تالبان ءِ دری کارانی وزیر امیر خان متقی ءَ وفد ءَ ھوار قومی مزاحمتی محاذ ءِ سروک احمد مسعود ءُ پیسرگیں وزیر ءُ پرگینگی گورنر اسماعیل خان ءَ ایران ءِ راجدانی تھران ءَ نیاد کُتگ۔
اوگان تالبان ءَ اے گپ راست کنان ءَ گُشتگ آیانی بنجاھی رھشوناں دو شمبے ءِ روچ ءَ ھمسایگیں مُلک ایران ءَ اوگان حزب بگیر ءَ سیادی داروکیں وتگڑیں درانڈیھیں رھشوناں گوں گپ تران کُتگ ءُ آیانی سرءَ زور پر داتگ کہ آ نیکراھی گروپ ءِ واکداری ءِ ھلاپ ءَ گھگیری ءَ بند بہ کنت ءُ اگں آ ڈیھہ ءَ پدءَ واتر بہ باں گُڑءَ آیانی پھازگی ءِ باوری دیگ بیت۔
دوھیں نیمگ ءَ بیتگیں گپ ترانانی اے اولی اھولانی درگتءَ ھال دیان ءَ، تالبانی جارکش بلال کریمہ ءَ گُشتگ کہ متقی ءَ تالبانی ھمے باوری ءِ سرءَ گام زرتگ کہ اوگانانی باندات ءَ شر کنگ ءِ ھاترءَ جھد کنگ ءَ اِنت، چریشی ءَ پد کجام ھم گھگیری ءِ لوٹ پشت نہ کپ اِیت۔
تالبانی دری کارانی وزیر امیر خان متقی ءَ وتی وفد ءِ مستری کُتگ کہ اِشانی نیاد گوں قومی مزاحمتی محاذ ءِ سروک احمد مسعود ءَ یک گوستگیں اوگان وزیر ءُ پرگینگی گورنر، اسماعیل خان ءَ گوں کُتگ۔
شنگ کُتگیں تامر بند ءِ تہءَ متقی ءَ وت ھم ھمے نیاد ءِ ھال راست کُتگ، کہ تالبان ءَ ایرانی اگدہ دارانی گومءَ دو روچی ھواریں نیاد ءِ ھلاس بیگ ءِ پدءَ شنگ کُتگ۔
متقی ءِ گپانی ردءَ۔ “ھئو ما ایرانءَ کماندار اسماعیل خان ءُ احمد مسعود ءَ ابید دگہ ھم جھمنندیں اوگاناں گوں نشتگ اِنت۔
آئی ءَ گیشتر گُشتگ “ما درستاں باور کناینتگ کہ آ پدا اَتک ءُ آجوہ ءُ پھازگی ءِ تہءَ اوگانستان ءَ زند گوازینت کن اَنت۔ مئے (تالبانی) ھچ واھگ نیست کہ پہ کسی ھاترءَ پھازگی یا دگہ کجام جیڑہ ودی بہ کن ایں۔”
زانگ بہ بیت کہ میان استمان ءَ تالبانی سرءَ زور پر داتگ کہ آ راجی سیاسی ھوارکاری ءَ جاہ بہ دی اَنت ءُ یک ھواریں سرکار ءِ اڈ بہ دی اَنت کہ آ درستیں اوگانانی مردمی اگبالانی رکینگ ءَ باوری بہ کن اَنت، چریشی ءَ پد جھان کابل ءِ سرءَ واکداری ءَ جائز بیگ ءِ درگت ءَ جیڑاِت کنت۔
دومی نیمگ ءَ ایران ءِ دری کارانی وزارت ءَ دو شمبے ءِ روچ ءَ شنگ کُتگیں درشان ءِ تہءَ گُشتگ کہ تالبان واکداراں گوں نیاد ءِ مول اے نہ اِنت کہ ایران سرکاری ردءَ کابل سرکار ءَ من اِت اِنت۔
ایرانی رسانکدراں ایرانی دری کارانی وزیر حسین امیر عبدالہیان ءِ درگت ءَ گُشتگ آئی ءَ اوگان مھلوک ءِ زرانی دارگ جنگ ءِ سرءَ امریکہ ایراد گپتگ ءُ لوٹ کُتگ کہ اے زر دیگ بہ بنت دانکہ اوگانستان ءِ آسراتی ءُ مردمی بحران ءِ جاورھالانی تہءَشری اتک کُت بہ کنت۔