بلوچ یکجھتی کمیٹی ءِ نیمگ ءَ رابعہ بلوچ ءِ لوگ ءِ تہ ءَ دور کنگ ءُ مھراب پندرانی “ناھکیں کوش ءِ ھلاپ ءَ زھرشانی

بلوچ یکجھتی کمیٹی ءِ چیردستی ءَ شال ءُ اسلام آباد ءِ پریس کلبانی دیم ءَ بواٹہ فورٹ منرو نامی ئیں دھشت ءُ ٹرانسپورٹ ءِ واھند ءِ دست ءَ ترندیں لَٹ ءُ کُٹ ءُ زوراکیاں بیران بیتگیں زھگ مھران پندرانی ءِ واستا زھرشانی جنگ بیتگ کہ چریشی ءَ بازیں کچے ءَ زالبول ءُ ورنایاں بھر زرتگ –

زھرشانی ءَ زھرشانی کنوکاں رابعہ بلوچ ءُ مھراب پندرانی ءِ سر ءَ بیتگیں زُلمانی ھلاپ ءَ اوگام جتگ ءُ مھلوک ءَ را اے جد ءُ جھد ءَ ھوار بیگ ءِ دزبندی کتگ اَنت –

زھرشانی کنوکیں مردماں پلے کارڈز چِست کتگ ءُ مھراب پندرامی ءُ دگرانی واستا انساپ لوٹ اِتگ، زھرشانی کنوکیں رھشوناں تران کنان ءَ گُشتگ کہ بلوچستان ءِ کُنڈ کُنڈ ءَ زُلم ءُ زوراکانی راج اِنت اے ملک ءِ زرکار ءُ لاپ ھڑپ وت ءَ زوراور ءُ کانون ءَ گیش مزن سرپد بنت چُشکہ بید ءِ ترس ءَ ھمک رنگیں زلم ءِ کنگ ءَ چک ءُ پد نہ بنت – مھراب پندرانی ءِ وئیل مئے چاگرد ءَ گیر انسانی پکر داروکیں مردمانی چھرگ ءَ جنت کجام ھم انسان جاناورانی گون ءَ اے وڑ ءَ زُلم نہ کنت ھما رنگ ءَ زالماں مھراب پندرانی ءِ گون ءَ کرتگ –

بلوچستان ءَ کانون ءِ نام نیست اِنت آیاں گُشتگ کہ مروچی اد ءَ ما زھرشانی کنگ ءَ اِنت اد ءَ مئے درستانی اکس جوڑ بیگ ءَ اَنت درستاں رکارڈ ءِ تہ ءَ برگ ءَ اَنت درستانی ڈیٹا ءَ مُچ کنگ ءَ اَنت بلے مھراب ءِ وئیل ءَ پانزدہ روچ گوستگ اشی ءَ ابید انگت ءَ جرم کار دزگیر کنگ نہ بیتگ اے گپ ءِ مزن مری اِنت جرمکارانی لاپ ءِ پُشت ءَ کمکی بیگ ءَ اِنت –

بلوچستان ءَ اے وڑیں تاکتوریں مردماں ھر وھد ءَ کمک رسگ ءَ اِنت آ تری کجام رنگ ءَ مزنیں جرمکارے ءَ دزمانجن بہ بیت اِنت آئی ءَ جست کنوک نیست اِنگ پرچاکہ ھاکماں زر رس ایت آیاں کجام ھم رنگ ءَ تاوان نہ دے اَنت –

رھشوناں فورٹ منرو ءَ کسان سالیں رابعہ بلوچ ءِ لوگ ءَ دور کنگ ءُ ھما رنگ ءَ جرمکاریں مردماں لوگ ءَ سَے مردم کُشتگ سبکی ءَ تتکگ اَنت بلے اجکہ کنگی گپ ایش اِنت لوگ ءَ یک کلومیٹرے ءَ دور ایف سی ءِ چیک پوسٹ جاڑیگ اِنت بلے اشی ءَ ابید اے درستیں جاورھالاں آیاں ھچ رنگیں گام چست نہ کتگ بلوچ مروچی پاکستان ءِ کجام ھم کُنڈ ءَ پھریزگ بیگ ءَ نہ اَنت ءُ اے ترندی ءِ گون ءَ زلم ءُ زوراکیانی دیمپانی اَنت اگاں اے درچ دارگ نہ بیت گڑا دیم ءَ گیشتر ناوشی بیت کن اَنت – مھراب پندرانی ءِ سر ءَ لَٹ ءُ کُٹ کنگ گیر انسانی املے چریشی ءَ باید سرکار سرجم ءَ زور ءَ بیتک اِنت ءُ جرمکار دزگیر کنگ بیتین اَنت بلے بد بھتی ءَ پولیس ءُ دگہ ادارھاں یکشل ءَ جھد کرتگ کہ مھراب پندرانی ءِ وئیل گار کنگ بہ بیت اِنت چریشی ءَ پدر بیت اِنت انتزامیہ ءَ اے ھون ءَ ھوار اِنت -بلوچستان ءَ چریشی ءَ پیسر اے وڑیں وئیل پیش اتکگ اَنت اشاں ھلاس بیگ ءِ انگت ءَ نام نہ زانتگ ھیات ءِ وئیل بہ بیت یا برمش ءِ وئیل ءِ گون ءَ پیش اتکگیں جرمکاریں مردمانی زوراکی بہ بیت یا مھراب پندرانی ءُ رابعہ بلوچ ءِ گون ءَ پیش اتکگیں گیر انسانی امل بہ بیت اے درستیں چیز اے منانک ءَ دے اَنت بلوچ اے ملک ءَ کجام کساس ءَ ناپھریزی ءِ آماچ اِنت –

گڈسر ءَ تران کنان ءَ چہ سرکار ءَ لوٹ کتگ ءُ گشتگ مک آ مھراب پندرانی ءُ رابعہ بلوچ ءِ لوگ ءَ بیتگیں ناوشیں وئیل ءِ سر ءَ سرجمی ءَ گامگیج بہ زور ایت ءُ جرمکاریں مردماں گڈی جاہ ءَ سر کنگ ءِ جوانیں گامگیج بہ زور ایت –

دومی نیمگ ءَ بلوچ یکجھتی کمیٹی اسلام آباد ءِ نیمگ ءَ کسان سالیں رابعہ بلوچ ءَ مھراب پندرانی ءِ واستا زھرشانی کنگ بیتگ چریشی ءَ جتا جتائیں پکرانی منوگراں بھر زرتگ ءُ رابعہ بلوچ ءُ مھراب پندرانی ءِ واستا انساپ ءِ لوٹ کتگ اَنت –

تران کنوکاں تران کنان ءَ گُشتگ کہ بلوچستان ءَ اے وڑیں وئیل گیشتر رسانکدراں سر نہ بنت گیر ملکی رسانکدرانی گون ءَ پاکستان ءِ رسانکدر ھم بلوچستان ءِ ناوشیں ناانساپیاں سرجمی ءَ بے توار اَنگ آیاں گُشتگ کہ پاکستان ءِ واکداراں گوں دزبندی اِنت آ بلوچستان بیوکیں ناوشیں وئیلانی سر ءَ گامگیج بہ زور ایت اگاں ناِ اے وئیل روچ پہ روچ گیش ودان بنت –

ھمء رنگ ءَ پندرانی ٹک ءِ ھمسنت زھری ءِ نیمگ ءَ ھم کسان سالیں زھگ ءِ کوش ءِ ھلاپ ءَ زھرری ءَ زھرشانی کنگ بیتگ –

زھرشانی کنوکاں کوش ءَ ھواریں جرمکار ءِ گرگ ءِ دزبندی کرتگ ءُ کشتگیں مردم ءِ واستا انساپ ءِ لوٹ کرتگ –

زانگ بہ بیت لھتے روچ ءَ پیسر یک سیزدہ سالی ئیں زھگے بے دردی کُشگ بیتگ اَت چریشی ءِ بھتام مروچی شال ءَ پولیس ءَ نامگپتی جرمکار دولت لھڑی ءِ دزگیر کنگ ءَ بیڑ برتگ ءُ ھمے وڑ اسسٹنٹ کمشنر سریاب ءِ چیردستی ءَ سدابھار سیل کنگ بیتگ –

کسان سالیں مھراب ءِ میڈکل رپورٹ ءِ رد ءَ آ اشٹیل ءُ آسن ءُ لَٹانی گون ءَ جنگ بیتگ چریشی ءِ سبب ءَ آئی ءِ بیرانی بیتگ-

رپورٹ ءِ رد ءَ مھراب پندرانی ءِ دراھیں جسم ءِ سر ءَ لَٹ ءُ کٹاں چریشی ءَ آئی پھلیگ ھم پرشتگ اَنت –

ڈاکٹر نسر اللہ مینگل میڈیکل آفیسر نسیر آباد ءَ گشتگ کہ وئیل ءَ دگہ یک ٹپیگیں زھگے ءِ درشانے ءِ رد ءَ اے دوئیں کراچی ءَ لَٹ ءُ کُٹ کنگ بیتگ ءُ کراچی داں شال ءَ آرگ ءِ وھد ءَ ھم لَٹ ءُ کُٹ کنگ بیتگ اَنت –

شال ءِ سر بیگ ءَ اے زھگ آسن ءُ اشٹیل ءِ گون ءَ چوپگ بیتگ اَنت بجلی ءِ کرنٹ کنگ بیتگ اَنت چریشی ءَ مھراب پندرانی ءِ بیرانی بیتگ –

دومی نیمگ ءَ سدا بھار ٹرمینل ءِ بند کنگ ءِ ھلاپ ءَ ھاجی ھکمت لھڑی ءُ دگہ ٹرانسپورٹراں یک پریس کانفرنسے ءَ گُشتگ کہ کشگ بیتگیں مھراب پندرانی ءَ مارا کس ءَ سیادی نیست اِنت –

آئی ءَ گُشتگ کہ مئے مردم چست کنگ بیگ ءَ اَنت مارا سرپدی نیست اِنت ایف آئی آر کَئی نام ءَ بیگ ءَ اِنت – آئی ءَ گُشتگ کہ کانون ءِ رد ءَ ٹرمینل ءِ بند کنگ ٹرانسپورٹرانی گون ءَ یک ایس پی ءِ ناجائز کنگ اِنت –

آئی ءَ گُشتگ کہ سرجمیں بلوچستان ءَ ھرتال کنگ بیت اِنت ءُ دگ بند کنگ بنت –