تربت: سراج صالح ءِ کوش ءَ ھواریں دو جرمکار دزگیر

گوستگیں روچاں کُشگ بیتگیں بلوچ ورنا سراج صالح ءِ کوشءَ ھواریں دو جرمکار گوستگیں شپ ءَ دزگیر کنگ بیتگ اَنت۔

سربیتگیں ھالانی رد ءَ ڈپٹی کمشنر کیچ ءِ گُشگ ءِ پد ءَ لیویز ءَ بلیدہ ءَ کُشگ بیتگیں سراج صالح ءِ کوش ءَ ھواریں دو جرمکار جھانزیب ءُ شاہ میر دزگیر کنگ بیتگ اَنت۔

گیشیں ھالانی رد ءَ گوستگیں روچاں بلیدہ ءَ کُشگ بیتگیں ورنا سراج صالح ءِ کوشکار جھانزیب ء عبدالواحد جھمنند سلو ءُ شاہ میر ء کریم بخش جھمنند میناز لیویز فورس بلیدہ تھانہ ءُ کیو آر ایف ءَ ھواریں گامگیجاں پد دزگیر کُتگ اَنت۔

ڈپٹی کمشنر کیچ حسین جان بلوچ ءَ اھوالکاراں گوں گپ کنان ءَ گُشتگ کہ اے وئیل ءَ ھواریں سیمی مردمے دزگیر کنگ ءِ ھاترءَ لیویز فورس ءُ کیو آر ایف ءَ ترندی ءَ گوں پرمان داتگ اَنت ءُ الم سیمی جرمکار ھم زیت دزگیر کنگ بیت ءُ سانمندیں کھول ءَ انساپ دیگ بیت اِنت-

زانگ بہ بیت سراج ء سالہ مھمد بیست ءُ پنچ دسمبر ءَ بلیدہ ءِ دمگ گلی ءَ جند ءِ لوگ ءَ تیر جنگ ءُ کُشگ بیتگ ءُ پد آئی ءِ کوشکاراں چاگردی رسانکجاھاں سراج ءِ کوش منّ اِتگ ءُ گُشتگ سراج ءَ پاکستان ءُ اسلام ءِ ھلاپ ءَ گپ جتگ ءُ چریشی ءَ ما سراج کُشتگ –

سراج ءِ کوش ءِ پژدر ءَ سول سوسائٹی کیچ ءَ انتزامیہ ءَ چل ءُ ھشت ادارانی مھلت داتگ کہ اگاں کوشکار دزگیر نہ بیت اَنت گڑا زھرشانیانی درچ بندات کنگ بنت –

ھمے وڑ ءَ بلوچ یکجھتی کمیٹی ءَ ھم وتی درشانی ءَ گُشتگ اَت سراج بلوچ ءِ کوش بلوچستان ءَ ورنایانی یکشلیں کوشانی درچ اَنت –

دومی نیمگ ءَ چاگردی رسانکجاھاں سراج ءِ کوشکارانی دزگیری ءُ کھول ءِ انساپ ءِ واستا کمپئن برجم دارگ بیتگ اَنت –