ٹی ٹوئنٹی ورلڈ کپ: نمیبیا ءَ اوگانستان ءِ دیم ءَ پروش وارتگ

یکشمبے ءِ روچ ءَ دبئی ءَ بوتگیں آئی سی سی مینز ٹی ٹوئینٹی ورلڈ کپ کرکٹ گوازی ءَ اوگانستان ءَ نمیبیا ءَ شست ءُ دو رن ءُ نیوز لینڈ ءَ بھارت ھشت وکٹاں پروش داتگ –

شیخ زائد کرکٹ پٹ ءَ اوگانستان ءُ نمیبیا ءِ میان ءَ بوتگیں گوازی ءَ اوگانستان ءَ ٹاس کٹیتگ اولسر ءَ بیٹنگ کنگے پیسلہ کتگ ءُ بیست اوورانی تہ ءَ پنچ وکٹانی تاوان ءَ اوگان ءِ لیبیاں یکسد ءُ شست رن جوڑ کرتگ-

اوگانستان ءِ نیمگ ءَ محمد شھزاد ءَ درسان گیش چِل ءُ پنچ رن جوڑ کرتگ ءُ حضرت اللہ زازئی ءَ سِی ءُ سَے رن جوڈ کرتگ وھدیکہ محمد نبی سِی ءُ دو ءُ اصغر ءَ سِی ءُ یک رن جوڑ کرتگ –

نمیبیا ءِ نیمگ ءَ جوبین ءَ دو ءُ اسمت ءَ یک وکٹ ءِ گپتگ –

یکسدو ءُ شست ءُ یک رنانی ٹارگٹ ءب پروشگے ھاتر ءَ نمیبیا ءِ لیبیاں بیست اوورانی تہ ءَ نُھ وکٹانی تاوان ءَ بس نود ءُ ھشت رن جوڑینت –

گوازی ءِ جوانتریں لیبی نوین الحق حق ات بلے نوین الحق ءَ وتی داد اصغر افغان ءَ دات کہ آئی اے گڈی گوازی بوتگ –
زانگ بہ بیت اوگان ءِ کرکٹ لیبی اصغر ءَ گوستگیں روچ ءَ وتی ریٹائرمنٹ ءِ جار جتگ ات اے آئی ءِ گڈی گوازی بوتگ-

وتی کیرئیر ءِ گڈی گوازی کنوکیں اصغر افغان ءَ بیست ءُ سَے بالاں سِی ءُ یک رن جوڑ کرتگ –

دومی گوازی دبئی انٹر نیشنل کرکٹ پٹ بھارت ءُ نیوز لینڈ ءِ میان ءَ بوتگ کہ نیوز لینڈ ءَ بھارت ءَ ھشت وکٹاں پروش داتگ –

بھارت ءَ بیست اوورانی تہ ءَ ھپت وکٹانی تاوان ءَ یکسد ءُ دہ رن جوڑ کرتگ –

بھارت ءِ نیمگ ءَ جڈیجا ءَ بیست ءُ شش ءُ ہاردک ءَ بیست ءُ سَے رن جوڈ کرتگ وھدیکہ کپٹن کوہلی ءَ جوانیں لیب پیش نہ داشت ءُ آئی ءَ نھ رن جوڑ کرت آؤٹ بوت –

نیوز لینڈ ءِ نیمگ ءَ ٹرینٹ ءَ سَے ءُ ایش سودھی ءَ دو لیبی آؤٹ کرت –

نیوزلینڈ ءَ یکسد ءُ یانزدہ رنانی ٹارکٹ پانزدھمی اوور ءَ دو وکٹانی تاوان ءَ ارزانی ءَ پروشت ءُ گوازی وتی نام ءَ کُت –

نیوز لینڈ ءِ نیمگ ءَ درساں گیش ڈیرل مچل چِل ءُ نھ ءُ کپٹن ولیم سن ءَ سِی ءُ سَے رن جوڑ کرت –