گوستگیں شپ ءَ بلوچستان ءِ باپاری شھر حب ءَ چیریں ادارھاں دگہ یک نودربرے دزگیر کنگ ءَ پد ناشناسیں جاھاں بُرتگ۔
چہ حب ءَ بیگواہ بیتگیں نودربر ءِ پجار اسلم بلوچ ءِ نام ءَ بیتگ کہ حب الہ آباد ٹاؤن ءِ جھمنند اِنت۔
بلوچستان ءَ زورانسری بیگواھیانی یکشلی یکرندے پد ءَ تیز بیگ ءَ اِنت لھتیں روچانی تہ ءَ بلوچستان ءِ جتا جتائیں دمگاں چہ دہ ءَ گیش ورناہ زورانسری بیگواھی ءِ آماچ بیتگ اَنت کہ اشانی تہ ءَ گیشتر نودربر اَنت۔
بلوچستان ءِ شھر حب ءَ چہ دو روچ پیش دگہ دو نودربر زبیر زھری ءُ عدنان مینگل ھم چیریں ادارھانی کارندھاں دزگیر کنگ ءَ پد بیگواہ کُتگ اَنت وھدیکہ نوشکی ءَ ھم دو نودربر زورانسری بیگواھی ءِ آماچ بیتگ اَنت۔
لھتیں روچانی تہ ءَ بلوچستان ءَ زورانسری بیگواہ بیتگیں نودربرانی کساس ھپت بیتگ وھدیکہ چہ کراچی ءَ ھم سَے مردم زورانسری بیگواھی ءِ آماچ بیگ ءِ ھال اِنت۔
انیگیں نودربرانی زورانسری بیگواھیانی ھلاپ ءَ بلوچستان ءَ نودربر گلانی زھرشانی زرمبش برجاہ اِنت وانگجاھاں چہ نودربرانی زوریں بیگواھی ءُ لشکریانی بیڑانی ھلاپ ءَ نودربراں بلوچستان شھدربرجاہ ءِ بائیکاٹ کُتگ۔
دومی نیمگ ءَ خضدار شھدربرجاہ ءِ ھاسٹل ءَ چہ لشکریانی دست ءَ زورانسری بیگواہ بیتگیں شھمیر ءُ آئی ناکو زتک مرتضی بلوچ ءِ بیگواھی ءِ ھلاپ ءَ نودربر گلانی زھرشانی یکشل ءَ برجاہ اَنت۔