نبشتانک: ترس
نبشتہ کار: نیاز ناز بلوچ
دی بلوچستان پوسٹ
بالاچ ءَ وتی میتگ ءَ ھمک جیڑہ ءُ ھر چیزے ھیال شریں وڑے ءَ گور ات آئی ءِ لوٹ مدامی ھمیش ات کہ میتگ ءَ تپاکی، یکجائی ءُ یکمشتی بہ بیت پمیشکا آئی ءَ میتگ ءِ دراھیں ورنا وھد وھد ءِ سر ءَ یکجاہ کت اَنت ءُ برے ماں پکنک ءُ برے مان دگہ ھلک ءُ دمگانی سَیل ءَ در کپت اَنت-
بالاچ ءَ وتی میتگ ءِ دراھیں ورنا چو ساہ ءَ دوست ات اَنت بلئے نودان ءُ بالاچ یک ءِ دومی ءَ گیش لچتگ ات اَنت وھد ھمے رنگ ءَ جنزان ات ءُ بلوچستان ءَ چست کنگ ءُ لاشانی دور دیگ روچ پہ روچ ودان ات ءُ دومی نیمگ ءَ روانک ھرتال ءُ کوکار ءُ وائی گیش بوان بوت اَنت اے وھد ءَ بالاچ ھم گون وتی میتگ ءِ دراھیں ورنایاں ھمے کوکار ءُ سلواتانی بھر جوڑ بوت گون۔
بلوچ ءِ سر ءَ بوکیں جاورھالانی سر ءَ بالاچ گون وتی میتگ ءِ لھتے ورنایاں جوانیں رنگے ءَ نبشتہ کنگ بنا کتگ ات روتاک توار ءُ ماھانہ سنگر بالاچ ءُ بالاچ ءِ سنگتانی نبشتانکاں براھدار کتگ ات اَنت۔
جاورھال ھم روچ پہ روچ ترند بوان بوت اَنت نوں بالاچ مارگ ءَ ات کہ منی ھمبلانی گام سست بوان اَنت بلئے بالاچ ءَ زمین رکینگ ئے سوگند کرتگ ات۔
یک شپ ءِ تھارونکی ءَ لشکر ءَ بالاچ ءِ گس ءَ دؤر کت مات ءُ پت ءَ مھلوک درست کم شرپ کت اَنت بلئے بالاچ دست ءَ نہ کپت پد ءَ ھما شپ ءَ پد بالاچ ءَ ھلک یل ءَ دات ءُ زمین رکینگ ءِ سوگندے پدان شت۔
بالاچ ءِ روگ ءَ پد بالاچ ءِ دراھیں ھمبل ترس ءُ بیم ءِ آماچ بوت اَنت ءُ ھر یک ءِ وت ءَ یک کر کنان بوت بالاچ وھد وھد ءِ سر ءَ نیٹورک ءَ کہ اتک آئی ءَ مدام ھمبلانی سر ءَ فون کت کم کم ءَ بالاچ ءِ دراھیں ھمبلاں بالاچ ءِ پونانی چست کنگ ھم یل ءَ دات بلئے نودان انگت ءَ گون بالاچ ءَ ھال ءُ اھوال ءَ ات ءُ بالاچ ءَ نودان ءِ سر ءَ بلاھیں بھروسہ داشتگ ات۔
بالاچ ءِ دراھیں ھمبل روزگاران بوت اَنت کس ءِ پولیس ءَ بھرتی بوت، کسے لیویز ءَ کسے ءَ دُکانے پچ کت، دان کسے ماسٹری ءَ لگ ات ءُ لھتے مرگ ءِ ترس ءَ ھپت دریا ءَ پشت رپتاں۔
ھمے وھدان پد ءَ لشکر ءَ بالاچ ءِ میتگ ءِ سر ءَ زور داتگ ات شپان گسان دور کن ءُ زالبولانی گوانکوان گون وت ءَ بر ءُ کسے ءَ لٹ دے ءُ ژند کن۔
بالاچ ءَ وھدے اے ھال سر بوت اَنت داں آئی ءَ وت ءَ را نیٹورکے ءَ سر کت ءُ نودان ءِ نمبر جت دو سَے رند ءَ جنگ ءَ پد نودان انگت پون ءَ چست کنگ ءَ نہ ات پد ءَ بالاچ ءَ میسج کت کہ من بالاچ آں ءُ پد ءَ نمبر ءِ ٹرائی کت بلئے نودان بالاچ ءِ فون چست نہ کت۔
کمو روچ ءَ پد پد ءَ بالاچ ءِ سر نیٹورک ءَ کپتگ ات بلئے نودان ناکہ فون چست کت ءُ ناکہ میسج ءِ جواب کت اَنت ءُ بالاچ ءِ ھشکیں لنٹ سُرگ ءَ لگ ات اَنت ءُ گشت ئِے نودان تو ھم ترس ءِ آماچ بوت ئے؟ شش ماہ گوزگ ءَ پد بالاچ ءِ سر نٹ لینی ءَ کپتگ ات اولی میسج آئی ءَ نودان ءَ کت نودان ءَ میسج پچ کت ءُ پسہ نہ دات ءُ پد ءَ بالاچ ءِ نمبر بلوک کت نودان ءِ سر ءَ بالاچ ءِ داشتگیں بیسہ گون ھاکاں ھوار کپت۔
باز وھد گوزگ ءَ رند سھب ءِ تیران ھلک ءِ پشتی نیمگ ءَ مزنیں دگ ءِ سر ءَ داں دیراں توار کت ءُ پد ءَ بالی پیرکانی تواراں تیوگیں ھلک دو ھلک کتگ ات دو ساھت ءَ رند میتگ ءَ ھال شنگ ات کہ لشکر ءِ سر ءَ بلوچ جھدکاراں ٹوئیں ارشے کتگ اَت ھمے ساھت ءَ نودان ءَ زوت زوت ءَ کیسگ ءَ چہ وتی گوانکو کش ات ءُ بالاچ فون کت بلئے فون دگہ کسے ءَ چست کت ءُ دری زبانے ءَ گون گوشگ ءَ لگ ات۔
“مادر چود کون ھو تم “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔