پنجگور: چیریں ادارھانی نام ءَ گرگ ءُ مارا بیھار دیگ ءَ اَنت- حاجی لیاقت

پنجگور ءِ دمگ پروم ءَ پریس کانفرنس کنان ءَ حاجی لیاقت ءَ وتی وارسانی ھمراھی ءَ تران کنان ءَ گوشتگ کہ بیست دسمبر ءِ شپ ءَ منی زمیاد گاڑی چتکان ءَ لوگ ءِ دپ ءَ ایر بیتگ ءُ لھتے مردماں اتکگ ءُ منی مردم جتگ اَنت ءُ گاڑی گون وت برتگ –

اے گپ آئی ءَ پنجگور پروم ءَ حاجی عبید، غلام سرور، طارق، حاجی کریم جان حاجی یاسین، نثار اھمد، حاجی اختر، حاجی اسلام، شاکر علی، علی جان، عبدالباری ءُ شعیب ءِ ھمراھی ءَ بازیں مردمانی مُچے ءِ میان ءَ تران کنان ءَ گوشتگ اَنت –

آئی ءَ گُشتگ منی گاڑی ءِ برگ ءَ پد منی گاڑی تسپ ءَ خدارحیم نامیں مردمے ءِ گیٹ ءِ تہ ءَ دزکپتگ اود ءَ ما گاڑی کش اِتگ ءُ برتگ چریشی ءَ پد گوستگیں شپ ءَ مھیم نامیں مردمے ءَ من ءَ پون کرتگ ءُ گوشتگ من ادارھانی مردماں بلے تو خدارحیم ءَ تنگ مہ کن ءُ ترا گاڑی دزکپتگ اگاں تو خدارحیم تنگ کت گڑا وتی تیاری ءَ بہ کن –

آئی ءَ گُشتگ گوستگیں شپ ءَ مھیم ءَ گوں وتی سلاہ بندیں مردمانی ھمراھی ءَ منی لوگ ءِ سر ءَ تیرگواری کرتگ ءُ منی گیٹ ءُ دگہ چیز تاوان داتگ اَنت ءُ چریشی ءَ پد ما پولیس ءِ گور ءَ ایف آئی آر ھم نبشتگ کنائینتگ بلے انگت ءَ پولیس ءَ ھچ نہ کتگ –

آئی ءَ گُشتگ مھیم اگاں ادارھانی مردم اِنت گڑا لس شھریاں پرچا ترس آماچ کنت ءُ ڈزی ءُ ڈنگیاں پرچا دزمانجن اِنت باید ادارہ چوشیں مردم مہ دار اَنت کہ آ لس مھلوک ءِ ساہ ءَ بہ گر اَنت –

آئی ءُ گُشتگ اگاں منی کھول ءُ دگہ مردمے ءَ تاوان بیت آئی ءِ زمہ وار مھیم اِنت ءُ آئی ءِ ھمراہ اَنت ءُ آئی ءَ گُشتگ اگاں پولیس ءَ من ءَ ھک نہ دات گڑا من گیش زھرشانی کن آں –

آئی ءَ گُشتگ اد ءَ دُزی ءُ ڈنگی ءَ ھوار چاگردی سلکاریاں اے مردم ھوار اَنت آیاں گشتگ سرکار ءَ اے مردم ھمے واستا داشتگ اَنت برو اَنت بلوچ دوداں لگتمال بہ کن اَنت ءُ چادر ءُ چار دیواری ءَ پامال بہ کن اَنت –

آئی ءَ لوٹ کتگ کہ ما لس شھری ءُ امنیں مردم اِنت باید ما پھریزگ بہ بہ ایں اے وھد ءَ بی این پی ءِ رھشون نزیر اھمد ھم جاڑیگ بیتگ ءُ آئی ءَ اے وئیل ایر جتگ ءُ لوٹ کتگ جرمکار دزگیر کنگ بہ بنت –

زانگ بہ بیت پنجگور ءَ ھوار بلوچستان ءِ دگہ دمگاں ھم لس سلاہ بندیں مردم لس مھلوک ءَ تنگ کنگ ءَ اَنت ءُ بلوچستان ءَ راجدوستیں پاٹیانی گوشگ اِنت اے مردم سرکار ءَ سلاہ بند کتگ اَنت آ گیشتر ڈیتھ اسکواڈ ءِ نام ءَ زانگ بنت ءُ بلوچستان ءِ بازیں جاھاں چاگردی سلکارہ ءُ دُزی ءُ ڈنگیاں دزمانجن اَنت –