رکھیہ خان ایف سی ءِ سوبیدار رحمت اللہ ءَ دزگیری ءَ پد بیگواہ کتگ – کھول

بلوچستان ءِ دمگ ھرنائی شاھرگ ءَ چہ زورانسری آوار جنگ ءُ بیگواہ بوتگیں رکھیہ خان ء قادر خان ءِ کھول ءَ مروچی سَے شمبے ءِ روچ ءَ شال پریس کلب ءِ پریس کانفرنس کتگ رکھیہ ءِ یل کنگ ءِ لوٹ کتگ –

اے وھد ءَ وائس فار بلوچ مسنگ پرسنز ءِ سرکماش نصراللہ بلوچ ھم ساڑی بوتگ-

پریس کانفرنس کنان ءَ رکھیہ خان ءِ کھول ءِ گوشگ ات کہ رکھیہ خان ھشت جون سال دوھزار ءُ نوزدہ ءَ شاھرگ ءِ دمگ ھرنائی ءَ ایف سی ءِ سوبیدار رحمت اللہ ءُ دگہ سرکاری کارمنداں کھول ءِ دیم ءَ چہ زورانسری آوار جتگ ءُ بیگواہ کتگ –

آئی ءِ گوشگ ات کہ رکھیہ خان ءِ درگت ءَ مار ءَ ھچ وڑیں سرپدی دیگ بوگ ءَ نہ انت چریشی ءَ سبب ءَ کھول ماژگی زوراکی ءِ آماچ انت –

کھول ءِ رِد ءَ رکھیہ خان ءِ زورانسری آوار جنی ءَ ھشت ماہ ءَ پد ایف سی ءِ سوبیدار رحمت اللہ ءُ دگہ سرکاری کارمنداں رکھیہ ءِ برات لقمان ھم شاھرگ بازار ءَ چہ زورانسری آوار جتگ ءُ لقمان ھمراھی ءَ گِس ءَ اتکگ انت گِس ءِ پٹ ءُ پول کتگ ءُ پد ءَ لقمان ءِ ھم گون وت برتگ بلے پد ءَ یانزدہ ماہ ءَ پد لقمان ءِ یل داتگ اش –

کھول ءَ چہ سرکار، آمیدگس ءُ ملکی ادارھانی سربراھاں چہ لوٹ کتگ کہ رکھیہ ءِ یل کنائینگ ءَ وتی کرد ءَ پیلو بہ کن انت –

ھمے درگت ءَ وائس فار بلوچ مسنگ پرسنز ءِ سرکماش نصراللہ بلوچ ءَ گوشتگ کہ رکھیہ خان کھول ءَ وھدیکہ آ دچار کپتگ گڑا آھاں ھمے گوشتگ کہ ایف سی ءِ صوبیدار رحمت اللہ ءُ دگہ سرکاری کارمنداں مدامی آھانی گِسانی سر ءَ بیڑ برتگ ءُ پٹ ءُ پول ءَ ھوار بیھار داتگ اَنت کہ گِساں مانداریں –

نصراللہ بلوچ ءِ گوشگ ات کہ اے پدر بوتگ کہ ایف سی ءِ کارمند رحمت اللہ رکھیہ ءِ آوار جنی ءَ دست مان انت ھمے ھاتر ءَ ما برزی ھاکماں چہ لوٹ کنیں اگاں رکھیہ ءِ سر ءَ الزامے ھست آمیدگس ءَ آرگ بہ بیت اگاں بے کسور انت گڑا زوت یل کنگ بہ بیت –

آئی ءِ گوشگ ات کہ رکھیہ ءِ لوگی، زھگ ءُ مات پت آئی ءِ زورانسری آوار جنی ءَ چہ سک باز پریشان انت –