بلوچ نودربرانی دیم ءَ نیارگ، چار شمبے ءَ بلوچستان ءَ دراھیں وانگی ادارہ بند کنگ بنت – نودربر ھواریں گل

بلوچستان ءِ بنجاھی شھر شال ءَ بلوچستان شھدربرجاہ ءِ دیم ءَ نودربرانی بیگواھی ءِ ھلاپ ءَ مروچی چاردھمی روچ ءَ زھرشانی برجاہ بیتگ –

اے وھد ءَ بی ایس او ءِ بنجاھی رھشون، ایس ایف ءُ بساک ءِ رھشوناں پریس کانفرنس کنان ءَ گوشتگ کہ نودربرانی دیم ءَ پدردی یے آیاِں گوشت کہ گوستگیں روچ ءَ بلوچستان اسمبلی ءَ نودربرانی درگت ءَ سرکار ءَ بس بے وسی ءِ بے تاھیری درشان کرتگ –

نودربر رھشوناں گشت کہ ما گوستگیں چاردہ روچ ءَ زھرشانی کنگ ءَ اِنت بلے کسے ءِ گوشاں مورے ھم نہ وارت اِنت ءُ مئے زھرشانی ءَ الکاپی ءَ دلگوش دیگ ءَ نہ اَنت آیاں گوشتگ ما نہ گوش ایں کانون نیست اِنت بلے آ ھم اے کانون ءِ پاسداری ءَ بہ کن اَنت-

نودربر گلاں سرکار ءَ را چِل ءُ ھشت کلاک ءِ وھد داتگ کہ اگاں نودربر یل نہ بیت اَنت گڑا اے دوشمبے ءَ شال ءِ وانگی ادارہ بند بنت ءُ چار شمبے ءَ سرجمیں بلوچستان ءِ وانگی ادارہ بند کنگ بنت-

اے درگت ءَ پشتون ایس ایف ءِ رھشوناں ھم گوشتگ کہ پشتون دمگاں ھم زھرشانی کنگ بیت اِنت ءُ نودربر گلاں گوں دزبندی اِنت کہ کالج ءُ ادارھاں بند کن ایں –

نودربر رھشوناں گوشت کہ اگاں سرکار ءَ زھرشانی ءِ دیم ءَ ڈنگر جنگ ءِ جھد گڑا اگاں اے وھد ءَ دگہ ناوشی ءِ پیش اتک اشی ءِ زمہ وار سرکار بیت اِنت –

زانگ بہ بیت بلوچستان شھدربرجاہ ءِ دوئیں نودربر سھیل بلوچ ءُ فصیح بلوچ یل نومبر ءَ بلوچستان شھدربرجاہ ءَ بیگواہ کنگ بیتگ اَنت چریشی ءَ آیانی نودربریں گلاں زھرشانی بندات کرتگ –

شھدربرجاہ ءِ نزیک ءَ چاردہ روچ ءَ زھرشانی دیوکیں نودربراں سرکاری پارلیمانی کمیٹی ءَ ھواریں باسک عبدالرحمن کھیتران، ملک نصیر شاھوانی ءُ اھمد نواز ءَ گند ءُ نند بیتگ بلے داں انگت ءَ سرکار نودربرانی یل کنگ ءَ سوب نہ بیتگ –

سرکاری مردماں نودربراناں گوشتگ مارا جیڑہ ءِ گیشنگ ءَ روچ درکار اَنت چریشی ءِ سر ءَ نودربرانی گپ ءُ تران ءَ پد چار روچ دیگ بیتگ –