نوشکی ءَ پوج ءَ سردار الھی فاروق ءَ ھوار شش مردم آوار جتگ اَنت

دی بلوچستان پتر ھال ءَ سربوتگیں ھالانی رِد ءَ بلوچستان ءِ دمگ نوشکی ءَ سردار الھی بخش ماککی میتگ ءَ پاکستانی پوج ءَ گوستگیں شپ ءَ لوگ ءَ بیڑ برتگ ءُ شش مردم زورانسری آوار جتگ ءُ بیگواہ کتگ اَنت –

اھوالکار ءِ رِد ءَ شپ ءِ ادار دہ ءَ پوج ءَ مزنیں کچے ءَ دمگ وتی انگیر ءَ کتگ سردار فاروق ء سردار الھی بخش، حافظ محمود ء سردار الھی بخش، سلیمان ءِ حاجی کمال، شعیب ء حاجی کمال ءُ ربانی ء محمد عظیم دزگیر کتگ ءُ گوں وت برتگ انت –

کھول ءِ مردماں اے بھتام ھم جتگ کہ لشکر کشی ءِ میان ءَ پوج ءَ سَے گاڑی، موبائیل ءُ لکانی ھساب ءَ کلدار ھم گون وت برتگ انت –

وئیل ءِ بگیری ءَ دمگی مردماں مزنیں کچے ءَ دگ ءِ سر ءَ در اتکگ ءُ آر سی ڈی دگ بند کتگ ءُ زھرشانی کتگ ھر وڑیں رؤگ ءُ آیگ بند کتگ اَنت –

زھرشانی کنوکانی گوشگ ات کہ اے وئیل بلوچ ءِ چادر ءُ چاردیوالی لگتمالی انت – آھانی گوشگ ات کہ سردار فاروق ءُ آئی ءِ ھمراھانی سر ءَ ھر وڑیں بھتامے ھست آمیدگس ءَ آرگ بہ بنت –

زانگ بہ بیت ھمے ماہ ءَ سرجمیں بلوچستان ءَ پاکستانی پوج ءِ نیمگ ءَ مردمانی زورانسری آوارجنی ءِ تہ ءَ گیشی آیگ انت وھدیکہ آوار جنگ بوتگیں مردمانی تہ ءَ گیشتریں کچ بلوچ ورنایانی ئیگ انت –

گوستگیں دو نومبر ءَ پاکستانی پوج ءَ کیچ ءِ دمگ مند ءَ سَے ورنا زورانسری آوار جتگ ءُ بیگواہ کتگ اِت انت کہ انگت بیگواہ انت – آھانی پجار باسط ء لشکران، سلمان ء عبدالرسول ءُ گلزار ء بالاچ ءِ ناماں چہ بوتگ انت –

کہ ھر سئیں ورنا دو نومبر ءَ وتی دگہ سنگتانی ھمراھی ءَ پکنک ءَ شتگ بوتگ انت کہ پوج آوار جتگ انت –

دومی نیمگ ءَ پنجگور ءَ چہ زورانسری آوار جنگ ءُ بیگواہ بوتگیں احسان بلوچ ءِ گھار ءِ رِد ءَ آئی برات ءِ زورانسری آوار جنی ءِ ارزی ءَ پُولیس نبشتہ کنگ ءَ نہ انت ءُ ناکہ آئی ءِ برات ءِ درگت ءَ آ سرپد کنگ بوگ ءَ انت-

آئی ءِ گوشگ ات کہ آئی ءِ برات احسان ء عظیم گوستگیں ماھے بیست ءُ ھشت رمس پنجگور ءَ آوار جنگ بوتگ کہ ما پولیس ءِ گور ءَ ارزی برتگ –

آئی ءِ گوشگ ات کہ پولیس آئی ءِ برات آوار جنی ارزی ءَ نبشتہ کنگ ءَ نہ انت کہ اشی ءِ بگیری ءَ پنجگور پریس کلب ءِ دیم ءَ زھرشانی ءُ پریس کانپرنس کنین –

بیگواھیں احسان ءِ گھار ءَ پنجگور نودربر ءُ سیاسی باسک ءُ سول سوسائٹی زھرشانی ءَھوار بوگ ءُ احسان ءِ زورانسری آوار جنی ءَ پولیس گیر کانودی امل ءِ بگیری ءَ آھانی ھمراہ داری ءِ لوٹ کتگ –