گوادر چینی کمپنی ءِ پھازدارانی سر ءَ اُرش، اُرش ءِ زمّہ واری بی ایل ایف ءَ منّ اِتگ

چینی کمپنی ءِ پھازدارانی سر ءَ اُش کتگ ءُ یک کارمندے کُشتگ ءُ یکے زدگ کُتگ – میجر گوھرام بلوچ

سربوتگیں ھالانی رِد ءَ گوستگیں شپ ءَ ناشناسںیں سلاہ بندیں مردماں بلوچستان ءِ تیاب دپی شھر گوادر ءَ چینی کمپنی ءِ پھازدارانی سر ءَ اُرش کنگ بیتگ –

اُرش گوادر شمبے اسماعیل وارڈ ءَ کندیل چارراہ ءِ نزیک ءَ کنگ بوتگ ، اُرش ءَ چینی کمپنی ءِ پھازداراں جانی دیمپانی بوتگ ءُ سلاہ بندیں مردم درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءِ ادار دوازدہ ءُ چل منٹ ءَ گوادر شھر ءَ شمبے اسماعیل وارڈ ءَ کندیل چارراہ ءَ “چینی کنسٹرکشن کمپنی” ءِ کارمندانی نندجاہ ءِ پھازدارانی سر ءَ وتکاریں سلاھانی گوما اُرش کتگ – اُرش ءِ آسر ءَ یک کارمندے ھما دمان ءَ مرتگ ءُ دگہ یک ءِ زدگ بوتگ-

میجر گوھرام بلوچ ءَ گوشتگ کہ ھمے کواٹرانی تہ ءَ چینی انجینئر ءُ دگہ کارمند جھمنند اَنت کہ وتگڑیں گوادر فری زون پروجیکٹ ءِ سر ءَ کار کنگ ءَ اَنت-

جارکش میجر گوھرام بلوچ ءَ چہ راج ءَ لوٹ کتگ ءُ گوشتگ کہ چینی کارمند، پاکستانی لشکر ءُ آئی ءِ چوکیانی چہ وت ءَ را دور بہ دار اِت- اے اُرش بلوچستان ءِ آجوئی ءَ تاں برجاہ مان انت –