نبشتانک: راج ءِ مستریں نزوری
نبشتہ کار: آئیشہ بلوچ
دی بلوچستان پوسٹ
وھدےکہ یک زوراکیں مُلکے وتی نزیکیں ھمساھِگیں مُلکے ءِ ایردست کنگ مراسا تیار کنت گُڑا چہ دْرستاں پیش ھمے کمزوریں مُلک ءِ نزوریاں چار ایت، آ راج ءِ تہ ءَ راجدْروھاں درگیج ایت کہ اُرش ءِ وھد ءَ من ءَ کُمک بہ کن اَنت پد ءَ ماں یک ناشناسیں ڈیھے ءَ وتی جنگی لشکراں چہ راجدوستیں گھگیراں رکین آں کمزوریں مُلک ءِ سر ءَ وتی ایردستی ءِ برجاہ دارگ ءِ ھاتر ءَ گُلامیں راج ءِ تہ ءَ دمگی کاسگ چٹّانی ودی کنگ ءُ لس مھلوک ءِ دپچٹ کنگ ءِ ھاتر ءَ وڑ وڑیں گاماں زور ایت۔
زیردستیں راجانی رواج، دود، ربیدگ ءُ زُبانانی لگتمالی ءَ انچیں بے سمائیں پندالاں ساز ایت کہ لس مھلوک سرپد نہ بیت کہ ما گُلام جوڑ بوگ ءَ ایں، ایردستیں راج ءِ تہ ءَ تھی جیڑھاں ودی کنان ءَ راج ءَ بھر ءُ بانگ کنائین ایت چریشی ءَ راج وت ماں وت کشاں چیل بیت۔ راج ءِ زھگیں نودربر بے آسراتی ئیں وانگجاھاں زورگِر ءِ ردیں درونتاں وانان ءَ وتی جِند ءِ راجی بستار ءُ ارزِشت ءَ بے ھیال بنت چمیشکا سرجمیں راج کم کم ءَ یک مازگی گلامے جوڑ بیت۔
اگاں ھورت چار ئے گُڑا سرپد بَہ ئے کہ گوں بلوچ راج ءَ ھم انچوش بوت ءُ انگت ءَ اے بدواھیں دُژمن ءِ ھمے وڑیں پندل ساز بوگ ءَ اَنت بلوچ راج ءِ دُژمن ءَ 28 مارچ 1948 ءَ بلوچستان ءِ سر ءَ اُرش کنگ ءَ پیسر بلوچ راج ءِ تہ ءَ دمگی سردار، میر ءُ نواباں لب ءُ لالچ دیان ءَ بھا زُرت اَنت پمیشکا ما گِند ایں کہ 1948 ءَ شھزادگ ابدلکریم بلوچ ءِ سرکماشی ءَ اولی بلوچ راجی آجوئی ءِ سِلاھبندیں جُھد ءَ ھمے دمگی میر ءُ سرداراں بلوچ راجی گھگیری ءَ ناں وت بھر زورت ءُ نَیکہ وتی دمگی بلوچاں گْوشت اش کہ پہ وتی آجوئی ءَ پاد بیا اَنت شھزادگ ابدلکریم ءِ کاروان ءَ ھوار بہ اِت گِند ئے پہ دُژمن ءِ پائدگاں ھمے دمگی میر ءُ نواباں بلاھیں بلوچ راج بھر ءُ بانگ کنان ءَ چہ سرجمیں راجے ءَ ماں کسانیں ٹَکاں ونڈ ءُ چُنڈ کُتگ اَنت نی بچار کہ کسے وت ءَ مینگل ءُ کسے وت ءَ رئیسانی، لانگو ءُ بُلیدی گْوش ایت، کسے وت ءَ کھوسہ، لیگاری، بُزدار، مری ءُ گیشکوری گُڑا کسے وت ءَ بُگٹی ءُ رِند گْوش ایت کسے جمالی اِنت ءُ کسے مگسی-
گِند ئے اے سرجمیں راج پہ دُژمن ءِ سیت ءُ پائدگاں ماں دمگی راجدْرہ ءُ کاسگ چٹّانی دست ءَ بھر ءُ بانگ اَنت چمیشکا اے وت ءَ اول بلوچ نہ لیکھ اَنت اگاں ایشاں وت ءَ بلوچ منّ اتیں گُڑا اے دْراہ بلوچاں بابو نوروز ھان زھری ءِ سرکماشی ءَ 1958-59 ءِ بلوچ راجی جنگ ءَ ھوار بوتگ اِت اَنت اگاں ھمے دمگی وتگڑیں سردار، میر ءُ نواباں کمیں بلوچیت ءُ راجدوستی ءِ مارشتے بوتیں گُڑا ایشاں 1973-78 ءِ بلوچ راجی آجوئی ءِ سِلاھبندیں جُھد ءَ بابا ھیربکش ءُ اتا اُلہ مینگل بے کُمک ءُ بے ھمراھدار نہ کُتگ اَت اَنت، اگاں ھمے لگور سردار ءُ میر وت جنگ ءِ بھر بوھگ ءَ تُرسگ ءَ اِت اَنت گُڑا باید اِنت وتی ٹَک ءِ بلوچاں بہ گْوشتین اش کہ برو اَنت ءُ بابا ھیر بکش مری ءِ سرکماشی ءَ بلوچ راجی آجوئی ءِ سِلاھبندیں جنگ ءَ ھوار بہ بَہ اَنت۔ بلے اِنّاں پرچا کہ اے دْراہ پنجابی ءِ کاسگ چٹّ اِت اَنت، ایشاں پنجابی ءِ لب ءُ لالچ رسگ ءَ اَت گُڑا ایشاں چون بلوچ راجی آجوئی ءِ بھر بہ زُرتیں یا کہ وتی ٹَک ءِ بلوچاں بہ گْوشتیں کہ راجی جنگ ءَ ھوار بَہ اِت۔
ھمے وڑ ءَ داں روچ مرچیگ ءَ وتگڑیں دمگی میر ءُ سردار ءِ وڑیں کاسگ چٹّاں بلوچ راج بھر ءُ بانگ داشتگ اَنت یک پنجابی ءِ وڑیں درآمدیگیں زُبان، دود ءُ ربیدگی زورانسرے چون راج ءِ دمگ، میتگ، کوہ ءُ کوچگاں بلوچ راج ءِ تْرُندیں چیرجنگ ءَ داشت کنت وھدے کہ ھمے زورانسر بلوچ کوہ، دمگ ءُ میتگاں وت ناشناس اِنت گِند ئے پہ وتی بْراتانی کُشائینگ ءَ ما بلوچ راج ءِ ھمے راجدْروہ وت پنجابی پوج ءَ رھشُونی ءَ کنان ءَ کوہ ءُ کوچگاں سر کنگ ءَ ایں، بلوچ میتگانی ماندارگ، راجی سرمچار ءُ رھشُونانی شھیدی، زالبولانی کم شرپی ءُ ورنایانی گار ءُ بیگواھی ءَ مئے راجدْروھانی دست مان چے ءَ کہ اے چکوال ءُ ساھیوال ءِ تینّو مینّواں مجال اِنت کہ کُنگریں بلوچ سرمچارانی دیم ءَ اوشت اَنت اگاں روس، امریکہ ءُ نیٹو چیرجنگ ءِ ھرچگاں برداش کُت نہ کن اَنت گُڑا اے پنڈوکیں پنجابی چہ کُجا یک گْوریلہ جنگے برداش کنت-
پرچاکہ ما بلوچ ناتپاک ایں، وتگڑیں دمگی میر ءُ سردار پنجابی ءِ ٹوھیں آسراتی اَنت نی باید انت بلوچ راجی لشکر راج ءِ لس وانِندگیں ورنایاں وتی سِلاھبندیں گلاں ھوار کنائینگ ءِ جُھد ءَ بہ کن اَنت کہ دمگی میر ءُ سرداراں ھوار راجدْروھاں پْروش دیگ بِہ بیت وھدے کہ ھمے دمگی میر ءُ سردار ءَ پْروش بیتگ گُڑا دُژمن ءَ ھم الم پْروش بیت، راج وتی ڈیھ ءِ وتواجہ بیت ءُ آزات ءُ راجمستریں آجوئی بلوچستان ھم دیمروئی کنت۔
بلوچ شالا یکمُشت ءُ وت ماں وت ھمکوپگ بات، بلوچستان شالا آجوئی بہ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔