سرکار ءِ راہ داتگیں مردماں ھچ گامگیج نہ زرتگ زھرشانی تہ ءَ گیشی کاریں – نودربر گل

بلوچستان شاھدربر جاہ ءَ چہ زورانسری آوار جنگ ءُ بیگواہ بوتگیں نودربرانی یل کنائینگ ءُ سرکار ءِ دیم داتگیں مردمانی کرار ءِ وھد ءِ ھلاس بوھگ ءَ نودربرگلاں بلوچستان ءِ بنجاھی شھر شال ءَ یکجاھیں پریس کانفرنس ءِ کُتگ –

نودربر گلانی رھشوناں پریس کانفرنس کنان ءَ گُوشت ھمے سال ءِ یک نومبر ءَ بلوچستان ءِ شاھدبرجاہ ءَ چہ دو نودربر سہیل بلوچ ءُ فصیح بلوچ زورانسری آوار جنگ ءُ بیگواہ کنگ بوتگ انت کہ ھنگت آھانی ھچ ھال اھوال نیست – شاھدربرجاہ ءَ نودربرانی زورانسری آوار جنی ءَ چہ نودربراں زھرشانی کنان ءَ شاھدربرجاہ بند کتگ کساس سلے ھپتگ ءَ پد سرکار ءِ مزاکراتی کمیٹی ءِ گوم ءَ مزاکرات کنگ بوتگ بلے تنی وھدی مزاکراتی کمیٹی ءِ نیمگ ءَ چہ ھچ وڈیں گامگیج نہ زورگ پہ دردی ئے –

آھانی گوشگ ات کہ بلوچستان ءَ زورانسری آوار جنی ءِ درچ بازیں دھکاں چہ برجاہ انت کہ بلوچستان ءِ مھلوک اے گیر انسانی ءُ گیر کانودی عمل ءِ آماچ جوڈ بوتگ ءُ نودربر ءُ زانتکار چہ اے عمل ءَ ھم نہ رکتگ انت – بلوچستان ءِ تہ ءَ یک نیمگے زانشتی نزام نیستی ءِ ھساب انت دومی نیمگ ءَ زانشجاھاں ترس ءِ ودّینگ بوھگ انت کہ نودربر وتی زانشتی ءُ ساچشتی صلاحیتاں چہ زبھر انت – زانشجاھانی تہ ءَ سیکیورٹی پوج روچ پہ روچ گیش بوھان انت ءُ زانشجاہ وانگ جاہ ءِ بدل ءَ پوجی بنجل گندگ ءَ کائنت- زانشجاھانی واکدار یک نیمگے پھریز ءِ نام ءِ سر ءَ ارباں فنڈ گرگ انت ءُ ھمود ءَ شاھدربرجاہ ءِ واکدار ھاسٹلانی تہ ءَ ھم نودربراں پھازت کرت نہ کناں –

نودربرانی گوشگ ات کہ بلوچستان شاھدربر جاہ ءَ چہ سہیل بلوچ فصیح بلوچ ءِ زورانسری آوار جنی زانشجاھاں چہ نودربرانی آوار جنی ءِ اولی وئیل نہ انت بلکنہ ءَ اشی ءَ پیش ھم سدانی کچ ءَ نودربر آوار جنگ ءُ بیگواہ کنگ بوتگ انت چوش کہ گوستگیں ھپتگ ءَ گوادر شاھدربر ءَ چی سَے نودربر زورانسری آوار جنگ ءُ بیگواہ کنگ بوتگ – بلوچستان ءِ نودربراں زانت ءِ دربرگے ھاتر ءَ بازیں اڈاندانی دیمپانی کنگ کپیت ءُ ھمود ءَ زانشجاھاں زانت ءِ دربرگ نودربرانی ھاتر ءَ وبائے جان جوڈ بوتگ نودربر اے زانشجاھاں ھچ وڈا پھریز نہ انت زانشجاھاں چہ یکشل ءَ نودربرانی زورانسری آوار جنی ازاب ءَ چہ کمتر نہ انت –

آھانی گوشگ ات کہ یک نومبر ءَ بلوچستان شاھدربر جاہ ءَ زورانسری آوار جنگ بوتگیں نودربر سہیل بلوچ ءُ فصیح بلوچ یل کنائینگ ءِ ھاتر ءَ شاھدربرجاہ ءِ نودربر ءُ بلوچستان ءِ نودربراں روانک کش اِتگ ءُ شاھدربرجاہ ءِ واکداراں چہ لوٹ کتگ کہ آھانی یل کنگ ءَ وتی کرد پیلو بہ کن انت بلے شاھدربر جاھے واکداراں نودربرانی زورانسری آوار جنی ھچ وڈا سنجیدگی نہ زرتگ – شاھدربر جاھے واکدارانی سنجیدگی نزورگے سوب ءَ نُھ نومبر ءَ نودربر گلاں شاھدربر جاہ ءِ درسیں سرگرمی بند کتگ انت ءُ شاھدربرجاھے دروازگ ءِ دپ ءَ نندانک جتگ کہ ھژدہ روچاں نندگ ءَ پد سرکار ءِ دیم داتگیں مزکراتی کمیٹی ءِ گوم ءَ نندگ ءَ پد زھرشانی پانزدہ روچ ءِ واست ءَ ھلاس کتگ – سرکار ءِ نمائندگ ءَ مار ءَ باور کنائیننتگ کہ پانزدہ روچ ءِ تہ ءَ نودربر دیم ءَ آرگ بنت نوں چوش کہ کرار ءِ وھد ھلاس بوتگ ناکہ نودربر زاھر کنگ بوتگ انت ناکہ چشیں گامگیج زورگ گندگ بوھگ انت –

آھانی گوشگ ات سہیل بلوچ ءُ فصیح بلوچ ءِ یل کنائینگے ھاتر ءَ سَے ھپتگاں سارتی سر ءَ نندگ ءُ زھرشانی پد سرکار ءِ نودربرانی یل کنائینگ ءِ ھچ وڈیں گامگیج زورگ ءَ نہ انت سرکار ءِ مزاکراتی کمیٹی باور کنائینگ دروگ بوت انت ھردو نودربرانی زورانسری آوار جنی ءَ نوں ماھے کپ ءِ گوستگ ما سرکار ءِ نمائندگاں چہ لوٹ کنیں وتی معاہدہ ءِ پاسداری ءَ بہ کن انت ءُ نودربرانی یل کناءینگے ھاتر ءَ گامگیج بہ زور انت اگاں کرار ءِ سرجمی ءَ تاں نودربر یل کنگ نبوتاں مئے لوٹ منگ نبوتاں گڈا پانزدہ دسمبر ءَ زھرشانیانی تہ ءَ گیشی آرگ بیت اِنت ءُ اےزھرشانیاں زانشجاہ ءُ دگ ءُ شھرانی بندی ھم ھوار انت اشی ءَ ابید بلوچستان ءِ شاھدربرجاہ نودربرانی یل بوھگ ءَ تاں درسیں سرگرمی بند بنت شاھدربرجاہ ءَ ھچ وڈیں چکاس ءُ دگہ سرگرمی اجازت دئیگ نہ بیت انت ءُ ما شاھدربرجاہ ءِ واکداراں ھم لوٹ کنیں آ سرکار ءِ نمائندگانی گوم ءَ بوتگیں مزاکرات ءِ پاسداری ءَ بہ کن انت ءُ ھر وڈیں عمل کنگ ءَ وت ءَ دور بدار انت –