ترکی ءِ پھازگی لشکر ءَ صدر رجب طیب اردوغان ءِ سرءَ بیتگیں اُرش ءِ کوشست بے سوب کُتگ۔
درملکی ھال رسانکی ادارگانی ردءَ ترک صدر رجب طیب اردوغان ءِ سرءَ سیرت پرگینگ ءَ بم تراک یے ءَ گوں اُرش ءِ کوشست بے ترکی ءِ پھازگی لشکراں بے سوب کُتگ۔
ترک رسانک ءِ رد ءَ طیب اردوغان سیرت پرگینگ ءَ یک روانک یے ءَ ھوار بیتگ، ھمے نیام ءَ پولیس ءِ اولاک کہ روانک ءِ پھازگ ءَ اوشتوک بیتگ، پھازگی لشکریاں اولاک ءِ چیرءَ چہ بمب ءِ کش اِتگ کہ بمب ڈسپوزل اسکواڈ ءَ بے سوب کُتگ اَنت۔
ترک رسانکدرانی ردءَ وئیل ءَ پد فرانزک ٹیماں اولاک انگیر کُتگ اَنت ءُ دز نشان ءُ دگہ ثبوت یک جاہ کُتگ اَنت وھدیکہ اے ردءَ گیشتر پَٹ ءُ پول برجاہ کنگ بیتگ۔
دومی نیمگ ءَ رجب طیب اردوغان ءَ شمبے ءِ روچ ءَ سیرت ءَ یک روانک یے ءَ تران کنان ءَ گُشتگ کہ ترکی ءِ باندات ءِ تہءَ ناشرکاری ءِ ھاترءَ ھچ جاہ نیست۔ ما ڈیھہ ءِ کجام ھم ورناہ ءَ ناشرکاریں گلانی بھر بئیگ ءَ نئیل ایں۔