شال: نودربر سھیل ءُ فیصل ءِ آوار جنی ءِ ھلاپ ءَ زھرشانی

زھرشانی کنوکاں گوشت کہ سرکاری ھمک واکدار بیگواھیں مردمانی کھولاں آسرا دے اَنت بلے ھچ نہ کن اَنت بلکیں گیش مردم بیگواہ بیگ ءَ اَنت –

بلوچستان ءِ بنجاھی شھر شال ءَ بلوچ اسٹوڈنٹس کونسل ءِ دزبندی ءَ پریس کلب ءِ دیم ءَ نودربر سھیل اھمد ءَ فیصل بلوچ ءِ آوار جنی ءِ ھلاپ ءَ زھرشانی کنگ بیتگ –

زھرشانی ءَ وائس فار بلوچ مسنگ پرسنز ءِ کمک سرکماش ماما قدیر بلوچ، بی این پی مینگل، بی ایس او ءِ باسکاں ھوار بازیں کچے ءَ زالبول ءُ ورنایاں بھر زرتگ ءُ آیانی دستاں پلے کارڈز ءُ بینز بیتگ اَنت بلوچستان ءَ بیگواھیں مردمانی بارہ ءَ اوگام نبشتگ بیتگ اَنت –

ھمے وھد ءَ زھرشانی ءَ بلوچ کونسل، بی ایس او ءِ رھشوناں ھوار دگی مردماں تران کرتگ ءأ گوشتگ کہ بلوچستان ءَ زورانسری آوارجنیانی درچ برجاہ اَنت ھمک روچ نودربر دزگیر کنگ ءُ بیگواہ کنگ بیگ ءَ اَنت –

آیاں گوشت کہ بلوچستان ءَ بیگواھی یہ ترندیں رنگے ءَ برجاہ اَنت ھمک سرکار آسرا دنت بلے الکاپیں گامیج ءَ نرمی ءَ گوں بے وسی درشاب کنت گوستگیں سرکاراں ھم ھمے رنگیں ٹاہ داتگ اَنت بلے اے ٹاہ گوست ءِ رنگ ءَ دروگ ءُ پندلانی درچ ءَ ھوار اَنت –

آیاں گوشت کہ ھر کجا دھکاں زورانسری آوار جنی برجاہ اَنت ءُ ھمک پھناتاں بندوکیں مردم روچ ء رھمانی آوار جنگ ءُ گار کنگ بیگ ءَ اَنت ھمود ءَ الم دوست ءُ کتابانی دوستداروک گیشتر نشانگ ءِ تہ ءَ اَنت اے گپ پدردی یے کہ نودربرانی یک بازیں کچے اے وھد ءَ تھاریں زنداناں بندیگ اَنت ھمے بندانی تہ ءَ سھیل اھمد ءُ فیصل بلوچ ھم زورانسری آوارجنی ءِ یک پدراھیں کِسھے –

آیاں گوشت کہ بلوچ نودربرانی آوار جنگ ءُ بندیگ کنگ راستی ءَ بلوچ چاگرد ءَ تھاریں شپ ءَ دور دیگ ءِ یک پندلے، ترس ءُ بیم ودی کنگ ءُ زانت ءُ زانش ءَ گستا کنگ ءِ جھد ءَ تبا بیتگیں زانشتی بنریشگ بلوچستان ءِ نودربرانی واستا ریاستی پالیسی یک پدراھی یے –

آیاں گوشت کہ اد ءَ نودربر اگاں جنگ ءِ نیمگ ءَ رو اَنت گڑا آئی ءِ زمہ وار ریاست اِنت –

آیاں گوشت کہ پاکستان ءَ وتی جوڑ کرتگیں رھبند لپاشگ ءَ چکی ءُ پدی نہ اِنت اگاں نودربراں آوار جن اَنت ءُ سالانی سال زنداناں بند کن اَنت ءُ نیم زندیں جاوراں چگل دے اَنت گڑا اے آمیدگسی پندل بند کنگ بہ بنت –

زانگ بہ بیت سھیل اھمد ء رفیق اھمد یونیورسٹی آف مینجمنٹ اینڈ ٹیکنالوجی لاھور ءِ بیچلرز ءِ فائنک سمسٹر ءِ نودربرے ءُ ھمے رنگ ءَ فیصل بلوچ تربت یونیورسٹی ءِ بی ایڈ ءِ نودربر ھمے سال ءِ سِی ءُ یک مارچ ءَ بلوچستان ءِ دمگ کیچ ءِ شارگ ءَ آوار جنگ بیتگ اَنت –