سرکار کھول ءَ زور دیگ ءُ وئیل ءَ دزمانجنیں کوشکاراں پھریزگ اِنت – شال ءِ نندانک

ھوشاپ وئیل ءِ کھولانی نندانک شال ءَ پنچمی روچ ءَ برجاہ بیتگ، لوٹ منّگ نہ بیت اَنت انتزامیہ کاروائیاں پد اسلام آباد ءِ نیمگ ءَ جنزان کن ایں تران کنوکانی دومی پریس کانفرنس –

یکشمبے ءِ روچ ءَ رسانکدراں پریس کانفرنس کنان ءَ ھوشاپ وئیل ءَ کُشگ بیتگیں زھگانی کھولانی گوشگ اَت کہ ھنچش شما درست سرپد اِت کہ گوستگیں روچ ءَ درستیں دراھیں سرپدی رسانکدرانی دیم ءَ ایر کرتگ اَنت کجام ھم رنگ ءَ وتی شھریاں انساپ دیگ ءِ واستا ریاست بے وسی ءَ گیر سنجیدگی ءَ مروچی بزاں یکشمبے ءِ روچ ءَ ھبدہ اکتوبر ءَ اے ریاستی بے وسی ءُ گیر سنجیدگی ءِ ھلاپ ءَ بلوچستان ءِ جتا جتائیں شھراں مھلوک زھرشانی تہ ءَ بیتگ اَنت-

پریس کانفرنس کنان ءَ گشتگ اِت کہ مروچی شال، کراچی، تربت ءُ گوادر ءَ مھلوک ءَ ترندیں رنگے ءَ زھر ءِ درشان کتگ اَنت ءُ وتی لوگاں دراتکگ ءُ ھوشاپ وئیل ءِ ھلاپ ءَ زھر ءِ درشان ءَ بیتگ اَنت سرجمیں بلوچستان ءَ مھلوک ءِ زھر زانگ بیتگ اَنت نِی اے زُلم ءُ زوراکیانی ھلاپ ءَ کس بے توار نہ بنت بلکیں ترند ءَ ترندیِں زھرشانی کنگ بنت-

کھول ءِ رد ءَ مروچی سرکاری گپ ءُ ترانی ٹولہ کمشنر شال ءِ سروکی ءَ کھولانی گندگ ءَ اتکگ اَنت کھول ءَ وتی لوٹ دیم ءَ ایر کرتگ اَنت کہ چریشانی تہ ءَ زھگانی کوشکارانی ھلاپ ءَ ایف آئی آر گون بیتگ کہ درستاں پیسر سرکاری گپ ءُ ترانی ٹولی کھول ءَ اے گپ ءَ منینگ ءِ جھد ءَ بیتگ اَنت اے ایف آئی آر والا لوٹ ءَ دزکش بہ بنت بلے کھول ءِ گوشگ بیتگ کہ مئے زھگ ایف سی ءِ نیمگ ءَ شانک داتگیں مارٹر شھید بیتگ اَنت ءُ ایف آئی آر ھم ایف سی ءِ زمہ دارانی سر ءَ نبشتگ کنگ بہ بیت اِنت –

اھوالکاراں گوں گپ کنان ءَ کھول ءَ گشتگ کہ گپ ءُ تران ءِ گڈی ءَ سرکاری گپ ءُ ترانی ٹولی ءَ اے لوٹ ءِ واستا شَور ءُ سلاہ کنگ ءِ واستا کھول ءِ گور ءَ وھد لوٹ اِتگ بلے چریشی ءَ پد سرکاری گپ ءُ ترانی ٹولی ءِ نیمگ ءَ کھول ءَ را کلوہ اش داتگ اَنت کہ ما ایف سی ءِ کجام ھم کارندہ ءِ سر ءَ ایف آئی آر درج کت نہ کن ایں دانکہ لاشاں پوسٹ مارٹم کن ایں اگاں پوسٹ مارٹم ءَ اے زانگ بیت کہ زھگانی شھیدی مارٹر گولھانی شانک دیگ ءَ بیتگ اَنت گڑا ما ایف ائی آر ءَ ایف سی ءِ کجام ھم کارندہ ءِ سر ءَ ایف آئی آر ءَ نبشتگ کن ایں اگاں زھگانی شھیدی ھینڈ گرینیڈ ءَ چہ بیتگ گڑا ایف آئی آر کھول ءِ سر ءَ نبشتگ کنگ بیت اِنت-

آیاں گشتگ کہ سرکار ءِ گپانی تہ ءَ اے گپ زانگ بیتگ کہ زھگانی کوشکارانی گرگ ءَ ابید زھگانی کھولاں زھرشانی ءِ پژدر ءَ کاروائی ءِ نشانگ کنگ اِنت-

کھول ءَ گشتگ اَت کہ سرکاری گپ ءُ ترانء ٹولی ءِ رویش ءُ واک ھنچش بیتگ اَنت آ کجام ھم رنگ ءَ کوشکارانی سر ءَ ایف آئی آر درج نہ کنت ھما رنگ ءَ آیاں پوسٹ مارٹم ءِ لوٹ ایر کرتگ ما کھول اے لوٹ ءَ سرجم ءَ رد کن ایں پرچاکہ ما سرپد بہ ایں کہ سرکار پوسٹ مارٹم رپورٹ ءَ مٹ کنت کوشکاراں پھریز ایت اِنت-

آیاں گشتگ کہ ھمود ءَ کہ ایف سی ءِ مارٹر گولہ ءِ آس دیگ ءِ گپ اِنت ءُ چریشی ءَ زھگانی شھیدی ءَ گوں بندوک اِنت کہ اے گپ ءَ درستاں پیسر تھسیلدار ءِ رپورٹ اتکگ کہ آئی ءَ تچکی ءَ نبشتگ بیتگ کہ زھگانی شھیدی ایف سی ءِ نیمگ ءَ شانک دیگ بیتگیں مارٹر گولھاں بیتگ اشی ءَ ابید دمگ ءِ آل پارٹیز کیچ ءُ ما کھول ءِ مردم اے گپ ءِ گواہ اِنت ایف سی ءِ نیمگ ءَ آس دیگ بیتگیں مارٹرانی سبب ءَ زھگانی شھیدی بیتگ اَنت ھمود ءَ کہ گپ پوسٹ مارٹم ئیگ اِنت ھما روچ ءَ کہ وئیل بیتگ ھما روچ ءَ چہ نندانک برجم کنگ بیتگ سرکار ءِ ھوش ءَ آ وھد ءَ پوسٹ مارٹم ءِ ھچ ھیال نیتکگ وھدیکہ ایشی ءِ پدراھی ءَ سرکاری ادارہ ھما روچ ءَ ایف سی ءِ پھریزگ ءَ روچے یک گپے دیم ءَ کار اَنت وھدیکہ مارا بے توار کنگ ءَ تربت ءَ نندانک ءَ زرانی لالچ ھم دیگ بیتگ ءُ ما سرپد بہ ایں کہ پوسٹ مارٹم رپورٹ ءِ مٹ کنگ بیت اِنت ما نیزگاریں مردم زھرشانی ءِ سزا دے اَنت ئِے بلے ما سرکار ءِ کجام ھم پندل ءُ بیھاراں نیزور نہ بہ ایں –

کھول ءِ گوشگ اَت کہ ما مروچی اے پریس کانفرنس ءِ زور ءَ سرکار ءَ ھال دیگ لوٹ ایں کہ وزیر داکلہ ضیالانگو ءِ پریس کانفرنس راستی ءَ بلکل دور بیتگ کک وزیر داکلہ مئے پُر ایمنیں زھرشانی ءَ بے سوب کنگ ءَ سیاسی پاٹیانی ناماں کارمرد کنگ ءَ اِنت بلکل اے گپ آئی ءِ دروگ اِنت ما ھچ سیاسی پاٹی ءِ گوشگ ءَ اد ءَ نیتکگ اِنت بلکیں تئی سرکار ءِ گور ءَ انساپ ءِ واستا نندانک ءَ نشتگ اِنت مئے زھگانی کوشکار ایف سی اِنت مئے زھگانی کوشکار دزگیر کنگ بہ بنت-

کھول ءَ گشتگ اَت کک ما سرکار ءَ یک رندے پد ءَ گوشگ لوٹ ایں کہ مئے زھگانی ایف آئی آر ءَ ایف سی ءِ ھلاپ ءَ نبشتگ بہ کن کجام رنگ ءَ ھم نندانک ھلاس کنگ نہ بیت اِنت نانکہ کجام لاچ ءُ ناکہ کجام بیھار ءِ ترس ءَ پشت ءَ کنز اِت کن ایں زھرشانی گیش کنگ بیت اِنت-

آیاں گشتگ کہ گڈی ءَ ما کھول بلوچ مھلوک ءَ گوں دزبندی کن ایں کہ وتی زھرشانی ءَ گیش بہ کن اَنت باند ءَ شال ءِ مزنیں شھدگ بند کنگ بنت اسلام آباد ءِ نیمگ ءَ لاشانی ھمراھی ءَ جنزان بہ ایں ءُ لوگاں در بیا اَنت ءُ مئے توار جوڑ بہ بنت سرجمیں بلوچستان ءَ زھرشانی ءُ نندانکاں بندات بہ کن اَنت –

زانگ بہ بیت مروچی بلوچستان ءِ بازیں جاھاں ھوشاپ وئیل ءِ ھلاپ ءَ زھرشانی کنگ بیتگ اَنت، گوادر، تربت ءُ کراچی کنگ بیتگ اَنت ءُ باندا دگہ جاھاں ھم زھرشانیانی جار پرینگ بیتگ اَنت-