کوپا امریکہ ءُ یورو کپ فٹبال گوازی برجاہ

کوپا امریکہ ءِ گوازی ءَ ایکواڈور ءُ پیرو دو دو گولے ءَ دیمیگ، برازیل ءَ دو گول ءَ باج برتگ، یورو کپ ءَ سویڈن ءَ سَے گول ءُ اسپین ءَ پنچ گول ءَ باج برتگ، وھدیکہ پرتگال ءُ فرانس، جرمنی ءُ ھنگری دو دو گول ءَ دیمیگ بوتگ انت –

کوپا امریکہ ءِ گوازی برجاہ انت دوشی شپ ءَ چارمی راؤنڈ ءِ اولی گوازی ایکواڈور ءُ پیرو ءِ میان ءَ بوتگ ءُ دومی گوازی برازیل ءُ کولمبیا ءِ میان ءَ بوتگ – اولی گوازی ءَ ایکواڈور ءُ پیرو ءِ لیبیاں جوانی ءَ گوازی کنان ءَ ھردو ٹیمانی لیبیاں دو دو گول اسکور کتگ دؤئیں ٹیم دیمیگ بوتگ انت – ایکواڈور ءِ نیمگ ءَ چہ ایکواڈور ءِ لیبی آر-تاپیا ءُ اینگیو ءَ یک یک گولے ءِ اسکور کتگ ءُ پیرو ءِ ٹیم ءِ نیمگ ءَ چہ لیبی گینلوکا ءُ ایندرے ءَ یک یک گولے اسکور کتگ –

برازیل ءُ کولمبیا ءِ میان ءَ بوتگیں گوازی ءَ کولمبیا ءِ نیمگ ءَ چہ یک گول ءِ کنگ بوتگ کہ کولمبیا ءِ لیبی لوئس ءَ داتگ وھدیکہ برازیل ءِ لیبی روبِرٹو ءُ کیسیمیرو یک یک گول ءِ اسکور کتگ گوازی وتی نام ءَ کتگ –

کوپا امریکہ ءِ دیم ءِ گوازی بلوؤیا ءُ یوروگاوے، چلی ءُ پیراگاوے ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ دوشی شپ سویڈن ءُ پولینڈ، سلواکیا ءُ اسپین، پرتگال ءُ پرانس، جرمنی ءُ ھنگری ءِ میان ءَ گوازی کنگ بوتگ –

دوشیگیں گوازی ءَ سویڈن ءَ پولینڈ ءِ دیم ءَ سَے گول، اسپین ءَ سلواکیا ءِ دیم ءَ پنچ گول ءَ باج برتگ وھدیکہ پرتگال ءُ پرانس، جرمنی ءُ ھنگری دو دو گول ءَ دیمیگ بوتگ اَنت –

یوئیفا یورو کپ ءِ سیمی گروپ ءِ نُھمی گوازی سویڈن ءُ پولینڈ ءِ میان ءَ بوتگ کہ پولینڈ ءَ دو گول داتگ وھدیکہ سویڈن ءَ سےَ گول داتگ ءُ باج برتگ، پولینڈ ءِ نیمگ ءَ ھردو گول پولینڈ ءِ لیبی روبرٹ ءَ داتگ انت سویڈن ءِ نیمگ ءَ دو گول ایمل پارسبرگ ءُ یک گولے ویکٹر ءَ اسکور کتگ باج برتگ ءُ گوازی وتی نام ءَ کتگ –

دھمی گوازی گوازی انگلینڈ ءُ اسپین ءُ سلواکیا ءِ میان ءَ بوتگ سلواکیا ءِ نیمگ ءَ چہ ھچ گول اسکور کنگ نہ بوتگ وھدیکہ اسپین ءِ لیبیاں جوانی ءَ گوازی کنان ءَ پنچ گول داتگ پنچیں گول اسپین ءِ لیبی مارٹین، ایمرک جئین، پبلو، پِرنندو، جورجا کوکا ءَ یک یک گول ءِ اسکور کتگ گوازی وتی نام ءَ کتگ –

یانزدھمی گوازی پرتگال ءُ فرانس ءِ میان ءَ بوتگ کہ ھردو ٹیمانی لیبیاں جوانی ءَ گوازی کنان ءَ ھردو ٹیم دو دو گول ءَ دیمیگ بوتگ انت فرانس ءِ نیمگ ءَ ھردو گول بینزیما ءَ اسکور کتگ انت پرتگال ءِ نیمگ ءَ چہ ھم دؤئیں گول پرتگال ءِ لیبی رونالڈو ءَ سکور کتگ انت –

دوازدھمی ءَ گوازی جرمنی ءُ ھنگری میان ءَ بوتگ ھردو ٹیمانی نیمگ ءَ چہ دو دو گول اسکور کنگ بوتگ دؤئیں ٹیم دیمیگ بوتگ انت جرمنی ءِ نیمگ ءَ چہ یک گول ءِ کائی لوکاس ءُ دومی گول جرمنی ءِ لیبی لیون ءَ اسکور کتگ ھنگری ءِ نیمگ ءَ چہ یک گول ءِ آدم ءُ دومی گول ایندراس ءَ اسکور کتگ اَنت –

زانگ بہ بیت یوئیفا یورو کپ ءِ بیست ءُ چار ٹیمانی تہ ءَ ویلس، ڈینمارک، اٹلی، آسٹریا، نیدرلینڈ، چیک ریپبلک، بلجئیم ، پرتگال، کروتیا، اسپین، پرانس، سویزرلینڈ، انگلینڈ، جرمنی، سویڈن ءُ یوکرائن ءِ لیبیاں جوانی ءَ گوازی کنان ءَ وت ءَ شانزدھمی راؤنڈ ءِ تہ ءَ جاہ داتگ –

یورو کپ ءِ شانزدھمی راؤنڈ ءِ اولی گوازی شمبے ءِ روچ ءَ ویلس ءُ ڈینمارک، دومی گوازی اٹلی ءُ آسٹریا میان ءَ جتا جتائیں پٹاں بوگی اِنت –