روکپتی بلوچستان ءَ ایرانی چیریں ادارھاں یک مردمے آوار جتگ

سر بیتگیں ھالانی رد ءَ روکپتی بلوچستان ءِ بنجاھی شھر دزاپ “زاھدان ” ءَ ایرانی چیریں ادارہ اطلاعات ءَ یک بلوچ ءِ دزگیر کنگ ءَ پد بیگواہ کرتگ –

آوار جنگ بیتگیں مردم ءِ پجار مھمد دین کمالزئی جھمنند نسکند سرباز ءِ نام ءَ زانگ بیتگ –

ھالانی تہ ءَ گوشگ بیتگ کہ مھمع دین لھتے روچ ءَ پیسر ماں دزاپ ءَ تبلیغ ءَ شتگ بیتگ کہ اود ءَ بازار ءِ تہ ءَ چیریں ادارھاں دزگیر کرتگ ءُ برتگ –

ھالانی تہ ءَ گوشگ بیتگ کہ مھمد دین ءِ دزگیر کنگ ءِ بارو ءَ چیریں ادارھاں ناکہ دگہ بھتام پدر کرتگ ءُ ناکہ آئی ءِ گار کنگ ءَ پد آئی ءِ بارو ءَ سرپدی بیتگ –

روکپتی بلوچستان ءَ انسانی ھکانی واستا چاگردی رسانکجاھاں کار کنوکیں بلوچ کمپین فعالین ءِ رد ءَ مھمد دین ءِ آوار جنگ راست کنگ بیتگ –

بلوچ کمپین فعالین ءِ رد ءَ سال دوھزار ءُ بیست ءَ داں انیگ ءَ نود مردم روکپتی بلوچستان ءَ چیریں ادارھاں دزگیر کرتگ ءُ برتگ اَنت ءُ بلے اشانی تہ ءَ بس شست کسانی رپورٹ بیتگ اَنت ءُ آ دگہ مردمانی بارو ءَ دگہ گیشیں ھال دیم ءَ نیتکگ اَنت –