تربت ءَ سلاہ بندیں مردمانی تیرگواری ءَ دو مردم زدگ بیتگ اَنت

بلوچستان لبریشن فرنٹ ءِ جارکش میجر گوھرام بلوچ ءِ گوشگ اِنت تربت ءَ ریاستی چاریگے تیر جتگ ءُ زدگ کرتگ ءُ آئی ءِ کش ءَ نندوکیں مردمے ھم زدگ بیتگ چریشی ءَ ما دردیگ اِنت –

سر بیتگیں بیتگیں ھالانی رد ءَ تربت ءِ بنجاھی جاہ سنگانی سر ءَ ناشناسیں سلاہ بندیں مردمانی تیرگواری ءَ دو مردم زدگ بیتگ اَنت، زدگ بیتگیں مردمانی تہ ءَ یکے ءِ جاور نگیگ بیتگ ءُ کراچی ءَ برگ بیتگ –

زدگ بیتگیں مردم ءِ پجار دودا قدیر جھمنند بلیدہ الندور ءِ نام ءَ زانگ بیتگ –

دمگ ءَ ھواریں مردماں گوشتگ کہ تیر جنگ ءُ زدگ بیتگیں مردمانی تہ ءَ دودا قدیر دمگ ءَ دُزی ءُ ناشریاں ھوار پاکستان ءِ چیریں ادارھانی نیمگ ءَ جوڑ کرتگیں ڈیتھ اسکواڈ ءِ باسکے بیتگ –

دومی نیمگ ءَ بلوچستان لبریشن فرنٹ ءِ جار میجر گوھرام ءَ کیچ تربت ءَ بیتگیں اُرش ءِ زمہ واری منّ اِتگ –

میجر گوھرام بلوچ ءَ رسانکدراں شنگ کرتگیں درشان ءِ تہ ءَ گوشتگ کہ گوستگیں شپ ءِ ساھت نُھ ءَ مئے سرمچاراں تربت سنگانی سر ءَ تیرگواری کرتگ ءُ ڈیتھ اسکواڈ ءِ یک کارندھے زدگ کرتگ –

میجر گوھرام بلوچ ءَ گوشتگ ریاستی چاریگ دودا قدیر ءِ سر ءَ ھما وھد ءَ تیرگواری کرتگ کہ سنگانی سر ءَ یک دکانے ءَ نندوک بیتگ ءُ آئی ءِ گور ءَ دگہ یک ھم مردمے نندوک بیتگ ءُ تیرگواری ءِ آسر ءَ آ ھم زدگ بیتگ چریشی ءِ سر ءَ آئی ءِ زدگ بیگ ءَ پدرد اِنت –

گوھرام بلوچ ءَ گوشت کہ ما ھروھد ءَ لس مھلوک ءَ گوں دزبندی کنگ ءَ ایں کہ ریاستی کارندھاں گستا بہ بنت ءُ وتی پھریز ءَ بہ کن اَنت –

گوھرام بلوچ ءَ گوشتگ کہ یک رندے پد ءَ لس مھلوک ءَ گوں دزبندی کن آں آ ریاستی چاریگاں وت ءَ گستا بہ کن اَنت ءُ سرمچار کجام ھم وھد ءَ ریاستی کارمندانی سر ءَ اُرشکار بیت کن اَنت –