نمدی یے پہ سنگت گزین بلوچ ءَ – منی زرد (ضمیر)

نبشتانک: نمدی یے پہ سنگت گزین بلوچ ءَ

نبشتہ کار: منی زرد (ضمیر)

دی بلوچستان پوسٹ

دُروت منی گوش داروکیں ءُ واھگانی پھازوکیں سنگت اُمیت ھمیش اِنت تو جوڑ وش ئے گوں وتی زندے اے روچ ءُ شپاں کہ انچو پہ وت تچان اَنت اے بھار تیرمہ ءُ زمستان کہ کاینت چڑاں پہ سالانی گوازینگ ءَ ءُ نوں اے زمستان روان اِنت تو گپ ئِے زان ئے کہ زمستان وھدے گوں وتی آپ ءُ تاباں کیت بگندے آپ بندگ بندات کن اَنت چہ درچکاں آھانی تاکانی رچگ بندات بیت ءُ چہ شھرانی دل ءَ گوزوکیں کشک انچو ابیتک بنت گوش ئے ھزاراں سال سبز بوتگیں ڈگارے ڈکالے ءِ آماچ بوتگ ءُ ھر نیمگ ءَ وتی ھسابے یک ھاموشی یے جوڑ بیت بلے پد ءَ ھم منی ایوکی ءِ سنگت تو وتی گرمیں کوٹی ءُ گرمیں کمل یلہ داتگ اَنت ءُ جھل ءَ کُرشیانی سر ءَ گوں من تھنائی ءَ دیوانے کُرت ءَ برے من ءُ تو کند اِتگ ءُ برے انچو ھاموش گوش ئے اے جاگاہ ءَ کدی ھچ مردُمے نہ بوتگ بلے نوں ترا سک دیر اِنت کہ گندگ نہ بوگ ءَ ئے نزاناں تو منی گپے دل ءَ کُرت ءَ یا ترا نوں تھنائی دوست نہ بیت بیا منی واھگانی پھازوک دل گوں تو پد ءَ دیوانے کنگ لوٹ اِیت دگہ ھزار گپ ھست اَنت کہ گوں تو کنگی اَنت بلے نوں ترا وھد موہ دیگ ءَ نہ اِنت من پمیشا وتی اے گپاں تئی سر ءَ یک نمدی ءِ رنگ ءَ گوشگ ءَ آں-

منی سنگت تو دیر اِنت وتی چم بند کُرتگ اَنت گوش ئے تو ھچ نہ گندگ ءَ ئے تئی چپ ءُ چاگرد ءَ چے بوگ ءَ اِنت ءُ پہ گندگ ءُ سرپد بوگ ءَ وتی تو کدی گوں من ءَ دیوانے ھم نہ کُرت ءَ تو بچار وتی وانگجاہ ءَ چے رنگ ءَ اِنت ءُ اد ءَ وتی بلوچ نودربراناں بچار چون اَنت بچار آھانی مارشتاں بچار آھانی پکر ءُ ھیالاں چون رُنگراھاں کپتگ اَنت دگہ ناں تو وتی کوٹی لمبر “سی ءُ سے” ءَ بچار ءُ آئی ءِ تہ ءَ وتا ءُ وتی سنگتاں بچار کہ شما چے کنگ ءَ اِت اے دراجیں کوٹی بگندے پہ ھیلکاری دیواناں وش بیت پہ زانت ءُ زانگ روژنا بیت پہ راجے آیکی بانداتے ءِ جیڑگ ءَ آتار بیت بلے اد ءَ چوشیں یک چیزے ھم گندگ بوگ ءَ نہ اِنت اد ءَ دُرست چو زندگیں لاش ءَ ھر یکے یک کُنڈے ءَ کپتگ ءُ گوں وتی گوانکو(موبائل) ءَ اینچو گُلائش اَنت کہ کسے چہ کوٹی ءَ در ءَ بہ روت ءُ بیت ءُ سلام بد اَنت بلے اے سنگتان ءَ اینچوکہ تک ھیال نہ بیت کہ اد ءَ چیزے بوگ ءَ اِنت زاناں تو ءُ تئی سنگت سرپد نہ اَنت کہ شما کجام دور ءُ باریگ ءَ رس اِتگ اِت شما زاناں وت ءَ چہ بلوچ راج ءَ دور سرپد بہ اِت شما وت ءَ را نوں اے سرپد نہ کُرتگ کہ مارا نوں گوں بلوچ ءُ بلوچ راج ءَ ھچ وڑ ءَ یک کارے نیست نوں ما وتی وڑ ءُ وتی ھساب ءَ زند گوازین ایں اگاں شمئے ھیال اے تک ءَ رس اِتگ گُڑا من گپ نہ کن آں گوں شما نوں شما زان اِت شمئے وڑ ءُ پھم اگاں ناں شما گوش اِت اِناں ما انگت ءَ بلوچ اِنت ما بلوچ راج ءَ گوں بندوک ایں ما وت ءَ بلوچ گوش ایں ءُ بلوچی زُبان ءَ گپ کن ایں بلوچی پوشاک کن ایں گُڑا منی سنگت پہ بلوچی گپ کنگ ءَ پہ بلوچی پوشاکے گور ءَ کنگ ءَ ءُ وت ءَ پہ بلوچ گوشگ ءَ کسے بلوچ بوت نہ کنت اگاں کسے وت ءَ بلوچ گوش اِیت گُڑا آ یک جوانیں وڑے ءَ پہ بلوچ راج ءَ کار بہ کنت بلوچ راجے درداں بہ مار ایت بلوچ راجے انوگیں ھستیں لوٹاں وت ءَ سرپد بہ کنت ءُ ھما ھساب ءَ کار بہ کنت شما وتا چہ اے گپاں پھک سرپد بہ کن اِت کہ زُلمے اے چول کہ چست بوان اِنت ءُ روچے یکے ءَ را گرگ اِنت ءُ گوں وت ءَ بارت اے چول انچو بُرز بوان اِنت اے نیکہ ھُشک ءَ یلہ دنت ءُ نیکہ تر ءَ اے چول نزانت کہ کے ءَ کارے کُرتگ ءُ کے ءَ نہ کُرتگ بس اے چول شپ ءُ روچ یک وڑ ءَ گوں وت ءَ ھُشک ءُ تر ءَ برگ ءَ اِنت بگندے اے چول روچے شمئے ھم دروازگ ءَ بیت ءُ شمارا بہ بارت چہ آئی ءَ پیسر کہ اے چول شمئے دروازگ ءَ بہ ٹُکین اِیت وت ءَ سرپد بہ کن اِت وتی راجی کاراں سرپد بہ بہ اِت ءُ ھاں من اِشکُنگ ءَ آں کہ شما گوشگ ءَ اِت کہ ماں نوں ڈاکٹریں مئے آیکی روچ روژنا اَنت مارا چے کار کہ ما وت ءَ پہ زور اڑانداں دور بدئے ایں گُڑا سنگت اے ھیال کہ شما دارگ ءَ اِت اے پھک ھرابیں ءُ بے بُنیاتیں ھیالے اد ءَ کسے باندات ءُ آیکی روچ روژنا نہ اَنت اد ءَ شما چیزے پہ راج ءَ کن اِت کہ ناں بلے انگت شمارا اڑانداں دور دیگ بیت ھما گپ کہ چول ھُشک ءُ تر ءَ برگ ءَ اِنت شما زاناں نہ گندگ ءَ اِت کہ تر بہ کشکاں چون مرگ ءَ اِنت اد ءَ ترا چون بیگواہ بوگ ءَ اَنت اد ءَ ترا چون بزگ کنگ بوگ ءَ اِنت کہ وتی جندے لوگ ءِ دپ ءَ آئی ءَ را سوج کنگ بوگ ءَ اِنت کہ تو کے ئے ءُ کُجا چے آیگ ءَ ئے ءُ کجا روگ ءَ ئے دگہ ناں شما وتی وانگی ادارھاں بچار اِت آ شمارا چے دیگ ءَ اَنت شمارا سالاں سال بہ کشکانی سر ءَ پہ زھرشانی ءَ پرمان کن اَنت زاناں دگہ جاھاں ھمے وڑ اِنت دگہ جاھانی نودربر زاناں شمئے وڑ بہ کشکاں کپتگ اَنت اِناں چوش نہ اِنت اود ءَ دُرست یک جوانیں وڑے ءَ گوں آسودگی ءَ وانگ ءَ اَنت بلے چے شما وتی چم بند کُرتگ اَنت ءُ انگت ءَ گوش اِت مئے باندات روژنا اِنت شمئے دمگاں زاناں اینچو گند لگ اِتگ کہ اد ءَ دُرست بلوچ نودربرانی باندات ات تھار اِنت ایوک ءَ شمئے روژنا اِنت زاناں شما کے انت کہ تھنا شمئے باندات روژنا اِنت-

دگہ ناں تو وتی چماں تالان بہ کن وتی دیارے ھر نیمگ ءَ بچار چے بوگ ءَ اِنت ترا یک نیمگے ءَ ماتے گندگ ءَ کیت کہ پیر اِنت چہ وتی چماں نزور اِنت لنگ ءُ منڈ اِنت چہ گوشاں کر اِنت آئی ءِ جوان سالیں چکے بیگواہ کنگ بوتگ ءُ زندان ءِ تھارمائیں کوٹیانی تہ ءَ وتی زندے ھلاس بوگ ءِ روچاں ھساب داریت بگندے آ چونیں ازاباں اوپار کنگ ءَ اِنت آئی ءِ جان کُٹہ کُٹہ کنگ بوتگ ءُ چہ دست ءُ پادے کوڑاں کڑک کنگ بوتگ پہ نا ھچیں ءُ نہ کُرتگیں گُناھاں بلے جُست تھنا ھمیش اِنت تو چیا بلوچے زاگے ئے تو چیا بلوچے پیداک کنگ بوتگ ئے پہ ھمیشاں آ سالانی سال زندانی کنگ بوتگ تو بچار وتی کش ءِ ھمساھگ ءَ کہ آ سے روچ ساری ءَ اَتک اَنت تئی لوگ ءِ دروازگ ٹُک اِت ءُ شمارا گوشت اِش کہ منی جنکوکیں زاگے آروس اِنت ءُ وشی اِنت اے ساھتاں شما گوں ما ھمراداری بہ کن اِت ءُ بیا اِت آروسی ءَ بلے مروچی ھمے گس ءِ تہ ءَ گریوگ پریات ءُ زاری اِنت اے وشیانی ساھت ءَ چیا کہ چہ نیپگ ءِ آنجگ ءَ لاگریں کشکانی سر ءَ جنی موٹل کپتگ ءُ سالونک بیران بوتگ ءُ بگندے یک سالے ئِے تہ ءَ چیکہ ھزار مردُم بیران بنت اے کشکانی سر ءَ زاناں تو ایشاں گندگ ءَ نہ اِت-

مروچی کہ اے رسانکارانی دپ ھُشک نہ بیت چہ اے گپ ءِ جنگ ءَ کہ گوادر مٹی کاریت بلوچاں نوکیں زندے دنت بلوچستان ءِ تہ ءَ آشوبے کاریت مردُمانی زند مٹ بنت ءُ تو ھم ھمے گپانی سر ءَ ایمان آرتگ کہ ھو مئے زندے اے جنجال مٹ بنت ءُ وشھالی کیت بلے تو کدی اے مار اِتگ کہ ھما گوادر کہ ترا نوکیں زندے دنت آئی ءِ جندے جھمنندیں مردُم چون اَنت آ چون پہ گُٹے آپ ءَ تلوسگ ءَ اَنت ءُ انچو تُنیگ ءَ کپتگ اَنت ءُ گوادر پہ آھاں ھچ کُرت کنگ ءَ نہ اِنت ءُ گوادر ءِ مردُم کہ وتی روچاں شپ ءُ شپاں روچ کنگ پہ تیاب ءِ مائیانی سر ءَ وتی زند ءَ گوازین اَنت بلے چہ آھاں اے کار ھم پُلگ بوتگ ءُ آھانی چپ ءُ چاگرد ءَ پسیل جنگ بوتگ ءُ دُرست گوادر یکبارگی زندانی کنگ بوتگ اَنت-

گپ سک باز اَنت من اُمیت کن آں کہ وھدے تو منی اے نمدی ءَ وان ئے تو منی پسّو ءَ پد ءَ نمدی ءِ رنگ نہ دئے ءُ وت کائے پہ منی دیوان ءَ گُڑا پد ءَ من ءُ تو باز گپ کن ایں بازیں سرھالانی سر ءَ انچوشکہ تئی ھزانگ بہ باں زِمین تئی نودربرانی وانگی جنجال بہ باں تئی جوانانی نشہ ئِے آماچ بوگ بہ بیت ءُ چہ کُلاں بلاھیں جیڑہ کہ زُبان ءِ گار بوگے تئی زِمین ءُ تئی پجارے جیڑہ بہ باں گپ کن ایں-

بس نوں گُڈ سر ءَ دُوا ھمیش اِنت تئی ءُ تئی سنگتانی چم پچ بہ بنت دروگیں رُژنائیں باندات ءَ سرپد بہ بیت-