کیچ ھوشاپ ءَ پاکستانی پوج ءِ سر ءَ اُرش، اُرش ءِ زمّہ یو بی اے ءَ منّ اِتگ

تل سالاچ ءَ پاکستانی پوج ءِ پانگس ءِ سر ءَ مزنیں سلاھاں گوں اُرش کُتگ بازیں کارمندے کُشتگ ءُ ٹپی کُتگ اَنت – مرید بلوچ

سربوتگیں ھالانی رِد ءَ گوستگیں روچ ءَ ناشُناسیں سلاہ بندیں مردماں ھوشاپ تل سالاچ ءَ پاکستانی پوج ءِ پانگس ءِ سر ءَ اُرش کُتگ –

اُرش ءَ پاکستانی پوج ءَ جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مُرید بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ گوستگیں روچ ءَ بیگاہ ءِ ادار پنچ ءَ مئے سرمچاراں کیچ ءِ دمگ ھوشاپ تل سالاچ ءَ پاکستانی پوج ءِ پانگس ءِ سر ءَ مزنیں سلاھانی گون ءَ اُرش کُرتگ۔

جارکش ءَ گوشتگ کہ سرمچارانی اُرش ءَ پاکستانی پوج ءِ بازیں کارمندے مُرتگ ءُ ٹپی بیتگ اَنت۔

جارکش ءَ گوشتگ کہ مروچی سھب ءَ ھمے دمگ ءَ پاکستانی پوج ءِ سَے جنگی بالگرداں کوھانی سر ءَ سک باز شیلنگ کنگ ءَ انت ُ زمینی پوج ھم لشکر کشی کنگ انت –

جارکش مرید بلوچ ءَ وتی درشان ءِ تہ ءَ دیمتر ءَ گوشتگ کہ گوستگیں روچ ءَ مئے سرمچاراں بولان ءَ ریل ءِ سر ءَ اُرش کنگ ءِ شور کُرتگ، بلے لھتے ٹیکنیکلی سوب ءَ اُرش کنگ نہ بوتگ – آئی ءَ گوشتگ کہ ما پیش ءَ ھم باز رند ءَ گوں راج ءَ دزبندی کُرتگ کہ ریل ءَ سپر مہ کن اِت ءُ انی ھم چہ راج ءَ لوٹ کن ایں کہ ریل ءَ سپر مہ کن اَنت ءُ چہ پاکستانی پوج ءِ پانگس ءُ سرکاری شور بندیاں ھم دور بہ بہ اِت پرچا کہ بلوچ سرمچار کجام ھم وھد ءَ اُرش کرت کن اَنت۔

گڈسر ءَ جارکش ءَ گوشتگ کہ مئے اے وڑیں اُرش بلوچستان ءِ آجوئی ءَ داں برجاہ مان انت –