنچ مردم بیران ءُ شش ٹپی بوتگ-

گیشیں ھالانی رِِد ءَ پنچ شمبے ءِ روچ ءَ بلوچستان ءِ جتا جتائیں دمگاں تیرگواری ءِ سے وئیل بوتگ ءُ دگہ لاشے دست کپتگ ءُ دگ ءِ یک وئیلے دیم ءَ اَتکگ وھدے کہ وت ماں وتی جیڑہ ، آس ءِ دو جتائیں وئیل دیم ءَ اَتکگ-

تیرگواری ءِ بنداتی وئیل اوستہ محمد سٹی پولیس تھانہ ءِ نزیک السیف مل ءَ بوتگ کہ سلاہ بندانی تیرگواری ءَ چہ مل واھنند رحمت اللہ جتگ ءُ جمعدار نوریز مستوئی نامیں دو مردم بیران بوتگ وھدے کہ تیرگواری ءِ نشانگ ءَ اَتکگیں سے مردم ٹپی بوتگ اَنت-

تیرگواری ءِ دومی وئیل ضلع لسبیلہ ءِ تحصیل حب چوکی ءِ دمگ گلیکسی ٹاؤن ءَ دیم ءَ اَتکگ اود ءَ سلاہ بنداں سوراب انجیرہ ءِ نندوک شاھد ء سومار خان جتک سر ءَ تیرگواری کتگ ءُ کُشتگ –

دگہ یک وئیلے ماشکیل ءِ نزیک ءَ ناشناسیں سلاہ بندیں مردماں تیرگواری کتگ ءُ غلام مصطفی مشوانی کشتگ-

شال ءِ دمگ زرباری بائی پاس ءَ چہ انتزامیہ ءَ یک مردمے ءِ لاش دست کپتگ ءُ چریشی ءَ پد پجّار ھاتر ءَ نادُراھجاہ ءَ برتگ اِت- زانگ بہ بیت گوستگیں چیزے روچاں لاشانی دست کپگ ءِ دْرچ برجاہ ءَ اِنت تنی وھدے ھچ لاش پجّار نہ بوتگ-

دومی نیمگ ءَ پنجگور نزیک ءَ تیز روگ ءِ سبب ءَ یک گاڑی یے چپی بوتگ تمپ ءِ نندوک شے ھک بیران بوتگ-

ضلع لسبیلہ ڈام بندر ءِ نزیک ءَ شپ ءَ کُڈُّکے ءِ اناگاہ ءَ آس کپتگ ءُ آس چست بوتگ چریشی ءَ کُڈُّک تہ ءَ نندوک موسی نامیں مردمے سُتکگ ءُ سک ٹپی بوتگ چریشی ءَ پد آ نادُراھجاہ ءَ برگ بوتگ-

ھمے وڑ سوئی کٹھن ءِ ھند ءَ ھجوانی بگٹی ٹک ءِ مردمانی میان ءَ زمینی جیڑھے سر ءَ وت ماں وت ءَ لٹ جنکاو بوتگ چریشی ءِ آسر ءَ دو مردم ٹپی بوتگ-