کیچ: تمپ لشکر ءَ بیڑ برتگ ءُ زالبولانی مباھل پچگپتگ ءُ برتگ اَنت

سر بیتگیں ھالانی رد ءَ تمپ ءِ دمگ نزر آباد ءَ پاکستانی پوج ءَ علی جان قومی نامیں مردمے ءِ لوگ ءَ بیڑ برتگ ءُ زوراکی کرتگ –

گیشیں ھالانی رد ءَ مروچی سھب ءَ کیچ ءَ ھواریں دمگ تمپ نزر آباد ءَ پاکستانی پوج ءَ بیڑ برتگ ءُ علی جان قومی ءِ انگیر کرتگ ءُ اود ءَ گِس پَٹ ءُ پول کرتگ اَنت –

دمگی مردماں ٹی بی پی ءَ گوں گپ کنان ءَ گوشتگ کہ مروچی سھب ءَ نزر آباد ءَ علی جان قومی ءِ لوگ ءِ سر ءَ پوج ءَ بیڑ برتگ ءُ اود ءَ لوگ ءَ جاڑیگیں زالبول پوج ءَ جتگ ءُ کمشرپ کرتگ اَنت ءُ اشانی ھواری ءَ پوج ءَ زالبولانی مباھل ھم دُز اِتگ ءُ برتگ اَنت –

آیاں گوشت کہ پوج ءَ زالبول جتگ ءُ لوگ ءِ مردینانی بارہ ءَ جُست ءُ پُرس کرتگ اَنت ءُ لوگانی تہ ءَ مباھلاں ھوار دگہ سامان ھم برتگ اَنت –

دمگی مردمانی رد ءَ علی جان قومی سال دوھزار ءُ نُھ ءَ یک پوجی آپریشنے ءِ میان ءَ وتی زھگے ءِ ھمراھی ءَ دزگیر کنگ بیتگ –

دمگی مردمانی رد ءَ آئی ءِ دزگیری ءَ پد چیزے وھد ءَ علی جان قومی ءُ گوں وتی زھگ ءِ ھمراھی ءَ یل کنگ بیتگ –

زانگ بہ بیت گوستگیں روچ ءَ تمپ ءَ بی ایس آزاد ءِ گوستگیں سروک کریمہ بلوچ ءِ لوگ ءَ ھم پوج ءَ بیڑ برتگ ءُ اود ءَ لوگ پرشت ءُ پروش کرتگ –

زانگ بیت کریمہ بلوچ گوستگیں سال ءِ گڈی دسمبر بیست ءُ یک رمس ءَ کینڈا ءَ بیگواہ بیتگ اود ءَ دومی روچ ءَ آئی ءِ لاش ٹورنٹو ءَ یک کورے ءِ تہ ءَ دزکپتگ –

بلوچستان ءَ ھواریں سیاسی مردمانی گوشگ اِنت پاکستانی پوج سیاسی باسک ءُ مھلوک ءِ لوگانی سر ءَ ھروھد ءَ بیڑ بارت ءُ اود ءَ زالبولانی سر ءَ زوراکی کنت –