روکپتی بلوچستان ءَ چِست بیتگیں موسمی ھوراں روکپتی بلوچستان ءَ ھوار رودراتکی بلوچستان ءِ ھم بازیں دمگ ھاس مکران ءَ بازیں جاھاں تاوان باری کُتگ۔ گُڈی اھوالانی ردءَ رودراتکی بلوچستان ءِ دمگ کیچ، گوادر ءُ پنجگور ءَ ھورانی یکشلی برجاہ اَنت۔
گوستگیں شپ ءَ 08:30 ءَ بندات بیتگیں ھور تُربت ءَ گوں گرند ءُ گروکاں داں انگت برجاہ اِنت، بازار چہ آپاں پُر اَنت۔
دمگی واکداراں ایمرجنسی الرٹ ءِ جار کُتگ ءُ مردماں چہ دزبندی کنگ بیتگ کہ وتی لوگانی تہ ءَ بہ بنت، ٹرانسپورٹر ھم گُشگ بیتگ اَنت کہ وتی گاڑیاں مہ کش اَنت۔
دومی نیمگ ءَ دشت ءَ ھم ھور ءَ تاوان باری کُتگ کہ اود ءَ دگانی سانمند بیگ ءِ سوب ءَ دشت بلنگور ءِ دمگی ھیڈکوارٹر تُربت ءَ گوں زمینی رھوت سستگ۔ کاشاپ ءُ کش ءُ کِراں ھم تیزیں ھورانی سبب ءَ ھار ءِ تُرس اِنت۔
تُربت آسکانی بازار ءَ ترندیں ھورانی سوب ءَ آپ لوگاں پترتگ ءُ مردم ترندیں سارتی ءَ آزمان ءِ چیرءَ نندگ ءَ لاچار اَنت ۔
گوادر ءِ دمگاں ھم ترندیں ھورانی سبب ءَ دگ دریا آنی دروشم ءَ دیگ ءَ اَنت، چریشی ھمک روچی زند سرجم ءَ اوشت آماچ بیتگ۔
اِشی ءَ ابید موسمیات ءِ واکدارانی رد ءَ آیوکیں بیست چار ساھتانی تہ ءَ شال، ژوب، بارکھان ،زیارت، پشین، چمن، قلعہ عبداللہ، قلعہ سیف اللہ ،دالبندین چاغی، تربت، نوشکی، خاران، پنجگور، گوادر ،ہرنائ ءُ لسبیلہ ءَ ترندیں گوات ءُ گرند ءُ گُروگاں ھوار ھور ءُ برف کپگ ءِ گمان ھست اِنت۔
روکپتی بلوچستان ءَ چہ ھال اِنت کہ کنرک ءَ مھلوک ھار ءِ سوب ءَ ھور ءِ آپ لوگانی ءُ کنرک نادراھجاہ ءَ ھم سربیتگ ۔
اِشی ءَ ابید روکپتی بلوچستان ءِ بازیں دمگاں ھوراں پد موسم وت بیتگ کہ اود ءَ مردم لوگ ءَ در اتکگ ءُ تر ءُ تاب کنگ ءَ اَنت۔