نبشتانک: نِمدی یے پہ وتی مات سرزمین بلوچستان ءِ نام ءَ
نِبشتہ کار: بابا جی آر بلوچ
دی بلوچستان پوسٹ
دروت ءُ دراہ بات ئے۔
دروت ءُ دراہ بات ءَ پَد ، راجی نرمزاراں پہ تو سلامے راھیگ کتگ ءُ ھمے گوشتگ اِش کہ ھرچ زھگے تئی دلبند ءُ زانسراں واب اِنت ، آیاں جھسرین ءُ بگوش ٹوھیں سلامے پہ شما دیم دیگ بوتگ ءُ من ءَ ھمے کلوہ داتگ ئِے کہ ما پہ تئی سینگارگ ءَ گوں جوانی ءَ گاماں تْرند کناں این ءُ تئی داتگیں گنج ءِ توار ماں سرجمیں گیدی ءَ سر کتگ ءُ بلے گیدی انگت چوں گنگاں بے زبان اِنت،چوں کوراں ھچ میم نہ کنت ءُ جھان پہ ما ھچ نہ سرُ اِیت،بلے اے گپ ءَ دلجم بہ بو کہ تئی نرمزاریں بچ وتی سرانی دیگ ءَ ساجو اَنت ءُ پہ تئی رکینگ ءَ وتی ھوناں ھر دمک ءُ دراں ریچان انت ءُ تو سرپد ئے ؟ تئی بچانی پجار ماں جھان ءَ چو نہ اوشتوکیں آپ ءَ شنگ ءُ تالان انت ،بلے یک ھالے ترا دیگ لوٹ آن ءُ من زاناں تو یکبرے سک پدرد بہ ئے بلے تو مات ئے وت ءَ ڈڈ کن ءُ دل ءَ ٹوہ کن تو دگہ بچ پہ وتی ڈولدار کنگ ءَ ودی کن ئے۔۔
اماں۔۔۔!!
بژنیگ مہ بی۔۔۔!
تو چو سرپد ئے ۔؟
چہ تئی بچاں لھتیں باجو بیتگ ءُ سنگر اش یلو کتگ ءُ تتگ اَنت ءُ لھتیں ماں سراں جھل کنان اَنت ، وت ءَ تپرکہ مہ کن اے بچ تئی نہ انت بلکیں تو پیداک کتگ اَنت بس پہ نام کہ بچ اَنت۔۔
اماں بژنیگ مہ بی۔
تئی سرمچنڈیں بچ ماں تیھریں کوہ ءُ تلاراں ماں زند گوازینگ ءَ انت پیماز ءُ آپشک ءَ گوں دازانی بُن ءَ نشتگ ءُ ساڑی اَنت ، وت ءَ ڈڈ کن اے جنگ کہ بنا بیتگ ایشی ءَ کس داشت نہ کنت تو مارا وتی زانسراں چنڈینتگ ءُ ما رستگ ءُ مزن بیتگ ایں پہ اے واستا اناں کہ ترا بہ بر اَنت، بلکیں تئی رکینگ ءَ ما زندگ ایں-
دل ءَ ھچ مہ جیڑ کہ تئی بچاں چے چار باجو بیتگ، بلکیں چار ءِ مٹ ءَ چار سد پہ تئی ڈولدار کنگ ءَ ھوار بیتگ ءُ زوراک ءَ وتی ترندیں زور جتگ ءُ زور ئِے داتگ تئی زھگانی آوار جنگ ءَ۔!
بلے منی مادر جان وت ءَ تکانسر مہ کن تو مارا پہ وتی رکینگ ءَ پیداک کتگ ءُ ماں شاگیں گوانزگ ءَ ھمے کول کتگ کہ ما گلامی ءِ زند اُوپار نہ کن ایں، ما پہ تئی رکینگ ءَ پدائین ھم کن ایں ءُ دیم پہ دیمی میڑ ھم۔۔!
وت ءَ ھچ گمیگ مہ کن ما پہ لیلو تئی برگ ءَ اوپار نہ کن ایں بلکیں وتی ساہ ءَ پہ تو کربان کن این ءُ گڈی ءَ ھمے گوش آں، اماں تو ھچ پگر مہ کن راجی نرمزار پہ تئی سینگارگ ءَ ھر کوہ ءُ کوچگاں ساڑی اَنت-
گڈی ءَ منی مات اللہ ءِ میار ئے پہ وتی رکینوکاں دوا کن-
تئی وتی بچ: بابا جی آر بلوچ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔