دمگی میرانی سھارگ ءِ نندگ ءِ بدل ءَ بیگواھیں مردمانی کھول وتی رپورٹاں نبشتہ بہ کنائین انت – سمی دین

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون سمی دین بلوچ ءَ رسانکدراں وتی شنگ کرتگیں درشان ءِ تہ ءَ گوشتگ بیگواھیں مردمانی کھول دمگی میرانی سھارگ ءَ نند انت ءُ وتی کیساں کانودی یکجاہ نہ کنائین انت چریشی ءِ سبب ءَ کانودی ھوالہ ءَ کیس جنجال بیت اِنت-

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ جنرل سیکٹری سمی دین بلوچ ءِ گوشگ اِنت کہ بیگواھیں مردمانی کھول دمگی میرانی سھارگ ءَ وتی دوستیگیں مردمانی زند ءَ چد ءُ گیشتر ھترہ ءِ تہ ءَ مہ کن انت شمے ھچ نگوشگ ءَ شمارا زانگولیں جون دست کپ اَنت –

سمی دین ءَ گوشتگ کہ ما یکرندے پد ءَ بیگواھیں مردمانی کھولاں چہ لوٹ کنیں کہ بیگواھیں مردمانی کھول وتی دوستیگیں مردمانی رپورٹ ءَ وائس فار بلوچ مسنگ پرسنز ءِ گور ءَ نبشتہ بہ کنائین انت –

سمی دین ءَ دیمتر ءَ گوشتگ کہ بیگواھیں مردمانی کھولانی نیمگ ءَ چہ کیسانی یکجاہ کنگ ءُ گل ءَ درسیں ھال ءَ سرپد کنگ ءَ پد وی بی ایم پی بیگواھیں مردمانی کیس ءَ کانودی دیم ءَ بارت –

وی بی ایم پی ءِ رھشون ءِ درشان برتانیہ نشریاتی ادارہ ءِ اے رپورٹ ءِ پژدر ءَ داتگ کہ پیسر ءَ یک مردمے ءَ پاکستانی پوج ءِ دست ءَ زورانسری اوار جنی ءَ پد آئی ءِ زانگولیں جون چگل دیگ بوتگ –

برتانیہ ءِ نشریاتی ادارہ ءِ گوم ءَ تران کنان ءَ حاجی ناسر بلوچ ءَ گوشتگ کہ یک جولائی سال دوھزار ءُ نوزدہ ءِ شپ ءَ کہ آ وتی گِس ءِ دیم ءَ وپتگ بوتگ گڑا اناگہ ءَ گیٹ کسے ٹُک اِتگ بوتگ من دروازگ پچ کتگ چارتگ دیستگ سیکورٹی ءِ کارمند ءُ لس مردمی پوشاک گوریں کارمند ڈن ءَ اوشتوک انت –

حاجی ناسر بلوچ ءَ بھتام جتگ گوشتگ کہ آئی ءِ زھگ تربت ءَ بندیگ بوتگ پد ءَ رند ءَ آئی ءِ جون رودراتکی بلوچستان ءَ چہ روکپتی بلوچستان برگ ءُ دور دیگ بوتگ –

حاجی ناسر ءَ گوشتگ کہ اے وئیل ءَ پد وتی چُک ءِ زورانسری آوارجنی ءِ بگیری ءَ ارزی نبشتہ نہ کنائینتگ – ایشی ءِ آئی ءَ دو سبب گوشتگ یکے ایش کہ آئی ءَ ترس بوتگ کہ زنداناں آئی ءِ چُک تاوان دیگ مہ بیت دومی ھمے کہ سیکورٹی کارمندانی نیمگ ءَ ھمے باور کنائینگ بوتگ کہ جست پد کنگ ءَ پد اسد یل کنگ بیت ات انت –

حاجی ناسر ءِ رِد ءَ آ کیچ ءَ سیادی داروکیں سوبائی ءُ وپاک ءِ وزیراں ھم دچار کپتگ ءُ وتی چُک ءِ یل.کنگ ءِ لوٹ کتگ “آ درساں من ءَ تسلی داتگ کہ منی چک یل کنگ بیت اِت اِنت –

کیچ ءِ ڈپٹی کمشنر حسین جان بلوچ ءَ بی بی سی ءِ گوم ءَ تران کنان ءَ گوشتگ اسد ناسر ءَ ھوار آ دگہ دوئیں مردمانی بیرانی کیچ ءَ ناں بلکیں ایران ءَ بوتگ – آئی ءَ گوشتگ ایران ءِ واکداراں آھانی جون پاکستان ءِ دست ءَ داتگ انت کہ آھانی ڈاکومینٹیشن ھم بوتگ اے گپ زاھر انت کہ آ کیچ ءَ جنگ نہ بوتگ انت بلکیں ایران ءَ جنگ بوتگ انت –

سمی دین بلوچ ءَ کیچ ءِ ڈپٹی کمشنر ءِ اے درشان ءِ پژدر ءَ کھولاں چہ لوٹ کتگ گوشتگ کہ آ وتی دوستیگیں مردمانی درگت ءَ ارزی ءَ نبشتہ بہ کنائین انت تانکہ کانودی ھوالہ ءَ بیگواھیں مردمانی کیس آمیدگساں پیش کنگ بہ بنت –

زانگ بہ بیت گوست ھم سرکار ءُ دگہ واکداراں ھمے گوشتگ کہ بیگواھیں مردم دری ملکاں نندوک انت بلے پد ءَ ھم بیگواھیں مردمانی کھول ءُ وائس پار بلوچ مسنگ پرسنز ءَ اے بھتام رد کرتگ انت –