بلوچستان ءَ جتا جتائیں وئیلاں یازدہ بیران، پنچ زدگ

سر بیتگیں ھالانی رِد ءَ پنجگور ءِ دمگ پروم ءَ دو ٹیل کشیں گاڑیانی ڈیک ورگ ءِ سبب ءَ آس لگ اتگ چریشی ءَ دو مردم ستکگ ءُ بیران بوتگ انت –

وئیل پنجگور ءُ پروم ءِ میانی دمگ پروم کپ ءَ دیم ءَ اتکگ، بیران بوتگیں مردم پنجگور سول ھسپتال ءَ برگ بوتگ – بیران بوتگیں مردمانی پجار عبدالوحید ء عبدالکریم ءُ زوھیب ء حضور بخش جھمنند کلگ پنجی کھن ءِ نام ءَ چہ بوتگ انت، اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ انت –

ھمے وڑ بلوچستان ءِ دمگ ھب ءُ ویندر ءَ دو دگ ءِ وئیلاں دو مردم بیران ءُ یکے ٹپی بوتگ –

ایدھی بنشون ءِ رِد ءَ ساکران ءِ نزیک ءَ نورانی موڈ ءَ دگ ءِ وئیل ءَ یک مردمے بیران ءُ یکے زدگ بوتگ – بیران بوتگیں مردم ءِ پجار حبیب ء ولی محمد ءِ نام ءَ چہ بوتگ وھدیکے سلمان نامیں مردمے ٹپی بوتگ –

ٹپی ءُ بیران بوتگیں مردم ھما دمان ءَ نادراہ جاہ ءَ برگ بوتگ انت ٹپی بوتگیں مردم درمان کنگ ءَ پد کراچی ءَ دیم دیگ بوتگ –

دومی وئیل ویندر ءَ دیم ءَ اتکگ کہ ناکہ کھارڑی ءِ نزیک ءَ مزن شاھدگ ءِ سر ءَ مساپر کشیں کوچ ءِ ڈیکر کنگ ءَ کسانیں چُکے بیران بوتگ –

ڈیرہ مراد جمالی ءَ گاڑی ءِ ڈیکر کنگ ءَ دو ورنا بیران ءُ گاڑی ڈرائیور ٹپی-

ڈیرہ مراد جمالی ءَ میر مراد چار راہ ءِ نزیک ءَ تیز رؤگ ءِ سبب ءَ ٹوڈی گاڑی ءَ دو ورنا ڈیکر کتگ ڈیکر کنگ پد گاڑی چپی بوتگ –

ھال سر بوگ ءَ پولیس ءُ ریسکو ءَ وت ءَ وئیل جاہ ءَ سر کتگ، گاڑی ءِ ڈیکر کنگ ءَ دؤئیں ورنا بیران بوتگ انت ءُ گاڑی چپی بوگ ءَ گاڑی ڈرائیور ٹپی بوتگ – ٹپی ءُ بیران بوتگیں مردم ڈیرہ مراد جمالی نادراہ جاہ ءَ سر کنگ بوتگ انت –

دگہ وئیلے بلوچستان ءِ دمگ بیلہ ءَ دیم ءَ اتکگ کہ کور ءَ جان شودگ ءِ میان ءَ سَے کسانیں جنکو آپ ءَ بُڈیتگ ءُ بیران بوتگ انت –

ھالانی رِد ءَ بیلہ چہ سی کلومیٹر دور گوٹ سیاں مائی پیر کور ءَ جان شودگ ءِ میان ءَ سَے کسانیں جنکو بُڈیتگ ءُ بیران بوتگ انت – بیران بوتگیں جنکوانی پجار زینب ء غوث بخش، شازیہ ء عبدالحمید ءِ نام ءَ چہ بوتگ انت سیمی گونڈوے پجار دنیگت ءَ نہ بوتگ – ھر سئیں جنکو بیلہ ء دمگ گوٹ سیاں مائی پیر ء نندوک انت –

وئیل ءِ درگت ءَ ھمے گوشگ بوگ ءَ انت کہ ھر سئیں جنکو جان شودگ ءِ میان ءَ آپ جھلانکی ءَ شُتگ انت ھمے سبب ءَ در اتک نہ کرتگ ءُ بیران بوتگ انت –

ڈیرہ بگٹی ءَ ٹریکٹر ٹالی ءِ وئیل آماچ بوگ ءَ یک مردمے بیران ءُ سئے ٹپی بوتگ اَنت –

وئیل تیز رؤگ ءِ سوب ءَ دیم ءَ اتکگ کہ ٹریکٹر ءِ دیم ءِ دؤئیں ٹائر دراتکگ انت وئیل ءِ آماچ بوتگ –

ٹپی بوتگیں مردمانی تہ ءَ یکے ءِ جاور نگیگ گوشگ بوگ ءَ انت ٹپی ءُ بیران بوتگیں مردم ھما دمان ءَ نادراہ جاہ ءَ سر کنگ بوتگ انت

دومی نیمگ ءَ بلوچستان ءِ کاروباری شھر ھب ءَ دزانی تیرگواری ءَ یک مردمے بیران بوتگ –

ھالانی رِد ءَ ھب ءِ نزیک ءَ موانچ گوٹ مارکیٹ ءَ سلاہ بندیں دُزاں لٹ ءُ پُل ءِ میان ءَ گوں آھاں جنگ کنگ ءَ دزانی تیرگواری ءَ یک مردمے بیران بوتگ – وئیل ءِ پشدر ءَ دمگی مردماں بیران بوتگیں مردے جون دگ ءِ سر ءَ ایرکتگ ءُ زھرشانی کتگ –

دالبندین ءَ یک مردمے ءِ جون ءِ دست کپتگ – ھالانی رِد ءَ دالبندین بازار ءِ نزیک ءَ کور ءِ پھل ءِ چیر ءَ ناشناسیں مردمے ءِ جون ءِ دست کپتگ – دمگی پولیس ءَ جون پرنس فھد نادراجاہ ءَ سرکتگ، آئی ءِ پجار نبوتگ –

جون ءِ درگت ءَ ھمے گوشگ بوگ انت کہ بوت کنت نشھی مردمے بوتگ آئی کھول ءِ پٹ ءَ پول برجاہ انت –