ڈاکٹر دین مھمد ءِ زورانسری بیگواھی ءَ 12 سال سرجم، کراچی ءَ زھرشانی کنگ بیت – سمی بلوچ

28 جون 2009 ءَ آوار جنگ ءَ پد بیگواہ بیتگیں ڈاکٹر دین مھمد ءَ دوازدہ سال سرجم بیت اِنت کہ تنی وھدی بیگواہ اِنت –

ڈاکٹر دین مھمد بلوچ ءِ جنک سمی بلوچ ءَ وتی یک تامر بندیں کلوھے ءَ گوشتگ کہ منی پت ءَ زورانسری آوار جنی ءَ دوازدہ سال سرجم بیگ اِنت دراھیں سرکارانی وھد ءَ سدکی دیگ ءَ ابید ھم منی پِت یل نہ بیتگ –

آئی ءَ وتی کلوہ ءَ گوشتگ کہ ھمک سال ءِ رنگ ءَ اے سال ءِ بیست ءُ ھشت جون ءَ ھم کراچی ءَ بیگاہ ءِ ساھت چار ءُ نیم ءَ یک زھرشانی روانکے کشگ بیتگ کہ آرٹس کونسل ءَ بندات بیت ءُ پریس کلب ءِ دیم ءَ ھلاس بیت اِنت –

ھمے درچ ءَ آئی ءَ گوشتگ کہ دراھیں انسان دوست، سول سوسائٹء، میڈیا ءُ سیاسی ءُ نودربر گلاں گوں دزبندی اِنت کہ اے روانک ءَ بھر بہ زور اَنت ءُ منی توار جوڑ بہ بنت –

زانگ بہ بیت ڈاکٹر دین مھمد بلوچ بیست ءُ ھشت جون دوھزاد ءُ نُھ ءَ ھزدار ءِ ھند اورناچ ءَ ڈیوٹی ءِ وھد ءَ پاکستانی پوج ءِ کارمنداں آوار جتگ ءُ بیگواہ کرتگ اَت – آئی ءِ بیگواھی ءَ پد آئی ءِ زھگ سمی ءُ مھلب یکشل ءَ زھرشانی کنگ ءَ اَنت –

ھمے رنگ ءَ انسانی ھکانی بیگواھیں باسک راشد ھسین ءِ مات ءَ ھم بیست ءُ دو جون ءَ چاگردی رسانکجاہ ٹوئٹر ءَ بندات بیوکیں کمپئن ءِ بھر زیرگ ءَ دزبندی کرتگ –

آئی ءِ جنکیں چُک فریدہ بلوچ ءَ چاگردی رسانکجاھاں وتی مات ءِ تامر بند شنگ کرتگ ءُ گوشتگ کہ بیست ءُ دو جون ءَ چاگردی رسانکجاہ ٹوئٹر ءَ راشد ھسین ءِ یل کنگ ءِ واستا بندات بیوکیں کمپئن ءَ بھر زور اَنت ءُ آئی ءِ یل کنگ ءِ واستا توار چِست بہ کن اَنت –

ھمے رنگ ءَ وائس فار بلوچ مسنگ پرسنز ءِ بنجل ءَ بیگواھیں نصیب اللہ بادینی ءِ مات ءَ گوشتگ کہ چُک ءِ بیگواھی ءَ سرجمیں کھول دردناکیں جاوراں گوں گوزگ اِنت –

آئی ءَ گوشتگ کہ اگاں منی زھگ ءَ کجام ھم جرمے ھست اِنت آئی ءِ سر ءَ کجام رنگیں بھتامے ھست گڑا آ آمیدگس ءُ ڈیھی کانودانی دیم ءَ پیش کنگ بہ بیت اِنت –

آئی ءَ گوشتگ کہ مروچی من چہ دور نوشکی ءَ دیم پہ شال ءَ ھمے اُمیت ءَ اتکگ اَنت بلکیں من ءَ انساپ رس ایت –

آئی ءَ گوشگ اَت اے گپ ءَ سرجمیں بلوچستان ءِ ھمک مردم ءَ سرپدی ھست کہ گوستگیں دو دھکاں بلوچستان ءَ زورانسری آوارجنی ءِ ھلاس نہ بوکیں وھدے بندات بیتگ سیاسی ءُ زانتکاریں مردم ھمے واستا آوار جنگ ءُ بیگواہ کنگ بنت کہ آ زانت دار اَنت اشانی ھزارانی مردم تھاریں زنداناں بندیگ اَنت ءُ دردناکیں سزا سگگ ءَ اَنت ءُ اشانی تہ ءَ منی زھگ نصیب اللہ بادینی ھم ھوار اِنت ءُ بازیں ورنایانی جون دزکپتگ اَنت ءُ ھنچیں جاھاں جون دزکپتگ اَنت اود ءَ جون سرجم ءَ پجارگ نہ بوگ ءِ بروبری ءَ اَنت زُلم ءُ زوراکی راجدپتر سک دردناک اِنت ءُ ھمے زوراکیانی تہ ءَ بلوچ ءِ ھون رچان اَنت ءُ پیداک اَنت –

آئی ءَ گوشت منی زھگ بیست ءُ پنچ دسمبر دوھزار ءُ چاردہ ءَ پاکستانی چیریں ادارھاں نوشکی ءِ ھند قازی آباد ءَ منی زھگ ءِ دیم ءَ مئے دکان ءَ زورانسری آوار جنگ ءُ بیگواہ کنگ بیتگ کہ تنی وھدی بیگواہ اِنت – نصیب اللہ یک زھنداریں نودبرے ءِ ھواری ءَ گپ ءَ سرپد بیوکیں ورنایے بیتگ ڈیھی درچاں آ ٹیکوانڈ ءِ یک داد گریوکے بیتگ ءُ آئی ءَ گوشتگ کہ من انسانی ھکانی دراھیں ادارھاں گوں دزبندی کن آں انساپ ءِ جنگ ءَ منی ھمراہ بہ بنت ءُ منی پلامرزی ءَ بہ کن اَنت –