بساک ءِ چیئرپرسن ڈاکٹر صبیحہ بلوچ ءِ برات ءُ ناکو زھگ ءِ یل کنگ ءِ ھاتر ءَ ھزدار ءَ زھرشانی

بلوچ اسٹوڈنس ایکشن کمیٹی ءِ بنجاھی سرکماش ڈاکٹر صبیحہ بلوچ ءِ برات ءُ ناکو زھگ ءِ یل کنگ ءِ ھاتر ءَ ھزدار پوسٹ آفس بگر تاں پریس کلب ءَ زھرشانی کنگ ءُ روانکے کشگ بوتگ –

زھرشانی ءَ نودربراں ھوار دگہ تک ءُ پھناتاں سیادی داروکیں مردماں مزنیں کساسے ءَ بھر زرتگ –

زھرشانی روانک ءَ تران کنان ءَ آھانی گوشگ ات کہ گوستگیں بازیں دھکاں نودربر سیاست ءِ سر ءَ بندش جنگ بوگ ءَ انت چریشی ءَ درساں گیشتر بلوچستان ءِ نودربر آماچ بوتگ انت – سیاسی باسک ءُ رھشوناں ھچ نہ گوشگ ءِ ھاتر ءَ وڑ وڑیں پندل سازگ بوگ ءَ انت سیاسی باسکانی زورانسری آوارجنی ءَ بگر آھانی کھولانی سر ءَ زوراکی کنگ ءِ درچ یکشل ءَ برجاہ انت – ڈاکٹر صبیحہ بلوچ ءِ برات ءُ آئی ءِ ناکوزھگ ءِ زورانسری آوار جنی ھمے درچانی بھر اِنت –

زھرشانی کنوکاں تران کنان ءَ گوشت کہ ڈاکٹر صبیحہ بلوچ بلوچستان ءَ ھوار سرجمیں ملک ءَ سیاسی کاز ءِ سوب ءَ آئی پجار ءِ ھست – آئی ءَ نودربرانی ھک ءِ ھاتر ءَ مدامی جھد کتگ آ ھاموش کنگ ءُ سیاسی جھد ءَ دسکش بوگ ءِ ھاتر ءَ آئی ءِ کھول یکجاھی سزا آماچ کنگ بوگ ءَ انت –

آھانی گوشگ ات کہ ڈاکٹر صبیحہ بلوچ ءِ برات ءُ ناکوزھگ ءِ بیگواہ کنگ یک بے رھبندی ءُ گیر جمھوری کارے ایشی ءِ ھاتر ءَ چاگردے درسیں مردماں توار چست کنگی انت – پرچاکہ ڈاکٹر صبیحہ بلوچ مدامی مزلومانی توار بوتگ – مروچی آئی ءَ ھاموش کنگے ھاتر ءَ گیرکانودی ءُ بے رھبندی پندل سازگ بوھگ انت کہ ایرجنگی انت –