بیگواھیں نودربر یل کنگ نہ بنت ایم بی بی ایس چکاس نہ بنت- بلوچستان نودربر گل

بلوچستان ءِ نودربر گلاں وتی رسانکدراں وتی شنگ کرتگیں یکجاھیں درشان ءِ تہ ءَ جار جتگ گوشتگ کہ بلوچستان ءِ شاھدربر جاہ ءَ چہ زورانسری آوار جنگ بوتگیں نودربر دانکہ یل کنگ نہ بنت گڈا شاھدربر جاہ ءِ واکدارانی چیردستی ءَ بؤوکیں ایم بی بی ایس چکاس ءِ اجازت ھم دئیگ نہ بیت انت –

بلوچستان ءِ نودربرگلاں وتی جار ءِ تہ ءَ سوبائی سرکار ءُ بلوچستان شاھدربر جاہ ءِ واکدار مکن کتگ ءُ گوشتگ انت کہ سرکاری واکداراں پانزدہ روچانی تہ ءَ نودربر سھیل ءُ فصیح بلوچ یل کرت نہ کتگ انت ءُ دومی نیمگ ءَ سرکاری مزاکراتی کمیٹی ءِ گوم ءَ بوتگیں معاہدہ پاسداری ھم گندگ بوھگ ءَ نہ انت –

بلوچستان ءِ شاھدربرجاہ ءِ نیمگ ءَ شنگ بوتگیں نوٹیفیکشن ءِ رِد ءَ چاردہ دسمبر ءَ ایم بی بی ایس ءَ آکری سال ءِ چکاس ءِ بندات کنگ بنت –

نودربر گلانی رِد ءَ شاھدربر جاہ ءِ واکدارانی نیمگ ءَ چہ زورگ بوتگیں اے پیسلہ مئے گوم ءَ بوتگیں معاھدہ ءِ بگیری ءُ بلوچستان ءِ شاھدربرجاہ ءَ ھچ وڈیں چکاسانی اجازت دئیگ نہ بیت اِنت –

زانگ بہ بیت بلوچستان شاھدربرجاہ ءَ چہ زورانسری آوار جنگ بوتگیں نودربر سھیل بلوچ ءُ فصیح بلوچ ءِ یل کنائینگ ءِ نودربر گلاں سَے ھپتگ ءَ ننداک جتگ کہ سرکاری نمائندگانی گوم ءَ مزاکرات ءَ پد ھلاس کنگ بوتگ – سرکاری نمائندگانی رِد ءَ پانزدہ روچانی تہ ءَ ھردو نودربر یل کنگ بنت ءُ دیم ءَ آرگ بنت بلے پدا ھم اے معاہدہ دومی نیمگ ءَ بلوچستان ءِ شاھدربرجاہ پانزدہ روچ ءِ واست ءَ بند کنگے جار جنگ بوتگ –

بلوچستان ءِ نودربر گلانی نیمگ ءَ شنگ بوتگیں جار ءِ تہ ءَ گوشگ بوتگ کہ چوش کہ پانزدھیں روچ ھم گوستگ انت ءُ نودربر ھم یل کنگ نبوتگ انت ءُ دومی نیمگ ءَ بلوچستان ءِ شاھدربر جاہ وتی چیردستی ءَ دگہ وانگجاھاں چکاساں کنائینگ انت گڈا ما ھمے پھمیں کہ اے وڈیں امل ءَ چہ نودربر دھوکہ دئیگ بوھگ انت

آھانی گوشگ ات کہ سرکاری مزاکراتی کمیٹی ءِ سرکماش ءَ مئے گوم ءَ بوتگیں معاھدہ رسانکدرانی دیم ءَ ھم درشان کتگ ءُ بلوچستان شاھدربرجاہ ءِ نیمگ ءَ شنگ بوتگیں نوٹیفیکیشن ھم ریکارڈ ءِ تہ ءَ ھست انت بلے اشی ءَ ابید مئے گوم.ءَ بوتگیں کرارانی پاسداری نبوھگ انت ءُ بلوچستان شاھدربرجاہ ءِ واکدار یکرندے پدا ہٹ دھرمی سر ایراتکگ-

جار ءِ تہ ءَ گوشگ بوتگ کہ شاھدربرجاہ ءِ واکدارانی ہٹدھرمی مئے گوم ءَ بوتگیں کرارانی پاسداری نہ کنگ ھچ وڈا کبول کنگ نہ بیت –

آھانی گوشگ ات کہ ھردو نودربر تنی وھدی یل کنگ نہ بوتگ انت ناکہ آ زاھر کنگ بوتگ انت ھمے واست ءَ بلوچستان شاھدربرجاہ ھچ وڈیں سرگرمی کرت نہ کنت ءُ چکاسانی درگت ءَ شنگ بوتگیں نوٹیفیکیشن کرارانی سرجمی ءَ بگیری دارگ انت –

نودربر گلاں وتی جار ءِ تہ ءَ گوشتگ کہ ما چہ سرکار ءِ نمائندگ ءُ بلوچستان شاھدربرجاہ ءِ واکداراں چہ لوٹ کنیں کہ کرارانی پاسداری ءَ بہ کن انت ءُ ھر وڈیں چکاساں بہ دار انت ءُ ایم بی بی ایس ءِ چکاسانی کنگے ھچ وڈا اجازت ءَ نہ دئیں اشی ءِ ھاتر ءَ مارا ننداک جنگ کپیت ما بی ایم سی ءِ دیم ءَ نندانک ھم جنیں ءُ زھرشانی کنیںءُ ھر وڈیں نہ وشیں وئیلانی زمہ وار سرکار ءُ بلوچستان ءشاھدربر جاہ ءِ واکدار بنت –