شال ءَ پاکستانی بیرک بھا کنوکیں دکانے ءِ سر ءَ بمب اُرش، جانی تاوانانی ھال

بلوچستان ءِ بُنجاھی شھر شال ءَ پاکستانی بیرک بھاکنوکیں دکانے ءِ سر ءَ دزبمب اُرشے بوتگ جانی تاوانانی ھال اِنت –

سربوتگیں ھالانی رِد ءَ مروچی شال ءِ دمگ رودرتکی شھدگ ءَ ناشناسیں مردماں پاکستانی بیرک بھاکنوکیں یک دکانے ءِ سر ءَ دزبمب اُرشے کتگ-

بمب اُرش ءِ آسر ءَ بیرک بھا کنوک ءَ ھوار چار مردم زدگ بوتگ اَنت ءُ پہ دوا درمان کنگ ءِ ھاتر ءَ نادُراھجاہ ءَ سر کنگ بوتگ اَنت –

دومی نیمگ ءَ میڈیکل سپرنٹنڈنٹ سول ھسپتال ءِ ڈاکٹر جاوید اختر ءَ گْوشتگ تراک ءِ آسر ءَ امان الله خلجی بیران بیتگ ءُ پولیس کارندھے ءَ ھوار چار مردم زدگ اَنت ءُ پولیس کارندہ ءِ جاور نگیگ اَنت-

زانگ بہ بیت بلوچستان ءَ گیشتر چاردہ اگست ءِ درگت ءَ پاکستانی بیرک بھاکنوک ءُ اسٹالز ءُ مچّیانی سر ءَ بیتگیں اُرشانی زمہ واری بلوچستان ءَ برجاھیں سلاہ بندیں جھد ءِ آجوئی لوٹوکیں گلاں زرتگ اَنت-

گوستگیں روچ ءَ شال ءِ شھر ءَ دو جتاجتائیں جاھاں بمب تراک بوتگ اَت ءُ بندات ئِے تراک پولیس کارندھانی سر ءُ دومی پاکستانی بیرک ءِ یک اسٹال سر ءَ بوتگ اَت اے دوئیں اُرشانی زمہ واری بلوچ لبریشن آرمی ءِ جارکش جیئند بلوچ ءَ زرتگ اِت اَنت-

دنیگت ءَ اے اُرش ءِ زمہ واری ھچ ءَ گل ءَ نہ منّ اِتگ-