شال ءَ بیگواھیں مردمانی زھرشانی برجاہ

میان استمانی ادارھانی ھچ نگوشگ ءَ بلوچستان کوش جاہ ءِ جوڑ بوتگ- ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ بیست ءُ سَے روچ سرجم بوتگ – ورکرز پاٹی ءِ سوبائی کلانیں سروک ضیاء بھٹی ءُ آئی ءِ دگہ سنگتاں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ گوشتگ کہ پاکستانی ایجنسی، ایف سی ءُ آئی ءِ جوڑ کرتگیں کشندہ ٹولی ءِ دستاں پُرایمنیں جھد کنوکیں ورناہ، کماش، زالبول ءُ سیاسی باسکانی ٹارگٹ کلنگ زورانسری آوار جنی ءُ زانگولیں جونانی دور دیگ ءِ رِد یکشل ءَ برجاہ انت ءُ آئی ءِ تہ ءَ گیشی آرگ بوتگ –

آئی ءِ گوشگ ات کہ وتگڑیں سرکار بلوچستان ءِ تہ ءَ گامگیج ھچ جاہ گندگ نہ بیت بلے ھو سرکار ءِ نام ءَ پوج کار انت ءُ بیگواھیں مردماں سی ٹی ڈی دروگیں میڑ ءِ نام ءَ شھید کنگ ءَ انت –

آئی ءِ گوشگ ات کہ ریاستی کشندہ ٹولی بلوچ ورنایاں آوار جنت ءُ کُش ایت ءُ وتی ھاکماں چہ داد ءُ زر گپت اِنت –

ماما قدیر بلوچ ءِ گوشگ ات کہ بلوچستان ءِ تہ ءَ بنگلہ دیش ءِ راجدپتر نوک کنگ بوھگ انت کہ آئی بیمناکیں رزلٹ ءِ درکیت انت –

آئی ءِ گوشگ ات کہ بلوچ سیاسی باسکانی زورانسری آوار جنی، کُشگ ءُ بلوچستان ءِ چپ ءُ چاگرداں لشکر کشی بلوچ ءِ زِر ءُ مال ءُ مڈیانی پُلگ ءَ گیشی آرگ انت –

ماما قدیر بلوچ ءِ گوشگ ات کہ پیش ءَ چہ آوار جتگیں سیاسی باسکاں دروگیں میڑ ءِ نام ءَ شھید کنگ ریاستی زوراکی ءُ ترس ءِ تہ ءَ گیشی آرگی انت –

آئی ءَ یکرندے پد ءَ میان استمانی انسانی ھکانی گلاں چہ بلوچستان ءِ تہ ءَ ریاستی زوراکی ءِ بگیری ءَ توار چست کنگ ءِ لوٹ کتگ ءُ گوشتگ کہ میاں استمانی ادارہ ءُ انسانی ھکانی ادارھانی ھچ نگوشگ ءَ بلوچستان کوش جاہ ءِ جوڑ بوتگ –