اوستہ مھمد ءَ تیرگواری، چار مردم بیران، دو زدگ

سر بیتگیں ھالانی رد ءَ اوستہ مھمد ءِ ھند باغ ھیڈ تھانہ ءِ نزیک ءَ گوٹھ عبدالطیف مینگل ءَ سلاہ بندیں مردمانی تیرگواری ءَ چار مردم بیران، دو زدگ بیتگ اَنت –

تیرگواری ءِ وئیل حمید اللہ مینگل ءِ لوگ ءَ پیش اتکگ کہ اود ءَ ناشناسیں مردماں لوگ ءَ دور کرتگ ءُ وپتگیں چار کس کُشتگ اَنت ءُ دو زدگ کرتگ اَنت –

تیرگواری ءَ بیران بیتگیں مردمانی پجار ظفر اللہ مینگل، منظور مینگل، ناصر علی پندرانی ءُ بخش علی پندرانی ءِ ناماں زانگ بیتگ اَنت وھدیکہ الطاف ءُ نور خان مینگل زدگ بیتگ اَنت –

دمگی مردمانی رد ءَ وئیل کوھنیں دشمنی ءِ سوب ءَ دیم ءَ اتکگ کہ سلاہ بنداں تیرگواری کرتگ ءُ چار کس کُشتگ اَنت –

زانگ بہ بیت گوستگیں روچ ءَ ڈیرہ بگٹی ءَ دو ٹولیانی میان ءَ جنگ ءُ چوپ بیتگ ءُ دو کس بیران بیتگ اَنت –

وئیل ڈیرہ بگٹی ءِ دمگ حبیب رائی ءَ پیش اتکگ کہ اود ءَ دو ٹولیانی میان ءَ دپ جاک ءَ پد تیرگواری بیتگ ءُ چریشی ءَ دو کس بیران ءُ دو زدگ بیتگ اَنت، بیران بیتگین مردمانی پجار خلیل احمد ءُ نوید جان ءِ ناماں زانگ بیتگ اَنت –