شال: سال ءِ بندات ءَ یک روچی “کتب میلھے برجم دارگ بیتگ

بلوچستان ءِ بنجاھی شھر شال ءَ نوکیں سال ءِ وش آھت ءَ یک کتاب میلھے برجم دارگ بیتگ –

پڑو کچاری، وائی سی ایس ایف ءُ آن لائن نشت ءِ نیمگ ءَ شال ءِ دمگ منیر احمد چوک سریاب ےَ یک روچی ئیں کتاب میلہ برجم دارگ بیتگ کہ چریشی ءَ بازیں کچے ءَ شھری اتکگ ءُ کتاب اش بھا گپتگ اَنت-

اے وھد ءَ گوستگیں سینیٹر ءُ کتاب دوسگ موومنٹ ءِ بنکی سروک نوابزادہ ھاجی لشکری رئیسانی، گوستگیں وفاقی وزیر ہمایوں عزیز کرد، کماشیں راجدوست رھشون ڈاکٹر حئی بلوچ ءُ بلوچستان نیشنل پاٹی ءِ نوکیں دمگی سروک غلام نبی مری ءَ اسٹال ءِ تر ءُ تاب کرتگ ءُ ورنایانی جھد ءِ ستاشانی کرتگ –

اے وھد ءَ گوستگیں سینیٹر ھاجی لشکری رئیسانی ءَ رسانکدراں گوں تران کنان ءَ گوشتگ کہ سریاب شال ءِ ورنایاں کتاب میلے ایر کرتگ ءُ اے باور کنائینتگ کہ بلوچستان ءُ بلوچ ورنا علم ءُ ادب، دود ءُ دودمان ءِ برز کنگ ءَ جھد ءَ اَنت – کتاب دوستی زندگ اِنت-

آئی ءَ گُشتگ اگاں مروچی بلوچستان ءَ کتاب دوستی ءِ دست دراج بوتیناں گڑا مئے راجی مڈیانی لُٹ ءُ پُل ءَ کسے ءِ چم چِست نہ بیتگ اِت اَنت ءُ مئے گور ءَ جوان جوانیں مردم ھست اَنت –

آئی ءَ گُشتگ ورنایانی کرد ستا کرز ایت ءُ آیانی ستاشانی گیش کنگی اِنت ءُ دلبڈی اژدری اِنت –

اے وھد ءَ ورنایاں گُشتگ کہ نوکیں سال ءِ بندات ءَ ابید آس شانی ءُ شاتمانی ءَ جوانتریں چیز ایش اِنت اے کلوہ سر کنگی اِنت اے راہ اِنت مئے رژنائیں باندات دیم ءَ شت کنت –

گڈسر ءَ لالا رھمت بنگلزئی ءَ ھاجی لشکری رئیسانی، کماشیں راجدوست رھشون ڈاکٹر حئی ءُ دگہ سیاسی مردمانی منت گپتگ اَنت-