تربت: ماسٹراں وتی لوٹانی ھک ءَ زھرشانی کُتگ

بلوچستان ءِ دمگ ء کیچ ءِ بنجاھی شھر تربت ءَ مروچی پنچ شمبے ءِ روچ ءَ جونئیر ٹیچرانی نیمگ ءَ ٹائم اسکیل، پنجاہ درسد پرموشن کوٹہ ءُ دگہ جیڑھانی ھاتر ءَ ماڈل اسکول ءَ بگر تاں پریس کلب ءَ روانک کش اِتگ، روانک ءَ ماسٹراں مزنیں کچے ءَ بھر زرتگ -.

ماسٹرانی دست ءَ بینر ءُ پلے کارڈ بوتگ انت ءُ آھان وتی لوٹانی ھک ءَ نارہ ھم جتگ – بازار ءِ چہ پریس کلب ءَ تاں شتگ انت –

زھرشانی ءَ تران کنان ءَ آھانی گوشگ ات کہ جونئیر ٹیچرز بیوروکریسی ءُ ٹیچر گل دگہ جیڑھانی اماچ انت ما ھمے لوٹ ءَ کنیں کہ کانودی وڑ ءُ ڈول ءَ جونئیر ٹیچراں آھانی ھک دئیگ بہ بیت ءُ ھما ٹیچر 9اسکیل سر ءَ انت آھاں چاردہ ءُ ھما کہ چاردہ سر انت آھاں شانزدہ اسکیل ءِ پرموشن دیگ بہ بیت –

آھانی گوشگ ات کہ دگہ سوبھاں ٹیچر ھمے داب ءَ آھانی اپ گریڈیشن بیت بلے بلوچستان ءَ اے وڑ کنگ نہ بوگ ءَ انت کہ اے راہ ءِ مستریں اڑاند بیوروکریسی انت ءُ ھما ٹیچر گل انت کہ آھانی رھبند ءَ جونئیر ٹیچر ھوار نہ انت –

آھانی گوشگ ات کہ ما وتی اے آئینی ھک ءِ ھاتر ءَ ھر پڑ ءَ جنگ کنیں پرچاکہ اے مئے بنکی ھک انت ءُ اے ھک دگہ سوبھاں پیسر ءَ منّگ بوتگ –

آھانی گوشگ ات کہ بلوچستان سرکار ءَ سال دوھزار ءُ شش ءَ پنجاہ درسد پرموشن منّ اِتگ بلے اشی ءِ سر ءَ گامگیج زورگ بوگ ءَ نہ انت اگاں اشی ءِ سر ءَ گامگیج زورگ بہ بیت گڑا جونئیر ٹیچراں وتی ھک رس ایت ءُ آھانی پرموشن ءَ دگہ ٹیچر ھم پائدگ چست کن انت –

آھانی گوشگ ات کہ اگاں مئے لوٹ منّگ نہ بوت اَنت گڑا دیمتر ءَ ترندیں گامگیج زورگ بیت انت –