بلوچستان: دو مردم زورانسری آوار جنی ءَ پد بیگواہ، سَے جون دست کپتگ

دی بلوچستان پوسٹ پتر ءَ سربوتگیں ھالانی رِد ءَ بلوچستان ءَ دگہ دو مردم پاکستانی پوج ءَ زورانسری آوار جتگ ءُ بیگواہ کتگ انت –

گیشیں ھالانی رِد ءَ گوستگیں شپ ءَ پاکستانی پوج ءَ چہ کراچی ءَ کیچ زامران ءِ جھمنندے زورانسری آوار جتگ ءُ گوں وت برتگ –

اھوالکار رِد ءَ پاکستانی پوج ءَ کراچی ءِ دمگ ملیر ءَ محمد نور نامیں ورنایے زورانسری آوار جتگ ءُ بیگواہ کتگ –

ھمے وڑ گوستگیں شپ ءَ پاکستانی پوج ءَ ھزدار ءِ کُچگی دمگ ءَ گِسے ءِ سر ءَ بیڑ برتگ ءُ نزیر احمد ء نور محمد آوار جتگ ءُ گوں وت برتگ –

زانگ بہ بیت بلوچستان ءَ ھمے ماہ ءِ تہ ءَ زورانسری آوارجنیانی تہ ءَ گیشی اتکگ گوستگیں دہ روچانی میان ءَ بلوچستان ءِ جتا جتائیں دمگاں کساس پنجاہ مردم پوج ءَ آوار جنگ ءِ ھال رسانکدراں شنگ بوتگ اَنت –

دومی نیمگ ءَ ھب ءِ دمگ منگھو پیر ءَ یک مردمے ءِ جون دست کپتگ، وھدیکہ گوستگیں روچ ءَ ھم ھمے دمگ ءَ یک مردمے ءِ جون دست کپتگ دومی نیمگ ءَ شال ءَ ھم یک مردمے ءِ جون دستکپتگ –

ھب ءِ واکدرانی رِد ءَ ھب ءُ کراچی ءَ دستکپتگیں جون عباسی نادراھجاہ ءَ سر کتگ انت ھردو لاشانی دست زمزیل ءَ بندوک بوتگ ءُ وھدیکہ دوئیں مردم لٹ ءُ کٹ کنگ ءَ پد کُشگ بوتگ انت –

تنی وھدی ھردو جونانی پجار کنگ نہ بوتگ – ھب ءُ کراچی سیمسری دمگاں ھوار شال ءَ مدامی جون دست کپگ ءَ انت اشی ءَ پیش کراچی ءَ نادرن بائی پاس ءَ سَے مردمانی جون دستکپتگ انت کہ زانگولی سوب ءَ آھانی پجار نہ بوتگ اَنت –