روکپتی بلوچستان ءَ دگ ءِ وئیل ءَ ھشت مردم زدگ، ناشناسانی تیرگواری ءَ دو گجر بیران

سر بیتگیں ھالانی رد ءَ روکپتی بلوچستان ءِ بنجاھی شھر دُزاپ ءَ پانزدہ میل دور میر جائو ءِ دگ ءَ دو گاڑیاں ٹکر وارتگ چریشی ءَ ھشت مردم زدگ بیتگ اَنت –

گیشیں ھالانی رد ءَ مروچی دُزاپ ءَ دو گاڑیاں ٹکر وارتگ کہ اود ءَ ھشت مردم زدگ بیتگ اَنت –

زدگ بیتگیں مردمانی چِست کنگ ءَ دمگدار سر بیتگ ءُ چِست کنگ بیتگ اَنت ءُ ھاتم النبی انبیا دُزاپ ءِ نادراہ جاہ ءَ سر کنگ بیتگ اَنت –

ھمے رنگ ءَ سراوان ءَ ناشناسیں مردمانی تیرگواری ءَ ایرانی سپاہ ءِ دو گجر جنگ بیتگ اَنت –

گیشیں ھالانی رد ءَ سراوان ءِ دمگ شستون ءَ ناشناسیں مردمانی تیرگواری ءَ سپاہ ءِ دو کارندہ کُشگ بیتگ اَنت –

کُشگ بیتگیں گجرانی پجار ھاشمی ءُ نصیری ءِ ناماں زانگ بیتگ اَنت –

کُشگ بیتگیں گجرانی بارہ ءَ سیکورٹی بنشون ءِ نیمگ ءُ تنی وھدی دگہ ھال دیم ءَ نیتکگ اَنت – زانگ بہ بیت روکپتی بلوچستان ءَ چیزے وھد بیت کہ ایرانی سیکورٹی ادارہ ءُ دگہ ادارھانی سر ءَ اُرشانی ترندی گندگ ءَ آیگ ءَ اِنت ءُ گیشتر گجرانی کوشانی زمہ واریاں سلاہ بندیں گل منّگ ءَ اَنت بلے اے گجرانی کوش تنی وھدی ھچ گل ءَ نہ منّ اِتگ اَنت –