بلوچستان ءِ تیاب دپی شھر گوادر ءَ وتی لوٹانی منارینگ ءِ ھاترءَ برجاھیں بلوچستان حق دو تحریک ءِ نندانک مروچی 33 می روچ ءَ ھلاس کنگ بیتگ ۔
مروچی سر وزیر بلوچستان قدوس بزنجو، پرگینگی وزیر ظھور بلیدی، سید احسان شاہ ءُ ڈپٹی کمشنر گوادر ءَ نندانک جاہ ءَ اتکگ ءُ تلو ءِ سرءَ نوٹیفیکیشن مولانا ھدایت الرحمن ءَ داتگ اَنت۔
ھمے نیام ءَ ڈپٹی کمشنر ءَ نندانک ءِ مردمانی دیما من اِتگیں لوٹ ونتگ اَنت ۔
سرکار ءُ نندانک واکدارانی نیام ءَ ٹرالرنگ ءِ دارگ ءِ ھاترءَ اے گپ ءِ سر ءَ یکجاھی بیتگ کہ زر ءِ فشریز ءِ واکدار ءُ دریاوردانی ھواریں ٹیم چارگ کنت۔
نان ٹیچنگ ٹیچرز، شراب خانھانی درگت ءَ لوٹ ءِ سرءَ گامگیج زیرگ ءَ ھوار دریاوردانی ھاترءَ یک پیکج ءِ، ایکسپریس وے سانمند انی ھاترءَ مُز زیت دیگ ءِ باوری ءَ ھوار سیمسری باپار ءُ گیر المی چیک پوسٹانی درگت ءَ سرکار ءَ یک ماہ ءِ وھد ءِ لوٹ کُتگ ۔
گوں مھلوک ءَ تران کنان ءَ سروزیر قدوس بزنجو ءَ گُشتگ کہ شمے درستیں گپ منگ بیتگ اَنت ءُ ما واھگ داریں کہ چہ یک جاہ پاد کائیں ءُ لوگءَ روئیں، کہ اِشی سرءَ مھلوک ءَ مکن کُتگ۔
چہ سروزیر ءَ پد حسین واڈیلہ ءَ گُشتگ مغرب ءِ نماز ءَ پد مولانا ھدایت الرحمن گوں مھلوک ءَ تران کنت۔