روکپتی بلوچستان: ایرانی لشکر ءِ بیڑے ءَ سَے شھری بیران ءُ زدگ، کم چہ کم نُھ ایرانی لشکر بیران ءُ زدگ بیتگ اَنت

سیستان و بلوچستان ءِ ھند شورو ءَ ایرانی سپاہ ءِ بیڑے ءَ بلوچ زالبولے ءَ ھوار دوئیں نیمگاں دوازدہ مردم بیران ءُ زدگ بیتگ اَنت-

گوستگیں روچ ءَ ایرانی لشکر ءَ زاھدان ءِ دمگ کورین ءِ ھند شورو ءَ یک میتگے ءَ بیڑ برتگ ءُ اود ءَ دوئیں نیمگاں تیرگواری بیتگ چریشی ءَ ھردوکیں نیمگاں جانی تاوان بیتگ اَنت –

ایرانی لشکر ءَ غلام شاہ بکش ء مھراب ءِ سر ءَ بیڑ برتگ ءُ اود ءَ ھردوکیں نیمگاں تیرگواری بندات بیتگ اَنت –

تیرگواریانی میان ءَ یک زالبولے ءَ ھوار دوازدہ سالی ئیں زھگے جنگ بیتگ ءُ یک مردمے زدگ بیتگ –

ھالانی تہ ءَ گوشگ بیتگ کہ ھمے بیڑ ءَ غلام ءِ پت مھمد جان شاہ بکش ھم کشگ بیتگ –

بیڑ ایرانی لشکر ءَ غلام ءِ سر ءَ برتگ ءُ اود ءَ آئی ءَ غلام گوں ھمراھاں انگیر ءَ کرتگ ءُ چریشی ءَ تیرگواریانی درچ بندات بیتگ اَنت –

دمگی مردمانی رد ءَ اے بیڑ ءَ غلام ءُ آئی ءِ ھمراہ دراتکگ اَنت ءُ اے جنگ داں جنگل ءَ ھرچاریں نیمگاں بازیں وھدے ءَ برجاہ بیتگ ءُ دمگ ءَ ترس ءُ بیم ودی بیتگ اَنت –

ایرانی لشکر ءَ وتی درشان ءِ تہ ءَ گُشتگ کہ غلام گوں پنچ ھمراھاں جنگ ءُ زدگ بیتگ اَنت بلے لس مھلوک ءِ نیمگ ءَ اے ھال رد کنگ بیتگ ءُ غلام ءِ مرگ دروگ گوشگ بیتگ –

دمگی مردمانی رد ءَ اے جنگ ءَ ایرانی لشکر ءِ نُھ سپاھی جنگ ءُ زدگ بیتگ اَنت، زدگ بیتگیں سپاھیانی نام عبید اللہ درازئی، مھدی میر، ابولفضل بزی ءُ امیر مھمد کمالی ءِ ناماں زانگ بیتگ اَنت-

ایرانی لشکر ءِ کُشگ بیتگیں سپاھیانی نام مھدی اصغری، مھدی کوھستانی، عزیز اللہ بزی، جواد شھبازی ءُ حامد شھرکی ءِ ناماں زانگ بیتگ اَنت –

دمگی مردمانی رد ءَ اے جنگ ءُ چوپ ءَ ایرانی سپاہ ءِ دو گاڑی ھم تباہ بیتگ اَنت-

زانگ بہ بیت غلام ءِ برات ملک شاہ بکش ءَ ایرانی سالدر ۲۵ آبان ماہ ۱۴۰۰ ءَ دشت سمسور ریگان ءَ اُستان کرمان ءَ بیست ءُ چار ساھتاں ایرانی لشکر ءِ گون ءَ جنگ ءُ چوپ ءَ پد برزی بالیگانی تیرگواری ءَ بیران بیتگ اَت –