نبشتانک: بزّگیں راج ءِ روزگار
نبشتہ کار: ھدایت بلوچ
دی بلوچستان پوسٹ
بلوچستان یک پُر گنجیں سرڈگارے دگنیا ءِ کُلیں گنج ءُ مادناں چہ اے سرڈگار ءِ دامن بہر مند اِنت ازگار تریں استان چہ یک استانے بلے اے ڈیھ ءِ مھلونک پہ لُنکہے نان ءَ پہ شد مرگ اِنت پرچا کہ بلوچ راج دری زورآورانی بندیگ ءُ غلام اِنت بلوچستان ءِ گنج ءُ ملکتانی واھند ہمے دری زوراک اَنت کہ پہ وتی نپ ءُ سیتاں پہ کارمرز اش کنگ ءَ اَنت اے پُر گنجیں سر ڈگار ءِ واھند یک کریابیں زندے گوازینگ ءَ اَنت دست ءِ درامداں کپتگ گژن ءَ مرگ انت ءُ بلوچستان ءِ گنج زوراک ءُ چانیگ وارانی دست انت بلوچستان وڑ وڑیں زلم ءُ زوراکانی زوراکیانی آماچ انت بلوچ راج ءِ بزگی ءُ وار ءُ مندگی ءِ داستان یک دراجیں داستانے وھدے انگریز امپائر بلوچستان ءِ سر ڈگار ءَ بہر ءُ بانگ کنت سرڈگارءِ دلبند ءَ یک لکیر ے رندگ بیت بلوچستان ءَ رو دراھتی ءُ روکپتی بلوچستان ءِ نام دیگ بیت کہ مروچی دو جتا جتائیں استان بلوچ سر ڈگار ءِ سر ءَ ھاکمی کنئگ ءَ اَنت گوں بلوچ ءِ کُشت ءُ کوش ھور بلوچ ءِ گنج ءُ ملکتانی لُٹ ءُ پل ءَ گُلا ئیش انت بلوچ ءِ ہمے چُک چینی ءِ عمل ءِ تہ ءَ ہما دو پوستگین بلوچ ہم ھوار اَنت گوں کہ چہ سرکاراں چانیگ گر انت ءُ آھانی زلم ءُ زوراکیانی پلہ مرز اَنت
مرچی بلوچ ءَ وتی شد ءِ توسگ ءَ پہ نا الاجی پہ کرایہ ءُ باڑہ ہمے لکیر ءِ دوئین دستاں چار گیلن تیل ءِ کارے دست ءَ گپتگ ہمے آسرا ءَ کسے ءَ وتئ زمینے بہا کُرتگ ءُ کسے ءَ وتی گوگ ءُ ھشترے بہا کُرتگ یک گاڑی یے زُرتگ ھمے اوست ءَ کہ بلکین بارے بہ بارت ءُ منی کھول ءِ مردمانی دپ چہ گُژن ءَ بند بیت ۔
بلے زوراکانی چامپٹ ھمد ءَ اوں بلوچ ء سر ءَ لگِ اتگ کہ دہ دہ روچ پہ گُژن ءُ تُن اوشتاتگ کہ یک نہ یک روچے بیت من ءَ سر کار ءُ سر کار ءِ چانیگر یلہ دے اَنت من وتی گاڈی ءِ بار ءَ بہا کنین کھول ءِ مردمان سیر لاپ کن ایں بلے لہتیں بے سنچ ءُ بے مہاریں بلوچ زوراکانی ھم کوپگی ءَ کنگ ءَ انت ھمے بزگ ءُ بے وسان رُسینگ ءُ وتی ناھاریں لاپ ءَ مان کنگ ءَ انت ءُ زوراکانی کیسگاناں اوں پُر کنگ ءَ انت۔ رو درھتی رو کپتی بلوچستان ءِ مردم یک ءِ گوں دومی ءَ سیادی وارسی است اِنت یک ءِ دومی ءِ برات، ناکو، ، سانگبند ءُ وت ماں وت انت ۔
یکے دومی ءِ سانگ ءُ سور ، پُرس ءُ پاتیا، گم ءُ وشی ءَ ھر وھد ءَ ھوار بنت وھد ءِ ھمے مردم ھمے بیمار ، کماش ، مات ءُ گھار گوزگ لوٹ انت ءُ کسئے پہ وتی الاج ءَ دیم ءَ روگ لوٹ ایت بلے ھرچ مردمے کہ زالمانی نزیک ءَ روت گُڑا دلار ءُ زوراک گون وتی لٹاں اشانی گاڑیانی نا شیشگ پشت گیج انت نا کہ پہ ھمے گوزوکین مردماں اِزت ءُ اھترام ءَ بس زرّ بدے۔
لھتے سردار ءُ سرکاری نمائندہ است کہ وتارا زاھرا بلوچ دوزوا ءُ دل ءِ بند لیک انت اوٹ پنڈگ ءِ وھد بیت لوگ پہ لوگ گرد اَنت ءُ وتی مزنی ءُ لائکی ءِ گپ ءَ کن اَنت بلے اد ءَ انچو زوراکی بوگ ءَ انت اشانی چم گشے کور انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔