بلوچ نیشنل موومنٹ سیکریٹری جنرل ڈاکٹر مراد بلوچ ءَ وتی درشان تہ ءَ گْوشتگ کہ پاکستانی پوج ءَ مشکے گجلی میتگ ءِ سرجمیں مردمانی لوگانی لُٹ ءُ پُل کنگ ءَ پد مانداشتگ اَنت- اے مردم گوستگیں سال ستمبر ءِ ماہ ءَ پاکستانی پوج ءَ زورانسری لڑ ءُ بار ءِ نشانگ کتگ اَنت- اشانی تہ ءَ گیشتر جیبری ءَ پاکستانی پوج ءَ بُنجاھی بُنجل ءِ کش ءُ گور یک پچیں بُنجلے ءَ نندانگ لاچار کتگ اَنت اے مردم تنی وھدے بُنجل ءِ نزیک ءَ کُڈکاں زند گوازینگ ءَ اَنت-
آئی ءَ گْوشتگ کہ گجلی ءَ یک سد ھپتاد ءَ گیش لوگ بوتگ اَنت- زورانسری لڑ ءُ بار کنگ ءَ پد اے مردمانی لوگ ، مال ءُ دلوتانی واڑ ، گلّھاں ھوار دگہ اژدری ئیں چیز پش کپتگ اَنت- اے مردم اود ءَ چہ دراھگ ءَ پد پاکستانی پوج ءَ اشانی لوگ یک مزنیں بُنجلے ءَ مٹاتگ اَنت – دو روچ ءَ ساری پاکستانی پوج ءَ اے بُنجل ءَ ھالیگ کتگ – بلے دراھگ ءَ ساری یک سد ءُ ھپتاد ءَ گیش مردمانی لوگانی مال ءُ مڈی پُلیتگ اَنت ءُ سرجمیں لوگ مانداشتگ اَنت- بلوچستان ءَ چُشیں بازیں مسال ھست اَنت – اشی ءَ چہ پاکستانی پوج ءِ رستری ءُ بے رھمی شریں وڑے ءَ زانگ بیت-
ڈاکٹر مراد بلوچ ءَ گْوشتگ کہ اے مردمانی کار ءُ بار تھنا ھوری آپاں چہ کشت ءُ کشاری ءُ گلّہ بوتگ اَنت- نو اشاں چہ سرجمیں کار ءُ بار پچ گپتگ ءُ پوج ءَ آ بندیگی کتگ اَنت- اے وڑ اشاں سرجمیں زند ءَ پوج ءِ بُنجل ءِ نزیک گور ءُ وتی بُنکی زمیناں چہ دور بوگ ءَ لاچار کنگ ءَ اِنت ئے-