کراچی پریس کلب ءِ دیم ءَ زورانسری بیگواھیں مردمانی زھرشانی بنجل ءَ چار ھزار ءُ پنچ سد ءُ نود ءُ دو روچ سرجم بیتگ، یکجھتی ءِ واستا جئے سند کومی مھاز ءِ کلانیں سروک اجاز چانڈیو ،جنید چانڈیو ءُ دگہ مردم ھوار بیتگ اَنت-
وی بی ایم پی ءِ وائس چیئرمین ماماقدیر بلوچ ءَ تران کنان ءَ گْوشتگ کہ مئے جُھد روانک، زھرشانی، مُچی ءُ چاگردی رسانکدر ءَ کمپئن کنگ ءُ مرچی کراچی پریس کلب ءِ دیم ءَ پہ ھمے اوست ءَ نشتگ ءُ پاکستانی چیریں تْرامگیجانی بیھارانی دیمپانی ءَ کنگ ءَ ایں کہ روچے نا روچے میان اُستمانی کانود مئے نیمگ ءَ دلگوش ءَ گْور کن اَنت، ما یکبرے پد ءَ چہ اقوامتھدہ ءَ ھوار میان استمان ءِ مردمی اگبالانی گلاں دزبندی کن ایں کہ آ وتی جوڑ کُرتگیں کانود ءُ راھبندانی پاسداری ءَ بہ کن اَنت کہ چہ ایشی ءَ ھزاراں کھول، مات ءُ گْوھار پہ شاتکامی وتی زندمان ءَ بہ گْوازین اَنت۔
آئی ءَ گْوشتگ کہ بلوچ زھگ چہ پریس کلبانی دیم ءِ واہ ءُ زارانی جاہ ءَ وانشتجاہ ءُ زانشتجاھاں چو مردمانی وڑ ءَ زندگی بہ گْوازین اَنت ءُ لکانی کچ ءَ بلوچاں وانگ ءُ زانگ ءِ دربرگ ءِ موہ بہ رس ایت، اگاں نہ زوراک ءُ زورگیرانی دیم ءَ گریوگ اھمکی ءَ ابید دگہ ھچے نہ اِنت، چونائی ءَ مردم واہ ءُ زار پمیشکا کن اَنت داں وتی توار ءَ داں جوانیں مردماں سر بہ کن اَنت، بِلے کہ پہ ایشی ءَ مارا رسانکدر ءُ ٹیکنالوجی لوٹ ایت کہ چہ ایشاں ما زبھر ایں ءُ پاکستانی رسانکدر زوراکیانی چیر دیگ ءِ سْوب ءَ اے میار باریاں شریدار اَنت، بلوچستان ءِ واہ ءُ زار چیر تَرینگ بیگ ءَ اَنت۔
آئی ءَ گْوشتگ کہ زاناں پہ بلوچاں بس مِرگ ءُ بیگواہ کنگ پشت کپتگ، دیمروئی، مالی ءُ سیاسی زندگی ءِ رکینگ ءَ پہ بلوچ ءَ بس واہ ءُ زار، جونانی چِست کنگ ءُ پدمنتگی راجے جوڑ بیگ ءُ دست کُٹ ءَ کنگی اَنت۔چو بلوچستان ءِ وڑ ءَ سندھ ءَ ھم سدانی کچ ءَ وئیل دیم ءَ اتکگ اَنت۔نوکیں ٹیکنالوجی ءُ کیمرھانی چمانی دیم ءَ ھمک چیز پدر بیتگ بلے ایشی ءَ ابید جھان مئے زمین ءِ چیر ءِ گرانھادیں مڈیاں گند اَنت بلے زوراکیاں گندگ ءَ نہ اَنت۔