ھوشاب وئیل ءَ نمیران ءُ ٹپی بیتگیں گونڈوانی کھول ءَ گوں یکجاھی درشانگ ءِ ھاترءَ درزنانی کساس ءَ دومی روچ ءَ ھم مردم شال ءَ گورنر ھاؤس ءِ دیما گوں جوناں ننداک ءَ ساڑی اَنت۔ ھوشاب وئیل ءَ بیران بیتگیں دو گونڈوانی کھول گوستگیں روچءَ شال ءَ سربیتگ اِت اَنت۔
ننداک ءَ کھول ءِ ھمرائی ءَ سیاسی، چاگردی ءُ نودربر گلانی باسک زھرشانی ءَ ھوار اَنت، نمیران بیتگیں کھولاں وتی لوٹ سرکار ءَ دیم ءَ پیش کُتگ اَنت۔
گورنر ھاؤس ءِ دیما جونانی پجیگ ءَ ننداک ءِ نشتگیں سانمندیں مردمانی گُشگ اِنت کہ سرکار مئے لوٹءَ پیلو بہ کنت دانکہ ھمک ماہ یک بلوچے ءِ مرگ ءِ یکشلی دارگ بہ بیت۔
کھول ءَ گوستگیں روچءَ وتی لوٹ پیش کُتگ اِت اَنت کہ اِشی تہءَ ھوشاب وئیل ءَ ھواریں ایف سی کارمندانی ھلاپ ءَ قانودی کاروائی، چہ بازاراں ایف سی بنجلانی ھلاسی ءَ ھوار دگہ لوٹ گون بیتگ اَنت۔
وھدیکہ ننداک ءَ ساڑی ایں ایندگہ سیاسی پاٹیاں ھوار بلوچستان نیشنل پارٹی ءُ جمیعت ءِ رھشوناں گوں کھول ءَ یکجائی درشانتگ۔
دومی نیمگ ءَ ھوشاب وئیل ءَ بیران بیتگیں گونڈوانی کھول ءَ گوں یکجائی درشانگ ءِ ھاترءَ تُربت مزن شھدربرجاہ ءِ نودربرانی نیمگءَ یک پُر ایمنیں روانک ءِ ھم کشگ بیتگ۔