منی برات ءِ آوار جنی ءَ پد ایم آئی ءِ افیسراں توار چست کنگ ءَ مار ءَ بیھار داتگ – کھول

زورانسری آوار جنگ ءُ بیگواہ بوتگیں رحیم الدین ءُ بلال بلوچ ءِ کھول بیگواھیں مردمانی بنجل ءَ اتکگ ءُ وتی دوستگیں مردمانی یل کنگے لوٹ کتگ –

پنجگور ءُ خاران ءَ چہ زورانسری آوار جنگ ءُ بیگواہ بوتگیں ورناھانی کھولاں شال پریس کلب ءِ دیم ءَ برجاھیں بیگواھیں مردمانی پانکجیں گل وائس فار بلوچ مسنگ پرسنز ءِ بنجل ءَ اتکگ ءُ وتی دوستیگیں مردمانی یل کنگے لوٹ کتگ –

خاران ءَ چہ پاکستانہ پوج ءِ دست ءَ زورانسری آوار جنگ بوتگیں رحیم الدین ءِ گھار ءِ رِد ءَ آئی ءِ برات شش اگست دوھزار شانزدہ ءَ پوج ءَ آوار جتگ –

رحیم الدین ءِ کھول ءِ رِد ءَ آئی ءِ برات ءِ ھمراھی ءَ زورانسری آوار جنگ بوتگیں مردم پد ءَ رند ءَ پولیس ءِ ھوالگ ءَ دئیگ بوتگ انت بلے منی برات ءِ درگت ءَ مار ءَ ھچ وڈیں سرپدی دئیگ نبوتگ؛-

رحیم الدین ءِ گھار ءِ گوشگ ات کہ برات ءِ یل کنائینگے ھاتر ءَ ما بیگواھیں مردمانی کمیشن ءَ ارزی نبشتہ کنائینتگ بلے کمیشن نیمگ ءَ تنی وھدی ھچ وڈیں عمل ءِ گندگ ءَ نہ اتکگ –

وھدیکہ ھمے سال ءَ پنجگور ءَ چہ زورانسری آوار جنگ ءُ بیگواہ بوتگیں بلال بلوچ ءِ برات ءَ وائس فار بلوچ مسنگ پرسنز ءِ اگدہ دارنی گور ءَ وتی برات ءِ زورانسری آوار جنی ءِ رپورٹ نبشتہ کنائینتگ –

ساجد بلوچ ءِ رِد ءَ آئی ءِ برات بلال آئی چمانی دیم ءَ ایم آئی ءں کارمند ناصر نامی افیسر ءَ آوار جتگ –

ساجد بلوچ ءِ رِد ءَ برات آوار جنی ءِ وھد ءَ آئی ھمراہ بوتگ ءُ آوار جنوک پجاہ آؤرتگ انت کہ آھانی تہ ءَ ایم آئی ءِ آفیسر ناصر ءُ دمگی دلار شکیل بلوچ ھوار بوتگ انت –

ساجد بلوچ ءِ رِد ءَ برات ءِ زورانسری آوار جنی ءِ میان ءَ دپ جنگی ءَ ایم آئی ءِ کارمنداں آ بیھار داتگ کہ اگاں تو گپ جت ترا ھم آوار جنیں –

بیگواھیں مردمانی کھولاں انسانی ھکانی ادارھاں چہ لوٹ کہ آھانی دوستیگیں مردمانی یل کنائینگ ءَ وتی کرد ءَ پیلو بہ کن انت –