ھوشاپ وئیل ءَ اسرمندیں کھولانی یکجھتی،تربت ءَ زھرشانی

بلوچستان ءِ دمگ کیچ ءِ بنجاھی شھر تربت ءَ یکشمبے ءِ روچ ءَ بلوچ یکجھتی کمیٹی ءِ دزبندی ءَ ھوشاپ ءَ پاکستانی پوج ءِ دست ءَ کُشگ بیتگیں زھگانی کھولانی لوٹانی واستا یک روانکے کشگ بیتگ –

آیانی دستاں بینرز ءُ پلے کارڈز چِست کرتگ زالبول، زھگ ءُ ورنایانی بازیں کچے ءَ شھر ءِ جتا جتائیں جاھاں پند جنان ءَ سرکار ءُ سیکورٹی پورس ءِ رویشانی ھلاپ ءَ اوگام جتگ اش –

روانک ءَ زھرشانی کنوکاں شھید فدا چوک ءِ سر ءَ زھرشانی کرتگ –

ھمے وھد ءَ ہیومین رائٹس کمیشن آف پاکستان ءِ ریجنل کوارڈینیٹی غنی پرواز، آل پارٹیز کیچ ءِ کنوینئر مشکور انور، شاری بلوچ ءُ دگہ مردماں تران کنان ءَ ھوشاپ وئیل ایر جتگ ءُ گوشتگ کہ بلوچستان ءَ ریاستی زُلم ءُ زوراکی بازیں وھدے ءَ چہ برجاہ اَنت –

آیاں گُشتگ کہ بلوچستان ءَ اے مردماں توپک ءِ زور ءَ چیرترینگ ءَ اَنت –

زھرشانی کنوکاں مزن واکاں کھول ءِ لوٹاں بہ منّ اِیت کہ لاش گوستگیں ھپت روچاں زھرشانی کنگ ءَ اَنت –

آیاں گُشتگ بلوچستان ءِ جیڑھاں مانیارگ اِنت –

زھرشانی کنوکاں گُشتگ کہ یک نہ کُٹوکیں وڑے ءَ بلوچستان ءَ لاش دور دیگ بیگ ءَ اَنت -وانندگیں ورنایانی آوار جنگ ءأ مارا اجازت نیست اِنت وتی ھکانی واستا گپ بہ جن ایں – مئے زھرشانی ھک ءُ انساپ ءِ واستا بیگ ءَ اَنت –

آیاں گشتگ کہ مئے گون ءَ نا انساپی بیگ ءَ اَنت – ھوشاپ ءَ دو زھگانی کوش چریشی ءَ پیسر رامیز بلوچ ءِ لاش ءِ گون ءَ شھید فدا چوک ءِ سر ءَ نندانک ءَ نشتگ اِنت مئے گپ گوشدارگ نہ بیتگ اَنت پد ءَ ما لاشانی ھواری ءَ شال ءَ شتگ اِنت اود ءَ مارا انساپ نہ رس اِتگ –

آیاں گُشتگ ما مڈیانی واجہ اِنت آ مارا نہ رس اَنت بلے ھمک روچ مئے لاش دور دیگ بیگ ءَ اَنت –

آیاں گشتگ کہ مارا گشگ بیتگ کہ وتی لاشاں بے تواری ءَ کل ءُ کسارات بہ کن اِت، بلے نی ما بے توار نہ بہ ایں،ما ھم سما کن ایں ءُ وتی لوٹانی واستا ھچ رنگ ءَ دزکش نہ بہ ایں –

زھرشانی کنوکاں گشتگ کہ بلوچستان ءَ زُلم ءُ زوراکی بند کنگ بہ بنت-