کپٹن ادھم ءِ کوش ءَ تُرندی ءَ گوں ایرجن آں، عبدالحفیظ زہری زاھر کنگ بہ بیت – بی وائی سی

بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ مند ءَ ریاستی زوراکیانی بگیری ءَ توار چِست کنوکیں چاگردی باسک کپٹن ادھم بلوچ ءِ کوش ترندی ءَ گوں ایرجتگ ءُ گوشتگ کہ بلوچستان ءَ سرکارے چیردستی ءَ کار کنوکیں سلاہ بندیں ٹولی بلوچ ءِ چُک چینی ءَ ھوار انت –

آئی ءَ گُشتگ بلوچستان ءِ تہ ءَ شوربندی ءِ رِد ءَ سلاہ بندیں ٹولی یکرندے پد ءَ مھکم کنگ بوگ ءَ انت – یک نیمگے بازیں مردمے آوار جنگ ءُ بیگواہ کنگ بوگ ءَ انت دومی نیمگ ءَ راجدار ءُ چاگردی باسکاں ھوار لس مھلوکانی کوش برجاہ انت – بلوچ یکجھتی کمیٹی کپٹن ادھم بلوچ ءِ کوش ءَ ترندی ءَ گوں ایرجنت ءُ بلوچستان ءِ مھلوک ءَ چہ لوٹ کنت کہ اے وڑیں زوراکیانی بگیری ءَ گِساں چہ دربیایاں توار چست بہ کن اَنت –

جارکش ءَ دیمتر ءَ وتی درشان ءِ تہ ءَ چہ متحدہ ارب امارات ءَ آوار جنگ بوتگیں عبدالحفیظ زہری ءِ زورانسری آوار جنی ءَ پدردی درشان اتگ ءُ گوشتگ کہ بلوچستان ءَ ھمک روچ بازیں کساسے ءَ مردم زورانسری آوار جنگ بوگ ءَ انت بلے نوں ڈنی ملکاں ھم بلوچ زورانسری آوار جنگ بوگ ءَ انت کہ پدردی گپے – عبدالحفیظ زہری بیگواھیں راشد حسین بلوچ ءِ کھول ءَ گوں سیادی داریت کہ آ پیسر ءَ متحدہ ارب امارات ءَ آوار جنگ ءُ پاکستان ءِ ھوالگ ءَ کنگ بوتگ کہ آئی ءِ آوار جنی ءِ چم دیستیں گواہ عبدالحفیظ بلوچ بوتگ بلے نوں آ ھم آوار جنگ بوتگ – عبدالحفیط زہری ءِ کھولے بازیں مردمے پیسر ءَ ھم نشانگ کنگ بوتگ اَنت بلے نوں دری ڈیھاں اے مردمانی زورانسری آوار جنی پدردی ھال اَنت –

جارکش ءَ گوشتگ کہ متحدہ ارب امارات ءِ سرکار زمہ داری ءِ گوم ءَ عبدالحفیظ ءِ کھول ءَ آئی ءِ درگت ءَ سرپدی بہ دنت آئی ءَ زاھر بہ کنت –

جارکش ءَ گڈسر ءَ وتی درشان ءِ تہ ءَ گوشتگ ھمک روچ مزنیں کساسے ءَ مردمانی زورانسری آوار جنی، سلاہ بندیں ٹولیانی دستاں دست ءُ گوشیں مردمانی کوش، سی ٹی ڈی ءِ دست ءَ دروگیں میڑ ءَ بلوچانی نشانگ کنگ بلوچ چکچینی بیمناکیں دیمے – زانشجاھاں بگر تاں دری ڈیھاں بلوچ ھچ جاہ ءَ پھریز نہ انت بلوچ راج ءَ گوں دستبندی انت کہ اے چکچینی ءِ بگیری ءَ نوں ھاموش مہ بیت ءُ مھکمیں وڑے ءَ زھرشانی ءِ راہ ءَ گچین بہ کنت –