دی بلوچستان پوسٹ اھوال پتر ءَ سربیتگیں اھوالانی ردءَ بلوچستان ءِ دمگ پشین ءِ ھنکین سرانان ءَ چہ چاتے ءَ واکداراں یک گونی ءَ بندیں جون ءِ دزکپتگ۔
اھوالانی رد ءَ دو شمبے ءِ روچ ءَ ھندی تحصیلدار ءُ لیویز ءَ سرانان ءَ یک ناشناسیں مردمے ءِ جون در کپگے اھوال رستگ کہ پدءَ واکداراں سول ھسپتال پشین ءَ سرکُتگ۔
واکدارانی رد ءَ جون گونی ءَ مان کنگ ساداں گوں بستگ ءُ چاتءَ دور دیگ بیتگ اَت بلے داں انگت جون ءِ پجار کنگ نہ بیتگ کہ بنداتی قانودی کاراں چہ پد گیشتر پَٹ ءُ پول ءِ ھاترءَ شال ءَ دیم دیگ بیتگ۔
زانگ بہ بیت کہ چریشی ءَ پیسر ھم بلوچستان ءِ جتاھیں شھراں جون دزکپتگ اَنت کہ پجارگ نہ بیگ ءِ سوب ءَ بے وارثی ءَ کل کنگ بیتگ اَنت وھدیکہ گوستگیں ماہ ءَ ھم چار جون دزکپتگ اَت کہ اشانی پجار کنگ نہ بیتگ اَنت۔
بلوچستان ءِ جتاھیں ھند ءُ دمگاں چہ جون درکپگ یکشل ءَ برجاہ اِنت، درکپوکیں گیشتریں جونانی زانگولی ءِ سوب ءَ پجار کنگ نہ بیت اِنت وھدیکہ بازیں جونانی پجار بیگواھی مردمانی ھساب ءَ بیتگ۔