تربت: مھلوک لوٹانی ھمراھی ءَ ایف سی ءَ چہ بلوچستان ءَ درکن ایں – مولانا ھدایت الرحمان

مروچی پنچ شمبے ءِ روچ ءَ حق دو تحریک ءِ سرکماش ملا ھدایت الرحمان ءَ پنجگور ءَ چہ پد کیچ تربت ءَ سربوتگ کہ اود ءَ مھلوک ءَ مزنیں کچے ءَ وش اتک کُتگ –

ھق دو تحریک بلوچستان ءِ چیردستی ءَ تربت ءِ مُچی ءَ تران کنان ءَ حق دو تحریک ءِ سرکماش ملا ھدایت الرحمان ءَ گوشتگ کہ نوزدہ اگست ءَ سربندن چہ بندات بوتگیں اے زرمبشت گڈی سیاسی جنگ ءَ تاں برجاہ بیت انت –

آئی ءَ گوشتگ کہ پانزدہ نومبر ءَ بلوچستان ءِ سرکار ءِ گوم ءَ بوتگیں نبشتھی مسام ءَ پد سِی ءُ دو روچ ءِ ننداک ھلاس کُتگ ، ایف سی یک فورسے نہ انت بلکیں پہ لٹ مار ءَ اتکگ راج ءَ لوٹ ایت وتی تہ ءِ تُرس ءَ ھلاس بہ کن اَنت ءُ وتی توار ءَ چست بہ کن اَنت –

آئی ءَ گوشتگ کی اے سرڈگار بلوچ ءِ مات اِنت ھچ جرنل ءُ کرنل ءِ میراس نہ انت آؤکیں وھد ءَ مکران ءِ تہ ءَ ایف سی ءِ بگیری ءَ ریفرنڈم کنگی انت دزنشان مھم ءَ چہ ایف سی ءَ اد ءَ چہ درکنگ ءِ مھم ءِ بندات کنیں – آئی ءَ گوشتگ کہ ھیات بلوچ ءِ وڑیں ورنایے کہ روچ ء رھمان تیرآماچ کنگ ءُ کُشگ بیت اِنت ءُ پد ءَ گُش انت ردی ءَ بوتگ اگاں اے وڑیں ردی ءِ ما بہ کنیں مار ءَ پھل کنگ بہ ایں – کلبھوشن وڑیناں ھما شرپ کہ دیگ بیت انت اگاں بلوچ ورنایاں دیگ بہ بیت گڑا چشیں نوبت ءِ نہ اتکگ ات، کلبھوشن ءِ رکینگ ءَ کانودی ترمیم کنگ بوگ ءَ انت –

آئی ءِ گوشگ ات کہ کیچ نادراھجاہ ءَ یک پیناڈولے دست نہ کپ ایت بلے کریسٹال ءُ شیشہ ارزانی ءَ دست کپ انت ما کہ گپ جنیں گڑا گش اَنت اے ملک دژمن ءُ گدار انت ما ملک دژمن نہ اِنت بلکیں ھک لوٹیں ھچ جرنل ءُ کرنل ءِ بادشاھی ءَ نہ لوٹیں – پٹرول ڈیزل ءُ روگن گیرکانودی انت بلے شیشہ کریسٹال ءِ کاروبار جائز انت، بارڈر ءَ درگت ءَ ھمینچو کہ کمیٹی جوڑ کنگ بوتگ آھانی سربراہ نشہ باپاری انت – مئے ورنا آوار جنگ ءُ بیگواہ کنگ بنت، جون چگل دیگ بوگ انت، ھپتاد سَے ءِ کانود ءِ رِد ءَ ھچ وڑیں ادارہ ءَ اے ھک نیست انت کہ ورنایاں آوار بہ جن اَنت ءُ بیگواہ بہ کن اَنت ھر کسے ءَ کہ گناھے کُتگ آمیدگس ءَ آرگ بہ بیت – سی پیک ءِ درگت ءَ ما اشکتگ گل بوتگیں کہ نوں شیر ءُ بینگے جوہ تچ ایت، وشھالی کیت روزگار بیت بلے بلوچستان ءِ ھک ءَ بس پانگس ءُ بنجل اتکگ انت – ڈاکٹر ماسٹر بدل ءَ سلاہ بندین پوجی دیگ بوتگ، پانگس ءُ بنجلاں مئے کم شرپی کنگ بیت اِنت ایشی ءِ بگیری ءَ مار ءَ درساں یکجاھ بوگ ءُ جُھد کنگی انت بلوچستان ھچ جرنل یا پوجی کرنل، لینڈ مافیا، ڈرگ مافیا، سردار ءُ نواب ءُ جاگیر نہ انت بلکیں بلوچ راج ءِ سرڈگار انت ڈرگ مافیا ادارھاں چہ گیش تاکتور تر اِنت –

آئی ءِ گوشگ ات کہ ھما شھر ءَ ساپ کن انت آھانی پگار بند کنگ انت اگاں ڈی سی کمشنر یا دگہ اپیسر ءَ پگار بند بیت گڑا چی بیت پاکستان ءَ چیف جسٹس یا سپریم کورٹ جج ریٹائر بنت اھانی ماھانی پنشن دہ لک انت اگاں کور کمانڈر ءِ ریٹائر بیت سد فیکٹریانی واجہ بیت بلے مئے میونسپل کارپورشن ءِ کاردار ءِ پگار شش ھزار انت او آھاں ھمے ششیں ھزار ھم شش ماھاں دیگ نہ بوگ ءَ انت میونسپل کمیٹی ءِ پگار ءِ جیڑہ اگاں ھلاس کنگ نہ بوت گڑا حق دو تحریک چارٹر ءِ بھرے بیت اِنت –

آئی ءِ گوشگ ات کہ چیک پوسٹانی ھلاسی ٹرالر مافیا ءُ بارڈر مافیا ھلاسی تاں تحریک برجاہ انت – نشہ ءِ بگیری ءَ تربت سول سوسائٹی پلامرزی ءَ کنیں ءُ بیست ءُ پنچ مارچ ءَ ھوار بئیں نشہ ءِ بگیری ءَ اگاں کانود پروشگی بہ بنت پروشگ ءَ آسر ءَ نہ کنیں، نشہ باپاری کنوکانی گِساں مانداریں اگان اشی ءِ تہ ءَ مئے جان بہ روت ما ساڑی اِنت –

مچی ءَ تران کنان ءَ راج دوستیں رھشون حسین واڈیلہ ءِ گوشگ ات کہ بلوچانی درد ءُ دوران ابید دگہ ھچ پش نہ کپتگ پرچاکہ بلوچ ورنا وھدیکہ گِساں چہ درکائینت گڑا واتری ءَ آھانی جون کائنت یا وَ بیگواہ بنت سراج وڑیں ورناھانی شھیدی ترس ءِ پیداک کنگ بوگ انت ترس پہ بلوچ ءَ ائیب انت ءُ مزھب ءِ تہ ءَ جرم ءُ گناھے، بلوچ جرم ءَ چہ ھچبر نہ ترس ایت –

آئی ءِ گوشگ ات کہ بازارانی تہ ءَ ایف سی ءِ چوکی ءُ پانگس انگت ھست انت چوش کہ مئے گوم ءَ مسام کنگ بوتگ کہ اے وڑیں درسیں پانگس ھلاس کنگ بنت، ناسر آباد ءَ بمب تراک ءَ پد سرجمیں بازار بند کنگ بوتگ چوش کہ لاھور ءَ مشرف سر ءَ بمب تراک بوتگ –

آئی ءَ گوشتگ کہ بیگواھیں مردم سی ٹی ڈی ءِ دست ءَ دروگیں میڑ ءِ نام ءَ شھید کنگ بوگ ءَ انت ھوشاپ ءَ چار زھگ آوار جنگ بوتگ ءُ آھانی سر ءَ پرکوٹک وئیلے الزام جنگ بوتگ کہ کھول ءَ ھم رد کتگ، بارڈر ٹوکن سسٹم کنگ بوتگ مردم زلیل کنگ بوگ ءَ انت – حق دو تحریک بلوچ ءِ ننگ ءُ ناموس ءِ نگھپان انت – لھتے کم شرپیں مردم الزام جنگ ءَ انت بلے آ بزدل انت مئے سوب ءَ آھانی تہ ءَ کمو جرت پاد اتکگ – گومازی ءَ یک بلوچے ءِ گِس ءِ سر ءَ کبزہ کنگ ءُ ایف سی ءَ چوکی جوڑ کتگ – کمشنر مکران ءَ گوشگ بیت کہ اے کبزہ گیری ءَ ھلاس کن ایت، حق دو تحریک ءَ بلوچ ءِ تحریک دوبر زندگ کتگ –

آئی ءِ گوشگ ات کہ یک لیڈرے بٹاک جنگ ءَ انت کہ جام کمال ءِ سیٹ پچگرگ ءِ سوب ءَ گون انت بلے قدوس ءِ آرگ ءِ گناہ ءَ گون نہ ایں – اھاں شرم بئیت ریکوڈک ءِ دزی ءَ اے دراہ ھوار انت – ریکوڈک بلوچ ءِ مڈی انت اسمبلی شست ءُ پنچ ھر نشتگ اگاں آھانی تہ ءَ ھپس ءِ ھوار گڑا دیم ءَ بئیت بہ گوش ایت آ ھپس انت یا ھر – سھراں سر ریچیں سرڈگار ءِ واھندانی پاداں چمپل نیست دولمبر اسمبلی ءِ باسکانی سوب ءَ بلوچ زلیل ءُ وار انت – اے بنجلانی تہ ءَ مرگا کنگ بنت شش ماھ انت کہ بلدیہ ءِ کارداراں پگار دئیگ بوھگ ءَ نہ انت کہ سر ءَ سر زلمے – وزیرانی ھیش عیاشی ءَ بجٹ ھست بلے ھما کہ بازاراں ساپ کنت آ چہ پگار دیگ نہ بیت –

مچی ءَ سول سوسائٹی ءِ کنوینر گلزار دوست ءَ جار جتگ گوشتگ کہ تربت سول سوسائٹی بیست ءُ پنچ مارچ ءَ نشہ باپاری ءِ بگیری ءَ تربت ءَ چہ پیادگ پند جنت ءُ شال رؤت ءُ پد ءَ ھمود ءَ ریڈ زون ءَ نندانک جنیں، آئی ءِ گوشگ ات کہ منشیات ءُ ٹرالنگ مافیا ءُ بارڈر ءِ بگیری ءَ مار ءَ پاٹی بازی ءَ چہ گیشتر بلوچ بوگ ءُ توار چست کنگی انت – پرچاکہ اے مردم بلوچ دژمن انت ءُ چریشاں بلوچ ءِ سرجمیں پدریچ ءُ مڈی تباہ بوگ ءَ انت –

آئی ءِ گوشگ ات کہ ایرانی بارڈر ءَ مار ءَ بازیں دھک ءِ چہ سیادی ھست ھما وھد ءَ کہ ادا سیمسر ءُ.ھچ ملک نہ بوتگ ھما وھد ءَ بلوچ ایران ءِ گوم ءَ سیادی بوتگ ءُ کار بار کتگ – آئی ءَ گوشتگ کہ بلوچستان ءَ بلوچ ورناھانی آوارجنی ءُ پد ءَ آھانی زانگولیں جونانی دست کپگ ءَ پد نوں سی ٹی ڈی ءِ نام ءَ آھانی کوش ھمک روچی کار ءِ جوڑ بوتگ – بلوچ راج ءَ ریاست ءِ زلم زوراکی ءُ رستری ءِ بگیری ءَ یکجاہ بوھگ ءُ توار چست کنگی انت وتی سرڈگار پھازگی انت اگاں ناں تاکت ور بلوچ راج ءَ نیست ءُ نابود کن انت –