بلوچستان ءِ جتا جتائیں جاھاں پوجی کمپنی ءُ پوج ءِ سر ءَ سلاہ بندیں مردماں اُرش کرتگ ءُ تاوانبار کرتگ اَنت –
اسلام آباد ءَ ھستیں تھنک ٹینک پاکستان انسٹی ٹیوٹ فار کنفلکٹ اینڈ سیکیورٹی اسٹڈیز (پی آئی سی ایس ایس) ءِ رد ءَ سرجمیں پاکستان ءَ اپریل ءِ ماہ ءَ ھشت اُرش بیتگ اَنت کہ چریشانی تہ ءَ چار سیکیورٹی کارمنداں ھوار دوازدہ مردم کُشگ بیتگ اَنت –
پی آئی سی ایس ایس ءِ رد ءَ گیشتریں اُرش بلوچستان ءَ پیش اتکگ اَنت کہ چریشانی تہ ءَ پوج ءِ کارمند ھوار اَنت –
ھمے وڑ ءَ بلوچستان ءَ زیک ءُ مروچی بیتگیں اُرشاں لشکری کارمنداں ھوار بند ءُ ساچی شرکتانی سر ءَ سلاہ بندیں مردماں اُرش کرتگ ءُ جانی ءُ مالی تاوانانی دیمپانی سیکیورٹی فورسز ءَ کنگ کپتگ –
بلوچستان ءِ آجوئی ءِ لوٹوکیں سلاہ بندیں گل یونائیٹڈ بلوچ آرمی ءَ شنگ کرتگیں درشانی ءَ کوھلو ءَ بیتگیں اُرش ءِ زمہ واری منّ اِتگ –
یو بی اے ءِ جارکش مزار بلوچ ءَ گوشتگ کہ مئے سرمچاراں کوھلو ءُ رکنی ءِ میان ءَ پاکستانی پوج ءِ بند ءُ ساچی شرکت ایف ڈبلیو او ءِ کارمند ھما وھد ءَ تراکناکیں شوروانی نشانگ کرتگ اَنت کہ آ وتی کار ءَ گوں دزبند بیتگ اَنت ءُ چریشی ءَ کار کنوکیں کارمند زدگ بیتگ اَنت ءُ مشینری تاوانبار بیتگ اَنت –
ھمے وڑ ءَ بلوچستان ءِ دمگ مشکہ ءَ پاکستانی پوج ءِ سر ءَ بیتگیں اُرش ءِ زمہ واری بلوچستان لبریشن فرنٹ ءَ منّ اِتگ –
بی ایل ایف ءِ جارکش میجر گوھرام بلوچ ءَ وتی شنگ کرتگیں درشانی ءَ گوشتگ کہ گوستگیں شپ ءَ مئے سرمچاراں مشکہ ءُ آرمی ءِ ھیڈکوارٹر ءُ النگی ءَ پوجی پانگس ءِ سر ءَ اُرش کرتگ –
آئی ءَ گوشتگ کہ مشکہ گجر ءَ پاکستانی پوج ءِ ھیڈ کوارٹر مزنیں سلاھانی گون ءَ اُرش کرتگ ءُ ھمے رنگ ءَ النگی ءَ پانگس راکٹانی نشانگ کرتگ ءُ چرے اُرشاں پوج ءَ جانی ءُ مالی تاوانانی دیمپانی کنگ کپتگ –
چریشاں ابید بلوچ ریپبلکن گارڈ ءَ ھم رسانکدراں شنگ کرتگیں وتی درشانی ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –
بی آر جی ءِ جارکش دوستین بلوچ ءَ گوشتگ کہ ڈیرہ مراد جمالی ءَ مزدور چوک ءَ پاکستانی پوج ءِ چیریں ادارھانی گاڑی ءِ سر ءَ دزبمبے چگل داتگ –
آئی ءَ گوشتگ کہ چرے اُرش ءِ آسر ءَ یک کارمندے مرتگ ءُ دو ٹپی بیتگ اَنت –
بلوچستان ءَ ھمک روچ اے وڑیں اُرشانی ھال چاگردی رسانکجاھاں گندگ ءَ آیگ ءَ اَنت-